INATSISARTUT § 37
Gerth Mikaelsen (N): Tasiilami inuuniarnikkut ajornartorsiutit suli annertupput
Inatsisartuni ilaasortaq, Gerth Mikaelsen (N) Tasiilami suliffissaaleqineq aammalu tamatuma malitsigisaanik inuuniarnikkut ajornartorsiutit arlallit pillugit Naalakkersuisunut apeqquteqarpoq. Isumaginninnermut, suliffeqarnermut, nunamullu namminermut avatangiisinullu Naalakkersuisoq Bentiaraq Ottosen (A) akissuteqaammini kommunimut innersuussivoq.
Suliffissaaleqineq annertooq nassataqarpoq aningaasanoorajunnermik aalakoornartunillu imerajunnermik, taamattoqarneralu meeqqanut tuttarpoq. Taamak isumaqarpoq Gerth Mikaelsen Naleraq sinnerlugu Inatsisartuni ilaasortaq, taanna § 37 aqqutigalugu iliuusissanik Naalakkersuisunut ujartuivoq. Naalakkersuisulli Kommuneqarfik Sermersuumut innersuuppaa.
Asseq: Sermitsiap toqqorsivia
Nunatsinni innuttaasut illoqarfinni nunaqarfinnilu aqqusinernik attaveqaasersugaanngillat, taamaammat timmisartutigut umiarsuartigullu kiffartuunneqarnissaq pinngitsoorneqarsinnaanngilaq, tamannalu innuttaasunut ilungersunartumik inissisimalersitsisinnaavoq.
Tamanna pingaartumik nunatta kangiani Tunumi malugineqartarpoq, Tunu tamaat 3.000-it missaannik inoqarpoq, taakkunannga 2.000-it tungaanut amerlassusillit illoqarfimmi Tasiilami innuttaasuupput.
Uppernarsaatitalimmik takussutissaqarpoq Tasiilami suliffissaaleqineq ukiuni arlalippassuarni agguaqatigiissitsinermi qaffasinnerpaanut inissisimasartoq. Massakkorpiaq nuna tamakkerlugu suliffissaaleqinermik eqqugaaqqasut 3 procentit tungaanoorput, Tasiilamili 10 procent sinnerlugu suliffissaaleqisoqarluni.
Immikkut iliuusissanik pilersaaruteqartoqanngilaq
Inatsisartuni ilaasortaq, Gerth Mikaelsen (N), nammineq aamma Tunumeersoq, Naalakkersuisunut ujartuivoq suliffissaaleqineq apparsarniarlugu Naalakkersuisut qanoq iliuuseqarniarnerannik.
Isumaginninnermut, suliffeqarnermut, nunamullu namminermut avatangiisinullu Naalakkersuisoq Bentiaraq Ottosen (A) kommunimut innersuussivoq tamatumalu saniatigut aamma kommunit ingerlataannut Majoriamut innersuussilluni, taakku sulileqqinnissamut sungiusartitsisarnerat ilanngullugu innersuussilluni.
Aningaasanoorajunneq meeqqallu serlersaarisarnerat
Gerth Mikaelsen aamma isumaqarpoq suliffissaaleqisut ilai aningaasanoorneq aqqutigalugu inuuniartartut, tassa aningaasanoorajuttuuneq ajornartorsiutaasoq, taannalu Naalakkersuisut qanoq iliuuseqarniarnerinik aperivoq. Matumanissaaq Bentiaraq Ottosen allamut, tassa atornerluinermut katsorsaasarfinnut Allorfinnut innersuussivoq.
Taamatuttaaq meeqqat serlersaarisarnerat, Gerth Mikaelsenip piitsuussutsimik pissuteqarsorisani Naalakkersuisunut apeqqutigaa qanoq iliuuseqartoqarniarnersoq, tassanissaaq aamma isumaginninnermut, suliffeqarnermut, nunamullu namminermut avatangiisinullu Naalakkersuisoq Bentiaraq Ottosen (A) kommunimut innersuussivoq.
Gerth Mikaelsen: Naalakkersuisut akissutaat assut pakatsinarpoq
Gerth Mikaelsenip Bentiaraq Ottosenimit akissutisiani assut pakatsissutigai:
- Assut pakatsinarpoq ajornartorsiutit imaannaanngitsut Naalakkersuisumit suusupaginnittutut nipilimmik akiinnarmagit kommunimullu innersuussiinnaarluni, pingaartumik aamma Naalakkersuisut siulittaasuat, Jens-Frederik Nielsen (D) nipituumik ersarissumillu neriorsuuteqarnikuusoq iliuuseqartoqassasoq aammalu Tunu immikkut, pingaartumillu Tasiilaq immikkut sammineqassasoq, Gerth Mikaelsen Sermitsiamut oqarpoq.
Gerth Mikaelsen tassunga uniinnarusunnani oqaluttuarpoq Inatsisartut ukiakkut ataatsimiinnissaannut arlalinnik Tasiilamut samminnittunik siunnersuuteqassamaarluni.
