Tasiilami innuttaasut naammagiliisut

“Tunumiunik naqisimanninneq unitsilli”, Annette Broman Nicolaisen Facekoomi allappoq. 

Taassuma Tasiilami innuttaasut tunumiut naqisimaneqartarnerat Tunulu pillugu suliniuteqanngippallaarneq pillugit Namminersorlutik Oqartussanut Kommuneqarfik Sermersuumullu akerliussutsimik takutitsinissamik piareersaqatiserai.

Namminersorlutik Oqartussat suliffeqarfiutaat aamma kiffartuussinerliulissangatikkini aamma oqaatigaa.

- Umiarsuaq Tasiilamut ukioq manna tikittussaq kingulleq 2025-mi novembarip aallartinnerani tikissasoq, Royal Arctic Linep pilersaarutigaa, taamaalilluni qaammatini arlalinni pilersuisoqarnavianngilaq. Tusassi internettimik tamaani pilersuinera ullutsinni pisariaqartitatsinnut naapertuutinngilaq, kigaappallaarujussuarpoq. Icelandair Islandimiit Kulusummut 2025-mi oktoberimiit 2026-mi marsip tungaanut timmisartuussisarunnaartussaavoq. 

- Namminersorlutik Oqartussat Naalakkersuisullu Tunumi suliniuteqanngillat, Tunumi pisssutsit ilungersuanarnerannut naammagiliillutik akerliussutsimik takutitsilersaartut Mike aamma Anette Broman Nicolaisen allapput.

- Pissutsit taamaannerannut naammagiliivugut. Tunu sumiginnarneqarpoq, tamannalu inukillisaanertut taaneqarsinnaavoq, aappariit taakkua Tunumi takornarialerisuusut allapput.

Umiarsuaq tikittussaq kingulleq novembarimi tikissasoq

Royal Arctic Linep umiarsuaa Tasiilamut ukioq manna tikittussaq kingulleq qaqugu tikissanersoq, Anette Broman Nicolaisenip paasigamiuk pakatsissutigeqaa. Decembarimimi aamma umiarsuaqartarnissaa, taassuma ukiorpaalunni tamaviaarutigaa – tamannalumi siorna iluatsilluni. – Taamali kingusitsigisukkut tikittoqartarnera imminut akilersinnaanngimmat taamaalisukkut umiarsuaqartitsissaarpoq. 

- Kalaallit Nunaannili pilersuinikkut kisermaassisutut isorliunerusunut pilersuisuussaatitaavoq. Icelandair Kulusummut aamma timmisartuussisarunnaarnikuuvoq.

- Tassa nioqqutissanik nutaanik qaammatini tallimani pilersornissaqanngilagut. Tunu inuerukkiartuinnartoq maluginiarparput, Anette Broman Nicolaisen oqarpoq. Taassuma Royal Arctic Linep pisortaa attavigamiuk Tasiilami novembarip aappaata kingorna umiarsuaqarnissaanut aningaasaliisoqarnissaa qulakkeerniarlugu Namminersorlutik Oqartussat oqaloqatigisimagitsik ilisimatissimagaani oqaatigaa.

Tunumiunik naqisimanninneq unitsilli

Ulunnguaq Markussenip Ilisimatusarfimmi Ph.D-nngorniutaa “Piniartoq i en globaliseret verden”-imut (Piniartoq nunarsuarmioqataasoq, aaqq.), Anette Broman Nicolaisenip Facebookimini allatamini aamma innersuussutigaa, innersuussutaalu tassa Tunumi innuttaasut naqisimaneqartutut Kitaanilu politikerinit naalakkersuinikkut pissaaniliusunit politikkikkut sulianut tunngasuni tusaaneqarneq ajortutut misigisimanerannut tunngassuteqarpoq.

- Ulunnguaq Markussen Tunumi pissutsinik misissuinermini siuarsimasimaqaaq. Suliaami ukiualuit matuma saqqummerpoq, sammisaali nipangiusimaannarneqartutullusooq ippoq. Politikeriniimmi qisuariarfigineqaavinngilaq, aamma Namminersorlutik Oqartussanit taaneqanngilaq, Annette Broman Nicolaisen oqarpoq.

