Inuit Ataqatigiit neriniartarfimmi
Unicornimi partiip inatsisartunut qineqqusaarutai 13-inik
quppernillit sapaatip akunnerani kingullermi saqqummiuppai,
saqqummiussinermilu qinigassanngortittunit 39-nit amerlasuut aamma
najuupput.
- Namminiilivinnissaq naalagaaffinngornissarlu peqqissaartumik sulinissamik pisariaqartitsipput.
Inuit Ataqatigiit neriniartarfimmi
Unicornimi partiip inatsisartunut qineqqusaarutai 13-inik
quppernillit sapaatip akunnerani kingullermi saqqummiuppai,
saqqummiussinermilu qinigassanngortittunit 39-nit amerlasuut aamma
najuupput.
- Namminiilivinnissaq naalagaaffinngornissarlu peqqissaartumik sulinissamik pisariaqartitsipput.
Taama
siulittaasup Múte Bourup Egedep allarniutaa nipeqarpoq, tassanilu
aamma namminiilivinnissap naalagaaffinngornissallu qineqqusaarnermi
matumani initunera, aningaasaqarnikkullu nukittuumik
inissisimanikkut, ingerlalluartunik namminersorlutik
inuussutissarsiortoqarnermik inuiannillu nukittuunik tamanna
toqqammavilerumallugu sukumiisumik pitsaasumillu
sulisoqartariaqarnera oqaatigaa.
- Sanaartornermi, aatsitassarsiornermi aalisarnermilu aningaasaqarnikkut siuariarfissanik nutaanik ineriartortitsissaagut, ineriartornerli tamanna nunatsinnut, inuussutissarsiortortatsinnut inuusaatsitsinnullu naleqquttuussaaq, Múte Bourup Egede, siulittaasup tullianik Aqqaluaq Biilmann Egedemik aaqqissuussanermilu siulitaasup tullianik Nivi Heilmann Efraimsenimik nikorfaqateqartoq oqarpoq.
Ataatsimoorullugu
suliffeqarfissuaq
Aqqaluaq
Biilmann Egedep suliniutinik annertuunik nunatsinni
isumaginnissinnaajumalluni, ingerlatseqatigiiffiit arlallit
ataatsimoorussisinnaanerat pillugu Inatsisartut inatsisaannik
pilersitsinissaq qineqqusaarutigaa.
- Namminiilivinnissatta tunngavissaa pingaarneq tassaavoq aningaasaqarnermik imminut napatittumik pilersitsinissaq. Inuit Ataqatigiit aningaasaqarnermik nunatsinnit namminermit, imminut pilersornermit periarfissanillu nutaanik pilersitsinermik aallaaveqartoq pillugu sineriammi innuttaasunik suleqateqarnissamut piareersimapput.
- Aningaasaqarnerup nutaamik siuariartulernissaanut nunatsinni suliffeqarfinnik pioreersunik suleqateqarnissamut piareersimavugut. Namminiilivinnissaq nunamit allamit pilersinneqarsinnaanngilaq, uagut nammineq, innuttaasut suliffeqarfiillu tassani suleqataasariaqarpugut, Aqqaluaq Biilmann Egede oqarpoq.
Suliassat
annertuut siunissami suliarineqartussat suliffeqarfinnit
nunatsinneersunit suliarineqartarnissaannik, taanna isumaqarpoq.
- Suliassanik annertuunik, soorlu umiarsualiorfiliornerni, atuarfiliornerni mittarfiliornernilu , nunanit allaneersut isumaginnittunngortillugit sanaartortarneri unitsittariaqarpagut. Tamanna unitsillugu nunatsinni suliffeqarfiit pioreersut atulertariaqarpagut. Aningaasarpassuit maani nunatsinniittariaqarput sulisinneqarlutillu, soorluttaaq sulisartunit maanngaanneersunit aningaasarsiorfiussasut, taamaaliornermi siuariartorneq pilersinneqassaaq.
- Nuna nammineertoq innuttaminit pilersinneqartarpoq, inunnit nunanit allaneersuunngitsunit, Aqqaluaq Biilmann Egede oqarpoq.
