INATSISARTUT
IA-mi nikisiterineq - Aronsen tunuarpoq
Inatsisartuni ilaasortaq, Hans Aronsen (IA) Inatsisartuniit tunuarniarluni qinnuteqarpoq. Inatsisartut siulittaasoqarfiata qinnuteqaat akueraa. Maanna Pipaluk Lynge (IA) Inatsisartuni ilaasortavinngorpoq.
Inatsisartuni ilaasortaq Hans Aronsenip (IA) Inatsisartunit aninissamik qinnuteqarnera siulittaasumit akuersissutigineqarpoq.
Assiliisoq: Leiff Josefsen
Siullermik Stine Egede (134), Kommune Kujalleq-mi borgmesterinngornini pissutigalugu Inatsisartunit tunuarniuteqarpoq. Mikivsuk P. Thomassen (95) Inatsisartunut ilaasortanngorpoq.
Tamatuma kingorna Sofia Geisler (116), politikkip avataani nutaanik misilittagassarsioriniarluni aalajangerpoq, tamannalu Hans Aronsen-imut (85) Inatsisartuni ilaasortanngortitsivoq.
Maanna Hans Aronsen (85) Inatsisartuniit tunuarnerminik qinnuteqarpoq taamaalillunilu akuerineqarsimalluni, tamannalu Pipaluk Lynge-mut (64) ullumikkut Inatsisartuni ilaasortannguinnermik kinguneqarpoq.
Inatsisartut siulittaasuata kina sinniisussatut aggersarneqassanersoq oqaatiginngilaa, kisianni Mariia Simonsen aggersarneqassasoq ilimanaateqarluarpoq.
Tamakku saniatigut qinigaalluarsimasoq Eqaluk Høegh piffissami matumani piffissaligaanngitsumik sulinngiffeqarpoq.