Tunumi najukkami oqartussaanerup nukittorsarneqarnissaa, najukkami politikkikkut sunniuteqarnerulernissaq kommunillu allaffissornerata siammarternissaa aaqqiissutissaasinnaasunut ilaasut, Ulunnguaq Markussenip Ph.D-nngorniutimini ilaatigut tikkuarpaa. Tunumiut oqaasii ataqqineqartariaqarput – ilaatigut soorlu tunumiutut atuartitsisoqartalernikkut.

Ilinniarfissaalatsisut

Tusagassiorfiit Tunumi suliffissaaleqinerujussuaq pillugu allaatigisaat oqallisigineqalillaraangamik Anette Broman Nicolaisen aamma kissaammertarpoq.

- Tujorminartarpoq – eqqartornerlunneqartarpugut. Namminersorlutik Oqartussat Tunumut 3.000-nik innuttaassusiliusumut aningaasaliivissortariaqavipput, aamma suliffeqarfiutitik Tunumik tunulliussinnginnissaannik piumasaqarfigisariaqarlugillu kimigiiserfigisariaqarpaat, Anette Broman Nicolaisen oqarpoq.

Ingammik inuusuttut meeqqat atuarfianni naggataarutaasumik soraarummeersimasut ilinniarfissaannik pilersitsinissaq pisariaqartoq erseqqissaatigaa.

- Namminersorlutik Oqartussat inuusuttut meeqqat atuarfianni naammassisut akisussaaffigisariaqarpaat. Inuusuttummi ukiuni pingasuni sunngiffeqaannartussaanngillat. Minnerpaamik ilinniarfeqalernissaat qulakkeerneqartariaqarpoq – Kitaani sumiiffinni amerlasuunisulli illoqarfinnilu inukinnerusunisulli Namminersorlutik Oqartussanit aningaasaliiffigisimasaattut ittunik, taanna oqarpoq.

Kujataa milliardilikkuutaanik aningaasaliiffigineqartoq – Tunuli puiorneqartoq

Naalakkersuisut nutaat suliassatik eqqissillutik paasiniartariaqaraat aamma sillimaniarnermut nunanullu allanut politikkinut tunngasunik suliassarpassuaqartut paasisinnaalluarini oqarpoq, aperalunili Tunumili suliffissaaleqinerujussuaq attaveqaateqarnikkullu pissutsit ajorsiartuinnarnerat ilumut akuersaaginnassanerivut.

-  Kujataa assersuutitut taavaa, Namminersorlutik Oqartussammi tamaani ilinniarfinnik pilersitsiortornissamut, suliffeqarfiutiminnut mittarfiliornissamullu aningaasaleerujussuarnikuupput.

- Kujataa milliardilikkuutaanik aningaasaliiffigineqareerpoq – Tunuli pinnagu. Inuusuttunut arfineq-pingasunik qinigaaffimmi kingullermi inissialiortoqarpoq, taakkualu novembarimi naammassineqarput, Namminersorlutik Oqartussalli suli atulersinngimmatikkit najugaqarfigineqanngillat, Anette Broman Nicolaisen oqarpoq, ilanngulluguli aamma oqaatigalugu Naalakkersuisut Demokraatinik siuttoqartuusut Tasiilami mittarfiliortitsinissamik pilersaartut arajutsisimanngikkini.

- Suliarli taanna sivisusinnaasoq, taanna oqarpoq erseqqissaatigalugulu akerliussutsimik takutitsinissartik Tasiilami kommunip allaffeqarfiata silataani sapaammi maajip ullluisa 18-ianni ualikkut pingasunut pisussatut pilersaarutigigitsik. Tunumiut ilarpassui Nuummi najugallit ulloq taanna akerliussutsimik aamma takutitseqataanissaat aaqqissuisut aamma sulissutigaat.