INNARLUUTILINNUT INATSIT
Inuit innarluutillit pillugit inatsisissatut siunnersuut kommuninit annertuumik isornartorsiorneqarpoq
Inuit innarluutillit tapersersorneqarnissaat pillugu Inatsisartut inatsisaattut siunnersuut sukumiisorujussuaq, arlalissuartigut, pingaartumik kommuninit isornartorsiuisoqarnerata kingorna, misissoqqinneqarlunilu tusarniaassutigineqqinneqartussanngorpasippoq.
Assilisaq pisoqarfimmi innarluutilinnut sapaatip-akunnerani 2023-mi.
Assiliisoq: Leiff Josefsen
Kommunit tamarmik isumaqataaffigaat, inuit innarluutillit ikiorserneqarnissaannut inatsit piffissamut naleqquttumik nutarterneqartariaqartoq, taamaattorli inatsisissatut siunnersuut tusarniaassutigineqaqqammertoq, maannalu namminersorlutik oqartussanit suliarineqartoq naammagisimaanngilluinnarpaat.
Pingaartumik nalunaarutit inatsisissatut siunnersuummut ilanngunneqassasut Naalakkersuisunit siunnerfigineqarsimanera, sanaartornermi innarluutillit ilanngullugit eqqarsaatigineqartarnissaannik piumasaqaatigineqartut atorunnaarsinniarneqarnerat, Danmarkimi kiffartuussinermut inatsisip assilineqarsimanera, kiisalu aningaasartuutissat qanoq matussuserneqassanersut aamma sulisussaaleqineq qanoq matussuserneqassanersoq iluamik qulaajarneqarsimannginneri, kommunit tusarniaanermi akissutiminni apeqqusersorpaat.
Kommunit akuutinneqannginnerminnut pakatsipput
Kommunit, innarluutilinnut suliassaqarfik 2010-mi tiguaat, taamaattorli inatsisissatut siunnersuutip suliarineqarnerani naammattumik akuutinneqarsimannginnertik pillugu pakatsipput. Avannaata Kommunia kaammattuivoq inatsisissatut siunnersuut utertinneqassasoq:
- Avannaata Kommunianit inatsisissatut siunnersuut tikilluaqqussallugu pissutissaqanngitsutut nalilerneqarpoq. Ersarippoq inatsisissatut siunnersuut pipallalamik piffissaqarpiaranilu suliarineqarsimasoq aamma Kalaallit Nunaanni pissutsinut ilisimasaqarpianngitsunit suliarineqarsimasutut isikkoqarluni, taama Avannaata Kommunia akissummini oqarpoq.
Taamatut naliliinermi pingaartumik inatsisissaq taamatut iluseqarluni atuutilersinneqassappat suliassat amerleriarujussuarnissaat aammalu sulisussat pisariaqartinneqartut amerlinissaat tunngavilersorneqarluanngitsutut Avannaata Kommunianit innersuussutigineqarpoq.
Kommuneqarfik Sermersuup tungaanit isornartorsiorneqarpoq inatsissap aamma nalunaarutitit inatsimmut attuumaasut ataatsimut allanneqarsimanerat :
- Kommuni isumaqarpoq nalunaarutit inatsimmut ilanngullugit suliarineqarnerat inatsimmik atugaqarnissamut aamma atuarnissamut ajornarnerulersitsisoq. Tassuma saniatigut inatsimmut allannguutinik aamma ilanngussanik kingusinnerusukkut suliaqarnissaq ajornarnerusarpoq, nalunaarutinut sanilliullugu, taama Kommuneqarfik Sermersooq akissummini tikkuaavoq.
Kommune Qeqertalik, Kommune Kujalleq kiisalu Qeqqata Kommunia aamma isornartorsiuipput inatsisissap aammalu nalunaarutit ataatsimut allanneqarnerat pillugu.
Qeqqata Kommunia aamma Kommune Kujalleq isumaqarput aamma inatsisissatut siunnersuummi ajornartorsiutit annersaat tassaasoq danskit kiffartuussinermut inatsisaannit ilaarsiinnavilluni inatsisissamut ikkussuisoqarsimanera, massa Kalaallit Nunaanni aamma Danmarkimi pissutsit assigiinngilluinnaraluartut.
Kingunerisassat pillugit paasissutissat amigaataasut
Inatsisissatut siunnersuut kommuninut akisussaaffeqarnerulernissamik suliaqarnerulernissamillu siunertaqarpoq. Kisianni kommuninit missingersuutit aningaasaqarnikkullu aqutsinermut kingunerisassat pillugit naatsorsuutit piviusorsiortut amigaataapput.
Kommunit erseqqissaatigaat, inatsisissatut siunnersuut taamak iluseqarluni akuersissutigineqassappat aningaasaqarnikkut aningaasartuutit amerlanerulernissaat pineqaannarani aammali sulisussaaleqinermik suli annertunerulersitsissasoq.
Kommuneqarfik Sermersooq assersuutigalugu erseqqissaavoq, ikiorsiissutissatigut periarfissat amerlineqarneri, qanigisat akissarsiaqarlutik isumaginnissinnaalernissaat, ilaquttanut tikeraarnerit, inatsisip atuutsinneqarneranut aningaasartuutit amerlanerit, it-mut aaqqissuussineq nutaaq, neqeroorutit nalinginnaasut, allallu neqeroorutit amerlineqarnerisigut naammaginartumik ersarissumillu saqqummiunneqanngitsut.
Innarluutilinnut kinguaassiutitigut allatigullu innarliisarnerit pinaveersaartinneqassasut tamanit isumaqatigiissutigineqarpoq
Inatsisissatut siunnersuummi ataatsimut isumaqatigiissutaasoq tassaavoq innarliisarnerit, soorlu kinguaassiutitigut innarliisarnerit allallu innarliisarnerit, pinaveersaartinneqarnissaat.
Taamaattorli Kommune Qeqertalimmit tikkuarneqarpoq ernumassutaasinnaasut pillugit uuttortaatit pillugit ersarissumik nassuiaateqartoqartariaqartoq. Tassani innarluutilinnik paarsinerlunneq, persuttaaneq kinguaassiutitigullu innarliisarnerit pinngitsoortinneqarnissaat inatsisitigut ersarissarneqarnissaa piumasarineqarluni.
Kommune Kujalleq siunnersuuteqarpoq inuit innarluutillit sullinneqarneranni innimiilliorfigineqartannginnissaat annerpaamik qulakkeerneqaqqullugu ataatsimoortumik upalungaarsimanermut pilersaaruteqalernissaq, ataatsimoortumik iliuusissatut pilersaaruteqalernissaq aammalu ataatsimoortumik suleriaaseqalernissaq misissorneqassasut.