Suliffeqarfiit
mikisut akunnattumillu angissusillit peqatigiissinnaasariaqarput
Inatsisartuni
partiit namminersorneq pillugu inatsimmik oqallisiginninnermut
atatillugu, inatsimmik nunatsinni suliffeqarfiit
ataatsimoorussillutik sanaartukkanik angisuunik, soorlu atuarfinnik,
inissianik suliniutinik il.il. ingerlatsisinnaanngortitsisoq
oqaluuserisimagaat, Aqqaluaq Biilmann Egedep nassuiaatigaa.
INUIT ATAQATIGIIT QINEQQUSAARUTAANNIT "PERIARFISSAGUT ISIVALUGIMEERSUT"
Inuuniarnermi atukkat ajorseriarnissaat
pinaveersaartinniarlugu partii, partiinik allanik atituumik
isumaqatigiissuteqarnissamik kissaateqarpoq, tassanilu ukiunut
arlalinnut atuuttussanik politikikkut isumaqatigiissusiornissaq
siunertaraat.
Partiit
saamerliit naligiinnginnermik piitsuussutsimillu akiuinissamik
anguniagaat kommunit peqatigalugit pissaaq, tassanilu inunnut
innarluutilinnut ikiorsiisarneq pillugu inatsimmik nutaamik
peqalernissaq sulissutigiumavaat, taamaalillutik taakku
pisariaqartitaminnik ikiorserneqarsinnaaqqullugit.
Meeqqat
atuarfiannut tunngatillugu nutaamik eqqarsarusupput, taamaalilluni
meeqqat atuarfiannit naammassinnittut ilinniarnissamut
piareersimasinnaaqqullugit. Ilinniartitaanermut tunngatillugu
aalisarnermi inuussutissarsiortut ilinniartitaanermi initunerunissaat
partiip qularnaarumavaa.
Assannik
kialaartunik peqqinnissaqarfimmilu atorfinitsitsiniarnermi
ajornartorsiuteqarnera nassuerutigaat, suliaqartunillu,
ilinniarfinnik kattuffinnillu peqateqarlutik
aaqqiissutissarsiorumapput.
Utoqqarnut
tunngatillugu utoqqalinermi soraarnerussutisiat qaffannissaat
utoqqalinersiallillu sulisut ileqqaartussaatitaanerat peerumavaat.
Peqqinnissamik
isumaqatigiissut piviusunngortikkiartorneqartoq suliniutillu
ingerlateqqikkumavaat, tassanilu ingammik inuit tarnimikkut
nappaatillit kræftimillu napparsimasut passunneqarnerat
pingaarnerutikkumavaat.
- Inatsit taanna suli naammassinngilaq, Naalakkersuisullu inatsimmik taamatut siunertaqartumik suliaqarnissaq suli amigaatigaat. Nunatta Karsia suliniutinut angisuunut millionerpassuarnik atuisarpoq, suliffeqarfiillu nunanit allaneersut maanngarlutik suliniutinik sanaartortarnera pissutigalugu aningaasat taakku nunatsinnit anninneqartarput.
- Kommunit nunattalu karsia aningaasarissaarnerulissappata, taava nunatsinni suliffeqarfinnik pilersitsisariaqarput, suliffissarsiortunik ikilisaalluta, atugarissaarnermillu pitsaanerusumik qularnaarinnilluta. Namminersortunngussagutta allatut iliorsinnaanngilagut. Suliffeqarfiit nunatsinniittut avaqqutaarsinnaanngilagut. Siuariarnermik pilersitseqataasariaqarpugut, sulisartukkormiullu suliffeqarnissaat qularnaarniarlugu allatut ajornartumik ingerlatseqatigiiffiit akileraarutaat appartariaqarparput. Tamanna alloriarnermi tullermi allatut ajornartumik suliarisariaqarparput, Aqqaluaq Biilmann Egede oqarpoq.
Múte
Bourup Egedep akileraartarnermik aaqqissuussinermik arlalinnik
aaqqissuusseqqinnermi siunnerfeqartumik tunuliaqutsiinertik
nassuiaatigaa, aaqqissuusseqqinnermilu alloriarneq tullermi
ingerlatseqatigiiffiit akileraarutaat qulaajaavigineqassaaq.
