Immikkut ilisimasallit: Trumpip sakkortunerusumik oqariartuuteqarneq diplomatimit atorusunneruaa
Usha Vance Kalaallit Nunaannut angalanermini isumannaallisaanermut siunnersortimit Mike Waltzimit ilagineqarpat, kisimiilluni tikeraarnerminit tikeraarnera allaanerulluinnarpoq, immikkut ilisimasallit naliliipput. Tamannalu nunatsinni naalakkersuisunik isumaqatigiinniartoqarnerani pimmat USA-p tungaanit sakkortuumik iliuuseqarnertut isigineqarpoq.
Ulrik Pram Gad isumaqarpoq præsidentip nunap isumannaatsuuneranut siunnersortia Kalaallit Nunaannut angalaqataappat tikeraarneq pisortatigoortuunngitsutut taaneqarsinnaanngitsoq.
Assi: DIIS
Jyllands-Posten naapertorlugu USA-p præsidentiata tulliata J.D. Vancep nulia Usha Vance sapaatip-akunnerata tulliani Nuummut Sisimiunullu angalanermini amerikamiut isumannaallisaanermut siunnersortaannit Mike Waltzimit ilagineqassaaq. Nuuk Sisimiullu saniatigut aamma amerikamiut sakkutooqarfigisaat Pituffik tikeraassagaat aamma paasinarsivoq.
Tamannalu tikeraarnerup qanoq ittuuneqanik allannguisitsisoq, immikkut ilisimasallit marluk Sermitsiamit oqaloqatigineqartut oqarput.
Politikkikkut sammisaqarneq
Usha Vance kisimi aallartitatut siuttoralugu aallartitaasimagaluarpat, tamanna nunat tamalaat akornanni inussiarnernerusumik attaveqatigiinnermut tunnganerussasoq ikinngutinnerniarnermullu tunnganerussagaluartoq, Forsvarsakademimi ilisimatooq Peter Viggo Jakobsen naliliivoq. Taamatulli angalaneq sunniuteqangaartussatut nalilersinnaannginnerarpaa Trumpip maannakkut pissusilersoriaasia eqqarsaatigissagaanni.
Mike Waltzilli angalaqataanissaa nalunaarutigineqarmat tikeraarneq politikkikkut allatorluinnaq isummerfigineqartariaqarpoq.
– Pituffimmut Avannaata Qimussersuanullu tunngatillugu tikeraapat, taava politikkikkut ersarissumik sukannersumillu nalunaarutaavoq. Taamaaliortoqarneranilu USA-p oqariartornera paasiuminaatsippara, Kalaallit Nunaannummi pitsaasumik attaveqarniassagunik inussiarnernerusumik nalunaaruteqarunik isumatusaarnerusussaagaluarmat.
- Trumpili sakkortunerusumik oqariartuuteqarneq, nunat tamalaat akornanni ikinngutinnersumik saaffiginnittarnermit atorusunneruaa. Isumaqarpunga taama iliorneq taakkununnga iluaqutaanavianngitsoq. Maannakkuugallartoq Trump Naalagaaffeqatigiinnerup ikinngutigaa, Peter Viggo Jakobsen oqarpoq.
- Oqarsinnaanngilanga namminerisamik tikeraarnerusoq
Ulrik Pram Gadip, DIIS-imi ilisimatuup, Mike Waltzip tikeraartunut ilaaneranut tunngatillugu Peter Viggo Jakobsen isumaqatigaa.
- Usha Vance USA-mi præsidentinngortussatut qineqqusaarnerup nalaani oqaaseqarpallaanngilaq, præsidentinngortitsereernerullu kingorna ataasiaannarluni inuit innarluuteqartut timersornerannut tunngatillugu suliaqarsimavoq, suliaq ulorianaateqanngivissutut taaneqarsinnaalluni.
- Tassa nunat tamalaat inussiarnersumik torersumillu attaveqatigiinnissaanut tunngasutigut suliaqartutut taaneqarsinnaalluni. Tamassumalu takutippaa Amerikamiut naalakkersuisuiniittut ilaasa Trump Jr.-ip seniorillu sakkortunerusumik pissuseqartuusut Kalaallit Nunaannut iluaqutitaqannginnerat ilikkarsimarpasippaat. Præsidentilli nunami isumannaallisaanermut siunnersortaa Kalaallit Nunaannut tikeraaqataassappat angalaneq pisortatigoortuunngitsuusutut taaneqarsinnaanngilaq.
- Aamma sakkortunerusumik iliuuseqarnerusumik iliuuseqarnertut isigisariaqarpoq Kalaallit Nunaanni naalakkersuisussanik isumaqatigiinniarnerit nalaanni pimmat. Aammali siunertaasinnaavoq Kalaallit Nunaat kimilluunniit aqunneqannginneranik ersersitsiniutitut, Ulrik Pram Gad oqarpoq.
