Ilinniartitaanermut immikkoortortaqarfimmi annertuumik missingersuutini atuivallaartoqartoq

Ilinniartitaanermut immikkoortumi nuussinissat arlallit akuersissutiginissaat Aningaasaqarnermut Ataatsimiititaliap itigartippaa, missingersuutillu pillugit maleruagassaq 2008-meersoq innersuussutigalugu, tassanimi imaa aalajangersagaqarpoq:

“Taamaattumik ukiumi aningaasaliiffiusup naanerani aningaasaleeqqittoqarnissaanik qinnuteqartoqarniassanngilaq, missingersuutitigut qaangiinissaq pinngitsoorneqarsinnaanngitsoq erseqqippat. Missingersuutitigut qaangiinissamut pissutaasoq akerlianik nunatta karsiata naatsorsuutaani naatsorsuutitigut nassuiaatini nassuiarneqassaaq”.

Nangippullu:

“Missingersuutitigut tunngaviit, assersuutigalugu sulisutigut atuineq pillugu missiliuineq imaluunniit isertitanik matussuserneqartumik ingerlataqarnermiit isertitat allanngorpata ilassutitut aningaasaliissuteqarnissamik assersuutigalugu qinnuteqartoqassanngilaq. Aningaasaliissutini pingaarnertigut siunertaq allanngorpat taamaallaat ilassutitut aningaasaliissuteqarnissamik qinnuteqartoqassaaq”.

Allattuiffik takisooq

Naalakkersuisut arlaleriarlutik immikkoortunut assigiinngitsunut ingerlatsinermi aningaasaliivigineqarnissaq qinnutigaat, Aningaasaqarnermullu Ataatsimiititaliap taakku atuereernerup kingornatigut aningaasaliinerunersut apeqqutigaa. Aningaasallumi ikittut matumani pineqanngillat. Allattukkat takisoorujussuupput, Naalakkersuisullu aningaasaliissutit qaffanneqarnissaannut apparneqarnissaannulluunniit allanguinissat 27-t kissaatigaat.

GUX Nuuk assersuutitut tigugutsigu, tassani 2 million koruunit sinnilaarlugit ilassutitut aningaasaliivigineqarnissaq Naalakkersuisut qinnutigaat, tassanilu atuinerussutit 2,5 mio. koruunit ukiumut aningaasanut inatsiseqarfimmut tullermut nuunneqarnissaat Naalakkersuisut qinnutigaat.

- Taamaalilluni ukioq manna atuinerussutit 4.530.000 koruuniupput. Tamatuma siunissami ilinniarfiup aningaasaqarnera qanoq sunnissaneraa paasissutissiissutigineqanngitsoq, Aningaasaqarnermut Ataatsimiititaliaq allappoq, matumanilu atuereernermi aningaasaliineq pineqarnersoq aperaluni.

Inersimasunut ilinniartitsinermi immikkoortumi aamma ajortoqarpoq, tassungalu 1.821.000 koruuninik ilassutitut aningaasaliivigineqarnissaq qinnutigineqarpoq. 

- Inersimasut ilinniartut qanoq amerlatigisut, ilanngaaseereerluni aningaasaliissutit marloriaatinngungajannerannik malitseqartut tiguneqarsimanersut oqaatigineqanngitsoq, Aningaasaqarnermut Ataatsimiititaliaq allappoq.

Campus Kujallermi ajornartorsiuteqartoqaqqittoq

Akisunerpaatullu Campus Kujallermut 4.750.000 koruunit qinnutigineqarput. Taakkulu saniatigut atuivallaarutit 3,5 mio. koruunit ukiumut aningaasanut inatsiseqarfimmut tullermut nuunneqarnissaanut piginnaatitsissut, Naalakkersuisut qinnutigaat.

