POLITIKKI
Inuit innarluutillit pillugit inatsisissatut siunnersuut tusarniaassutigineqaqqippoq
Isornartorsiuisoqarnerata kingorna Naalakkersuisut aalajangerput inuit innarluutillit pillugit inatsissatut siunnersuut allannguuteqartillugu tusarniaassutigineqaqqissasoq. Tusarniaaneq ingerlanneqassaaq aggustip 28-ata tungaanut.
Inuit innarluutillit pillugit oqaaseqartartoq Anja Hynne Nielsen aamma Meeqqanut Inuusuttunullu Naalakkersuisoq Aqqaluaq Biilmann Egede (IA) inatsisissatut siunnersuut pillugu isumaqatigiinngissuteqarput. Maanna siunnersuut allanngortinneqarluni tusarniaassutigineqalerpoq.
Assiliisoq: Tilioq
Kommunit, peqatigiiffiit suliniaqatigiiffiillu minnerunngitsumillu inuit innarluutillit oqaaseqartartuat sakkortuumik akerlilersuipput, inuit innarluutillit pillugit inatisissatut siunnersuut siullermeerluni tusarniaassutigineqaarmat.
Inuit innarluutillit oqaaseqartartuat, inatisissatut siunnersuutup suliarineqarnerani suliassaqarfimmut aammalu inatsisitigut tunngavissaasut pillugit isummersuutiminik allannguuteqartikkusutaminillu inatsisissatut siunnersuut siulleq naammassineqarmat ataatsimilluunniit ilanngussisoqarsimannginneraalluni sakkortuumik isornartorsiuivoq. Kommuninit aningaasartuutissat amerleriarnissaannut matussitissanik ujartuipput aamma sulisussaaleqinerup annertuup atuunnerani ernumassuteqarput.
Naalakkersuisut aallaqqaammut inatsisissatut siunnersuut aalajangiusimagaluarpaat, taamaattorli maanna paasinarsivoq tusarniaanermi akissuterpassuit tunngavigalugit allannguuteqartitsisoqartariaqartoq, maannakkullu inatisissatut siunnersuutip allanngukkap tusarniaassutigineqarnera aallartinneqarpoq. Allannguutissatut siunnersuut manna naalakkersuisunit saqqummiunneqartup katersuuffigineqarsinnaanersoq piffissap takutikkumaarpaa. Qanorluunniilli ikkaluarpat illuatungeriit tamarmik isumaqatigiissutigivaat inunnut innarluutilinnut inatsit nutarsarneqartariaqartoq.
Inatsisissatut siunnersuummi siunertaasoq tassaavoq inuit innarluutillit amerlanerusunik pisinnaatitaaffeqalernissaat kiisalu inuit innarluutillit inuit pisinnaatitaaffiinit aamma kiffaanngissuseqarnissamut tunngaviusumik pisinnaatitaaffiinik tamakkiisunik pissarsisarnissaat aamma inuit innarluutillit namminersorsinnaanerulernissaasa, ataqqineqarnerulernissaasa naleqarnerulernissaasalu qulakkeerneqarnissaat.
Naalakkersuisut
Akissutit amerlassusaat tusarniaaqqinnermi aalajangiisuuvoq
Naalakkersuisut erseqqissaateqarput tusarniaanermi akissutit tiguneqartut amerlaassusaat eqqarsaatigalugu siunnersuutip naqqissukkap piffissami aalajangersimasumi tusarniutigineqarnera matumuuna piffissamut 30.07.2024-mit 28.08.2024-mut sivitsuiffigineqartoq. Taassuma saniatigut inatsisissatut siunnersuut Naalakkersuisut tusarniaanermut nittartagaat atorlugu piffissami tassanerpiaq aamma tamanut saqqummiunneqassaaq.
Taamatuttaaq Naalakkersuisut erseqqissaateqarput tusarniaanermi akissutit tigusat aalajangersakkat ataasiakkaat imartussusaannik inissisimaffiinillu allannguisillugit ilanngunneqarput, taamaalilluni siunnersuutip ilusaa paasiuminarnerulerpoq atuisunillu atoruminarnerulersinneqarluni.
Naqqissukkat ilaatigut makkuupput:
- Inuit innarluutillit tapersersorneqarnissaannut aamma inuit innarluutillit najugaqarfissaannik neqerooruteqartarneq pillugu nalunaarutit atorunnaarsinneqassanngillat, taamaattumik aalajangersakkat arlallit Inatsisartut inatsisissaattut siunnersuummit peerneqassapput.
- Siunnersuummi inatsisimmi tunngavissat ikkunneqarnikuupput, taakkua nalunaarutitut ilusilerlugit itinerusumik aalajangersaaffigineqarumaarput.
- Siunnersuutip kapitalii immikkoortoq 1-mi nalinginnaasumik oqaasertanut ikkussuunneqarnikuupput
- Aningaasatigut kingunissat nalilersoqqinneqarnikuupput aamma inatsimmi siusinnerusukkut massakkullu atuuttumi aalajangersakkat naapertorlugit suli aningaasatigut kinguneqartussaanngillat, taakkuami naalagaaffimmit tapiissutinit tamarmiusunit kommuninut nuussuinernut ilaareermata imaluunniit aningaasanut inatsimmi immikkoortinneqareernikuummata.
