Ilisimatusarneq: "Uummatiminnik akulikippallaamik tilleruluttoortartut" Kalaallit Nunaanni Europamilu amerlaqatigiipput
Uummammik akulikippakkaamik tilleruluttoortartut Kalaallit Nunaanni Europamilu amerlassusaat assigiittut Ph.d.-mik ilisimatusarnermi paasineqarpoq.
Nakorsap ilisimatusartullu Nadja Albertsenip Kalaallit Nunaanni misissuinerit nunani allani misissuinernut sanilliuppai, taassumalu Kalaallit Nunaanni uummammik akulikitsumik tilleruluttoortartut Europamitut amerlatigisut inerniliuppaa.
Assi: Jesper Hansen
Kalaallit Nunaanni uummatip akulikippallaamik tilleruluttoortartut qanoq amerlatiginersut nakorsap ilisimatusartuutigisup Nadja Albertsenip paasivaa.
Nappaat taanna uummatip nikerartumik tillilertarneranik pisarpoq.
Ilisimatusartoq misissuinerup inerneri pillugit tusagassiuutinut nalunaarummi ima allappoq:
- Nunatsinni innuttaasut 1,4%-ii misissorneqartullu Nuummeersut 226-it missaanniittut quliugaangata ataatsip uummataat akulikippallaamik tillilersartut, misissuinerit inerneria takutippaat. Misissortittut Nuummeersut ilarpaaluisa ajoqutaat aatsaat paasineqarpoq.
Nuummi misissuinermi peqataasut minnerpaamik 50-inik ukioqarput, ilisimatusartoq oqarpoq. Nuummi misissuinermi peqataasut tamarmik uummatip akulikippallaanik tillersarneranik uummammilluunniit nappaateqartut attavigineqarsimasut nakorsamullu innersuunneqarlutik aamma erseqqissarpaa.
Uummalluttut Europamisut amerlatigisut misissuineq tunngavigalugu Nadja Albertsen inerniliivoq.
Nadja Albertsen naapertorlugu uummatip akulikippallaamik tillilersarnera nuanniitsuusinnaavoq, aammali perulunnartunik nappaateqarnissamut, soorlu taqakkut milikartoornermik, puigortunngornissamut uummatillu sulilluarunnaarneranik kinguneqarsinnaalluni, navianaateqarnerulersitsisarpoq.
Kalaallit Nunaanni Peqqinnissaqarfik, Ilisimatusarfik, Dronning Ingridip Peqqissaavia, Dronning Ingridip Napparsimmavissua, Inuunerissaavik Steno Kalaallit Nunaat immikkullu suliniutini peqataasut tamaasa taassuma qutsavigai.
Suliniut Aalborg Universitetip Ilisimatusarfiullu suleqatigiinnerisigut ingerlanneqarpoq. Nadja Albertsen nakorsavoq peqqinnissamut tunngatillugu inuup inuiaqatigiillu pissusaannik Aarhus Universitetimi ilisimatusartoq. Kalaallit Nunaanni peqqinnissaq pillugu ilisimatusarnermik siuarsaanermik soqutigisaqaqatigiiffimmi (Grønlandsmedicinsk Selskab) ilaasortaq.
