KOMMUNE QEQERTALIK

Illoqarfinni nunaqarfinnilu eqqagarpassuit ikuallanneqarnissaat kissaatigineqarpoq

Kommunep eqqakkat isumagisinnaajunnaarsimavai, taama Kommune Qeqertalimmi Kommunalbestyrelsemi ilaasortaq Kristian Jeremiassen (IA) oqarpoq.

-Eqqagassarpassuit amerlassusii tupinnaqaaq, Kristian Jeremiassenip (IA) oqaatigaa.

Kommune Qeqertalimmi kommunalbestyrelsimi ilaasortaq Kristian Jeremiassen (IA) siunnersuuteqarpoq eqqakkanik ammasumik ikuallaasoqassasoq.

-Eqqagassat taama amerlatigisut ESANI-ip (Kalaallit Nunaat tamakkerlugu Eqqagassalerinermut piginneqatigiiffik) isumagisinnaanngilai, kommune poortuisuliullungu ukiorpassuit eqqakkat katersat kommunep nammassisinnaanngilai.

Siunnersuummi Kristian Jeremiassen ilaatigut allappoq Kommune Qeqertalimmi eqqakkat ikuallaanissaminnut Naalakkersuisut immikkut akuersissummik qinnuteqartariaqartut, eqqakkat poortorneqartarnerat ajornakusoornerulermat.

-Eqqagassarpassuit amerlassusii tupinnaqaaq, poortuivissarlu silaannarmiittoq nillertilaaraangat poortuisinnaajunnaartarpoq. Anartarfiup puukorsui bakterianik ulikkaartut tulukkut, teriannissat, niviukkat uumasullu allat ulorianartumik siammarpaat.

Avatangiisigissaarneq

Kommune Qeqertalik aamma Kalaallit Nunaat tamakkerlugu Eqqagassalerinermut piginneqatigiiffik ESANI A/S eqqakkanik isumaginnissinnaajunnaarput, Kommune Qeqertalimmi kommunalbestyrelsimut ilaasortaq Kristian Jeremiassen (IA) oqarpoq.

Kommune Qeqertalik Atassummik Inuit Ataqatigiinnillu suleqateqarsimavoq Kommune Qeqertalimmi politikkikkut suliassat, naleqartitat anguniagallu pillugit. 

Ingerlatsivimmi allassimavoq Kommune Qeqertalik Kalaallit Nunaat tamakkerlugu Eqqagassalerinermut piginneqatigiiffik ESANI A/S-imi piginneqataasoq, isumaqatigiissutigineqarlunilu Kommune Qeqertalimmi eqqagassalerinermut pilersaarutit sukkanerusumik suliarineqarnissaat.

Siorna Kommune Qeqertalik Avatangiisinut Aningaasaateqarfimmit eqqakkanik isumaginninnermik ineriartortitsinissamut suliniutinut 14-inut tapiissuteqarnissamut qinnuteqarsimavoq, maannali Kristian Jeremiassenip kommuni qinnuigissavaa ESANI A/S-imik isumaqatigiissutip saniatigut eqqakkanik ammasumik ikuallaanissamut immikkut akuersissummik Naalakkersuisunut qinnuteqaqqullugu, eqqakkanik isumaginninnissaq anguneqarsinnaajunaarmat. 

Kommune Qeqertalimmi kommunalbestyrelsi juunip 27-ani ataatsimiissaaq, siunnersuulli aatsaat ukiakkut kommunalbestyrelsip tullianik ataatsimiinnerani oqaluuserineqassasoq, Kristian Jeremiassenip oqaatigaa.

Powered by Labrador CMS