INATSISARTUT
Ilulissani peqqissartittussanut inissiisarfiliortoqassasoq Atassut siunnersuuteqarpoq
- Immikkoortortaqarfik Avannaani nakorsiat ineqarnissaat ersarissumik pisariaqartinneqarpoq. Nakorsiarpassuit Ilulissanut tikittarput nakorsartinniarlutik/katsorsartinniarlutik. Taamaammat Atassummiit isumaqarpugut pisariaqartitsinerup qanoq annertutigineranik aammalu peqqissariartut inissiassaannik sananermut ingerlatsinermullu atatillugu suut aningaasartuutaassanersut nalunaarusiortoqarnissaapisariaqarluinnartoq, Aqqalu C. Jerimiassen partiip siunnersuutaa pillugu oqarpoq.
Avannaani innuttaasut amerlasuut peqqissartittariaqaraangamik Ilulissat napparsimavianut innersuunneqartarput. Atassut isumaqarpoq maanna piffissanngortoq Ilulissani napparsimasunut inissiiviliortoqassasoq, kisianni Naalakkersuisut siunnersuut itigartinneqassaoq inassutigaat, 2023-mi peqqinnissaqarfik pillugu isumaqatigiissut innersuussutigalugu, isumaqatigiissummilu qitiusumik napparsimaviup Ilulissaniittup ineriartortinneqarnissaanut pilersaarutit arlallit ukiuni tulliuttuni suliarineqassammata.
Assi (toqqorsivik): Leiff Josefsen
Partii Atassut Inatsisartut aalajangiiffigisassatut siunnersuuteqarpoq, Peqqinnissaqarfik Region Nord patienthoteleqalernissaa pillugu Naalakkersuisut UPA2025-mut
agguaassassamik nalunaarusioqqullugit peqquneqassasut.
- Avannaani peqqissartut najugaqarfigisassaannik pisariaqartitsineq annertuvoq. Taamaattumillu
pisariaqartitsineq qanoq annertutiginersoq qulaajarumallugu, sanaartortoqassappallu qanoq nunatta
karsianut aningaasartuutaatigissanersoq, allallu paasissutissat pisariaqartussat qulaajarneqarnissaat
pillugu Naalakkersuisut nalunaarusiornissaat Atassummiit kissaatigaarput.
- Nalunaarusiornermilu suna akilersinnaanerpaajussanersoq ilanngunneqassaaq, pingaartumillu
angallannikkut, sanaartornikkut, sumilu peqqissartussap katsorsarneqarnissaa suliaritinnissaalu
akilersinnaanerunersoq, peqqissartumullu suna pitsaanerpaajussanersoq qulaajarneqassallutik, Atassummit tunngavilersuutigineqarpoq.
Fontain: Aalajangiinerni peqqinnissaqarfimmi isumaqatigiissutitigut eqqumaffiginninnissaq
Peqqinnissaqarfimmi napparsimasut ilaqutaasullu inissiisarfiisa ukiuni aggersuni allilerneqarnissaanik
pisariaqartitsinermik siunnersuuteqartoq Naalakkersuisunit isumaqatigineqartoq peqqissutsimut naalakkersuisumit aallarniutigalugu erseqqissarneqarpoq.
- Nunatsinni
napparsimasunut inissat ataatsimut isigalugu tatisimaneqartut Peqqinnissaqarfimmiit
ilisimatitsissutigineqarpoq. Tamanna Danmarkimi napparsimasut angerlarsimaffiini aamma atuuppoq, peqqissutsimut Naalakkersuisoq, Agathe Fontain akissummini erseqqissaavoq.
- Peqqinnissaqarfimmut immikkoortortaqarfinni ataatsimoorussamik ukiunut tulliuttunut qulinut
pilersaarusiortoqassasoq peqqinnissaqarfik pillugu 2023-mi isumaqatigiissummi Naalakkersuisunit
isumaqatigiinniartunillu allanit isumaqatigiissutigineqarpoq.
- Siunissami sanaartornissamut,
aningaasaliissuteqarnissamullu pisariaqartitsinerit, kiisalu peqqinnissaqarfimmi pisariaqartitsinerup
pingaaruteqartup naammassiniarnissaanut aningaasaliissutissat pisariaqartinneqartut
immikkoortortaqarfinnut pilersaarummi nassuiarneqassapput, Agathe Fontain akissuteqaammini ilanngullugu nassuiaavoq.
Napparsimasut akunnittarfii ukiuni tulliuttuni tallimani allilerneqassapput
- Napparsimasut akunnittarfii,
tamatumunnga Ilulissat ilanngullugu, ukiut tulliuttut tallimat iluini allilerneqassasut Peqqinnissaqarfik
pillugu isumaqatigiissummi ilanngullugu aalajangiunneqarpoq. Peqqinnissaqarfimmut 2024-mi
aningaasaliissutinit 35 mio. kr.-init immikkoortortaqarfinni sanaartornissamut pilersaarusiornissamut
2,5 mio. kr.-t aningaasaliissutitut Naalakkersuisunit immikkoortinneqarput.
- Aalajangersimasumik periuseqartumik utaqqiisaagallartumik ineqartitsinermut AI2024-mit
aningaasanik tamatuma saniatigut immikkoortitsisoqarpoq. Tamanna qitiusumik napparsimmavinni tamani napparsimasunut, erniartortunut qanigisaasunullu taamatullu sulisunut inissiigallarfittut
atorneqarsinnaappat periuserineqarsinnaavoq.
Atassutip aalajangiiffigisassatut siunnersuutaa siullermeerneqassaaq marlunngornermi oktobarip 22-ani.