- Ingerlatseqatigiiffinnik ingerlatsineq oqilisaavigineqassaaq, ineriartortinnissaallu ajornaannerulersinneqassaaq, taamatullu sinaakkutaat qularnaarneqarlutik. Tamatumunnga piareersaatit suliaraavut. Inuit Ataqatigiillu partiinik allanik isumaqatigiissuteqarumapput, isumaqatigiissuteqarnermilu suliffeqarfinnut minnernut, akunnattumik angissusilinnut suliffeqarfinnullu angisuunut sinaakkutut pitsaanerusut pilersinneqassapput, akileraartarnermut inatsisit aporfiillu unammillersinnaalernissamut ineriartornissamullu aporfiusartut qulaajaavigineqarlutik, Múte Bourup Egede oqarpoq, ingerlatseqatigiiffiillu akileraarutaasa qanoq annertutigisumik apparnissaa erseqqissumik oqaatigiumanngikkallarpaa.
Aalisakkanik
avammut niuerneq annertunerusoq, nunattalu aatsitassarsiorfia
Aningaasaqarneq
namminersorlutillu inuussutissarsiortut nukittuut qularnaarniarlugit,
Inuit Ataqatigiit nunanik sanilerisatsinnik killilersugaanngitsumik
niueqateqarusupput.
Pisuussutit
uumassusillit inuiannit kalaallinit pigineqarnerat aalisarnermut
inatsimmi aalajangersarneqarpoq, Inuit Ataqatigiillu aalisarnermik
nukittorsaanissaq, taamaalillunilu nunatta aningaasaqarneranik
nukittorsaanissaq qineqqusaarutigaat.
”Royal
Greenland aqqutigalugu toqqaannartumik avammut niuerneq
annertusarniarparput”, qineqqusaarutini allassimavoq,
siulittaasulli Múte Bourup Egedep tamatuma qanoq piumaarnissaa
nassuianngilaa, tamannali Inuit Ataqatigiit pisortat
ingerlatseqatigiiffiini piginnittuunermik politikiannik
aallaaveqartoq erseqqissarlugu.
- Pisortat suliffeqarfiutaasa nunatsinni siammasissumik ineriartortitsinermik qularnaarinneqataanermikkut aamma innuttaasunut ilaqutaanissaat pingaarnerpaavoq. Matumani Royal Greenland kisimi pineqanngilaq, Namminersorlutilli Oqartussat aktiaatileqatigiiffii tamarmik pineqarput. Taakku tamarmik inuiaqatigiinni, nunami isorartuumi innuttakitsumilu pitsaasunik naligiiffiusumillu atugassaqarnissaq siunertaralugu, aalajangersimasumik suliassaqarlutik pilersinneqarnikuupput, Múte Bourup Egede oqarpoq.
Naalakkersuisut
aatsitassarsiornermut periusissiaq nutaaq, inuiaqatigiinnut
iluaqutaasussaq Inuit Ataqatigiit atuutilersikkusutaat
tusarniaassutigaat, nunattalu aatsitassarsiorfissaanik
pilersitsinissaq kissaatigaat.
- Nunatta aatsitassarsiortitseqatigiiffiutaanik pilersitsinissami maannakkoqqinnaaq suliffeqarfinnik 100-nik pilersitsinissaannarmut tunnganngilaq, ineriartortitseqatigiittariaqarpugulli. Aatsitassarsiorfinnit misilittagaqartariaqarpugut, aatsitassarsiornermummi iliniarfeqarsinnaanngilagut ilinniareernermi suliffissarsisinnaanngippata, Aqqaluaq Biilmann Egede oqarpoq.
Taamaammat aatsitassarsiorfinnik ineriartortitsinissap pilersinnissaa sulissutigaarput, soorunalumi nunanik allanik niueqatigiinnermi suleqateqartariaqarlutalu, ilinniartitaanermut tunngatillugu suleqateqartariaqarpugut. Nammineerluta misileraanngikkutta suliffeqarfinnit nunanit allaneersunit pinngortitatsinni pisuussutitsinnik iluaquteqalersussanit qaangerneqassaagut.
Naalakkersuisut tungaanit suliffeqarfimmik mikisumik pilersitsinissaq misilissavarput, inuussutissarsiummillu tassannga isertitaqarusulluta oqarluta, taamaalilluta isiginnaartuinnaajunnaassaagut. Taamatut inuussutissarsiortut sinneqartooruteqartannginnerat takoreerparput, naak taakku nunani allani milliarteerinngortitsisaraluartut. Nammineerluta suliassaq tigusariaqarparput peqataallutalu, namminiilivikkusuppugummi allanit isumalluuteqarunnaarluta, Aqqaluaq Biilmann Egede oqarpoq.