- Taamaalilluni ukioq manna atuivallaarutit 8,23 mio. koruuniupput. Taakku ilinniarfiup siunissami aningaasaqarneranik qanoq sunniissanersut oqaatigineqanngitsoq, Aningaasaqarnermut Ataatsimiititaliaq allappoq, taakkulu GUX Qaqortumi ilinniartitsinermut aningaasarsianut aningaasartuutini qaangiuttoornerni 23 procentit missaannik atuivallaartoqartoq maluginiarpaat. Campus Kujalliup ilinniartitsisunut atorfiit ilaat inuttaleqqissanagit, taarsiullugulu ilinniartitsisut allat ilinniartitsinernik ingerlatsinerat, taamaalillunilu aningaasarsiat qaangiuttoornersiutitut annertussusillit akiliutigineqartarnerannik nassuiaat, Ataatsimiititaliap naammaginngilaa. Taamaaliorneq Qaqortumi ilinniarnertuunngorniarfimmi ilinniartitsisut agguaqatigiissillugu ukiumut qaffasissunik aningaasarsiaqalernerannik kinguneqartoq ilisimatitsissutigineqarpoq.

Ukiut tamaasa piuartoq

Campus Kujallermi aningaasaqarnerup ilungersunartorsiorneq ukiut tamaasa pisartutut isikkoqaleqqavoq. 2022/23 taamanikkut Ilinniartitaanermut Naalakkersuisoq Peter Olsen Campus Kujallermi milliuunilikkaanik missingersuutinik qaangiisoqarnera pissutigalugu, sakkortuumik assoralisimaarpoq, taamaattoqarneratalu Kukkunersiuinermut Ataatsimiititaliap ”sakkortusisamik isorinninnera”-nik kinguneqarpoq. 

Peter Olsen Ilinniartitaanermut immikkoortumi Naalakkersuisuusimavoq, maannalu Aningaasaqarnermut Akileraartarnermullu Ataatsimiititaliami, maanna ilassutitut aningaasaliivigineqarnissamut apeqquterpassuarnik saqqummiisumi siulittaasuulluni.

Nuussinissanik allattugarpassuit taamaallaat ilassutitut aningaasaliivigineqarnissamut tunnganngillat, aammali aningaasat ilinniarfiit ilaannit peerneqarnissaannut tunngallutik.

Nuummi Niuernermik Ilinniarfimmut tunngatillugu Naalakkersuisut 3 mio. kr-nik, ilinniartitaanermut immikkoortumi allani atuivallaarnermik matussusiinissamik imaaliallaannarlutik nuusserusupput. Tassungalu tunngatillugu Aningaasaqarnermut Ataatsimiititaliaq ima aperivoq: Sulisunilli amigaateqarneq qanorpiaq isikkoqarnersoq tamannalu ilinniarfiup ingerlanneqarneranut aningaasaqarneranullu qanoq sunniuteqassanersoq ersernerluppoq?

Attartornissamik isumaqatigiissut Katuamut akisuvoq

Taamattaaq Katuap immikkut 750.000 koruuninik, attartornissamik isumaqatigiissummut tunngatillugu kukkunermut tunngasumut, Katuamut 1,3 mio. koruuninik nalilik, aamma Aningaasaqarnermut Ataatsimiititaliap tupigaa.

- Attartortitsinissamik isumaqatigiissut qanoq imaqarnersoq Katuallu ingerlanneqarneranut qanoq sunniuteqarnersoq paasissutissiissutigineqanngilaq. 1.300.000 koruuninik akiliinissamik eqqartuussut qanoq imaqarnersoq aamma paasissutissiissutigineqanngilaq. Suliaq Namminersorlutik Oqartussat aningaasaliissutinit akilertagaannut siunissami qanoq sunniuteqassanersoq pillugu paasissutissiissutigalugulu ilisimatitsissutit taakku itisilerneqartariaqarput, Aningaasaqarnermut Ataatsimiititaliap siulittaasua Peter Olsen allappoq.

- Naalakkersuisut akissutaata tiguneqarnissaata tungaanut Aningaasaqarnermut Ataatsimiititaliap isummernissani kinguartikkaa, siulittaasoq naggasiilluni allappoq.

Nuussinissanut 27-nut allattuiffik takuuk – una tooruk.