NUNANIT ALLANIT
Iran nutaamik præsidentitaarpoq Raisip toqunerata kingorna
Masoud Pezeshkian præsidentissatut sassarnissaminut akuerisaasut akornanni ingasattajaarniannginnerpaavoq.
Iranip præsidentia nutaaq, Masoud Pezeshkian (talerperleq), uani takuneqarsinnaavoq Iranip qullersaata, ayatollah Ali Khameneip tunuani issiasoq, præsidentitaarlu marlunngornermi qinigaaffimminik aallartitsivoq.
Assi: -/Ritzau Scanpix
Iranip præsidentertaava, Masoud Pezeshkian, marlunngornermi Iranip inatsisartunit uppernarsaatinneqarpoq.
Pezeshkian præsidentimut qinersinermi juulimi ingerlanneqartumi ajugaavoq.
- Præsidentitut, Koranip illernartup Iranillu innuttaasa saavanni, Guutimut pissarsuarmut nalunaarutigissavara, inuiaqatigiinni upperisarsiorneqaamma Iranip islamiortutut naalagaaffiunera nunallu tunngaviusumik inatsisai illersorlugillu paarissagakkit, Pezeshkian persuarsiorluni nalliuttorsiornermi neriorsuivoq, pisorlu Iranimi tv-kkut tamarmiusumi aallakaatinneqarpoq.
Taanna præsidentissatut, Vogternes Rådimit akuerisaalluni sassarsinnaatitaasut akornanni ingasattajaarniannginnerpaajusutut isigineqarpoq.
Qinersinermi immikkoortut aappaani aalajangiiffiusumi, qanganisarsiortoq Saeed Jalili taassuma ajugaaffigaa.
69-inik ukiulik Pezeshkian uummatip nakorsaraa aamma politikeriuvoq misilittagaqarluartoq. Ilaatigut qineqqusaarutigaa nunarsuarmioqatigiinnut attaveqarnerup pitsanngorsarnissaa aamma arnat nasartaateqartussaatitaanerat piumasaqaataajunnaassasoq.
Israelip illuatungaanilu palæstinensisk Hamas-bevægelsep, Iranimit tapersersorneqartup akornanni sorsunnerup qanoq inissisimaffiginissaa præsidentinngorlaamut apeqqutaaqisut ilagaat.
- Palæstinap naqisimaneqaqisup naalagaaffittut kiffaanngissuseqarluni inissisimasup illersorneqarnissaa sakkortuumik nanginneqassaaq, Pezeshkian ataasinngornermi oqarpoq.
Ataasinngornermi præsidentitut ivertitsinermi, Iranimi Inatsisartunut siulittaasoq Mohammad Bagher Ghalibaf oqalugiarpoq, tassanilu Israelip "pinerluttuliorneri" Gazastribenimi isornartorsiorpai.
- Israelimiut perloqqusaalik, Amerikamiut perloqqusaalik, Inatsisartuni ilaasortat arlallit suaartarput.
Pezeshkianip ataasinngornermi mianersoqqussuteqarpoq, Israelip saassussinini annertusarniaraa Libanon ilanngullugu saassussinissaminut piareersarnerarlugu, tassanngaanniit Hizbollah-bevægelsen Israelimut qaartartunik igeriussisarpoq.
Taama pisoqassappat "sakkortuumik kingunerlutsitsisinnaavoq", Iranimi præsidentinngorlaaq oqarpoq.
Marlunngornermi præsidentinngorlaap ivertinneqarnerani naalagaaffiit allat naalakkersuisuisa siulittaasui siuttuilu najuupput, ilaatigut Egypten, Armenien, Saudi-Arabien, Sudan, Irak, Tyrkiet kiisalu Cuba aamma Brasilienimeersut.
Taanna tassaavoq Iranip Kunngiitsuuffiup 1979-mili pilersinneqarneranit præsidentit qulingiluassaat, tassanngaanniillu shahip aqutsinera palasiunernit aqutsisunit taarserneqarnikuupput.
Pezeshkianip Ebrahim Raisi kingoraarpaa, taanna qulimiguulimmik majimi ajutoornermi kingorna toqummat.
Siulittuutigineqareerpoq Pezeshkian-ip, siuarsaarusuttup aaqqissuusseqqikkusuttullu, qinerneqarnermi kingorna allannguingaarsinnaanissaa naatsorsuutigineqassanngitsoq.
Kisianni taassuma qinerneqarnera sunniuteqarsinnaavoq kina pisinnaatitaassanersoq Iran-imi qullersaasup 85-inik ikiullip ayatollah Ali Khamenei-p kingorna kingoraartaasinnaajumaarnersoq, taanna Iramini ukiuni qulikkaani pingasut sinnerlugit oqartussaanerpaatut inissisimavoq.
Ulluinnarni politikkikkut ingerlatsinermut præsidenti sunniuteqarpoq, Khamenei-lli tamakkiisumik nunap pingaaruteqartuni suliassani tamani oqaasissaqarnerpaavoq.
Khamenei aamma tassaavoq Iranimi sakutooqarnikkut qullersatut inissisimasoq.
/ritzau/AFP