Nalunaaquttap aalajangersarneqarnera attatiinnarnialersaarneqarmat akerliussutsimik takutitsinissamik kajumissaarisoq

Inatsisartut nalunaaquttat ingerlaaqatiffii UTC-3-mut uterteqqinneqarnissaa, tassa 2023-mi marsimi allannguisoqartinnagu atorneqartumut, sapaatip-akunnerani matumani oqaluuserissavaat. Aasaanerani nalunaaqutaq aamm atorunnaarsinneqassanersoq oqaluuserineqassalluni.

Siunnersuutit Inatsisinut Ataatsimiititaliamut ingerlateqqinneqarnikuupput, nalunaaqquttallu ingerlaaqatigiiffii attatiinnarneqassasut maanna innersuussutigineqarluni. Aasaanerani nalunaaqutaq atorunnaarsinneqassasoq ataatsimiititaliami amerlanerussuteqartut aamma kissaatigaat.

Ataatsimiititaliami amerlanerussuteqartut aasaanerani nalunaaqutaq 2027-mi  januaarip aallaqqaataaniit imaluunniit kingusinnerpaamik 2028-mi januaarip aallaqqaataani atorunnaarsinneqarnissaa kissaatigineqartoq isumaliutissiissumminni allapput. Taakku kissaataat Naalakkersuisut marlunngornermi isummerfigissavaat.

Naalakkersuisut aasaanerani nalunaaquttap atorunnaarsitsinnagu EU-mi atorunnaarsitsisoqarnissaa utaqqeqqaarneqassasoq isummeqqaarnikuugaluarput. Kalaallit Nunaanni aasaanerani nalunaaquttamik atorunnaarsitsineq, Danmarkimut Europamullu nalunaaquttat ingerlaaqatigiiffiisa nikinganerat akunnermik ataatsimik ilaneqaqqinneranik kinguneqassaaq.

Ataatsimiititaliami amerlanerussuteqartut tassaapput partiit naalakkersuisooqatigiit Demokraatit, Inuit Ataqatigiit aamma Atassut. Naleraq illuatungiliuttuuvoq ataatsimiititaliamilu amerlanerussuteqartut tapersernagit.

Politikeriusimasoq akerliussutsimik takutitsiniartoq

Politikeriusimasup Qupanuk Olsenip ataatsimiititaliap isumaliutissiissutaa Inatsisartuni marlunngornermi oqaluuserineqartinnagu, ataasinngornermi ullup-qeqqanut akerliussutsimik takutitsinissamik kajumissaaruteqarpoq.

- Nalunaaqutap UTC -3-mut utertinneqarnissaa nikisissaarneqarnissaalu amerlaqisugut kissaatigigipput Inatsisartunut takutinniarlugu, Qupanuk Olsen Facebookimi allappoq.

Facebookikkut saqqummiussaa 393-eriarluni siammarterneqarpoq, taannalu piffissaq pillugu oqallinneq inuppassuarnit soqutigineqartoq erserpoq.

Qupanuk Olsen Inatsisartunut 2025-mi qinerneqarpoq, anguniakkanilu pillugu maluginiarneqarluni: Nalunaaquttat ingerlaaqatigiiffigisimasaanut uteqqinnissaq. Qupanuk Olsen Inatsisartunut kingorna ilaasortaajunnaaluni Sisimiuni KTI-mi, Tech College Greenlandimi, pisortanngorpoq. 

Ataatsimiititaliap inuussutissarsiortut isummernerat maluginiarpaa

Nalunaaquttat ingerlaqatigiiffiannut allamut ikaarsaariarnermut aammalu aasaanerani/ukiuunerani nalunaaquttamut ikaarsaariarnermut atatillugu innuttaasunut ataasiakkaanut malunnaatilimmik sunniutit inuit namminneq isumaannut annertuumik tunngassuteqartut ataatsimiititaliamit maluginiarneqarpoq.

Kiisalu pitsaasumik kingunerisinnaasaanut ersarissumik uppernarsaatissaqanngitsoq allassimavoq.

Ataatsimiititaliap inuussutissarsiutilinnut takornariartitsinermullu aningasaqarnikkut kingunerisassat tusarniaanermit akissuteqaatigineqartuni arlalinni eqqumaffigeqquneqartut aamma maluginiarpai.

- Pingaartumik Air Greenland nalunaaquttat ingerlaqatigiiffiannut siornatigut atuuttumut uternermi eqqornerlunneqartussatut naatsorsuutigineqarpoq, tamatumalu pingaartumik nunatsinni angalanermi bilitsit akiinut aamma sunniuteqarnissaa naatsorsuutigineqarsinnaasoq, Inatsisinik Ataatsimiititaliaq isumaliutissiissummini allappoq.

UTC-3-mut uternissamik siunnersuut atorunnaarsinneqarluni, aasaaneranilu nalunaaquttap atorunnaarsinniarlugu siunnersuutit akuerineqassappata, Europamiit Danmarkimiillu aasaanerani nalunaaqutaq akunnernik tallimanik nikingalissaaq. Tamanna Kalaallit Nunaata Europami Danmarkimilu pingaarnertut niuerfiinut toqqaannartumik ajoqusiissasoq, Sulisitsisut isumaqartut, isumaliutissiissummi allassimavoq.

Naleraq akerliliivoq

Partiip illuatungiliuttup Naleqqap ikinnerussuteqarluni oqaaseqaammi ataatsimiititaliami amerlanerussuteqartut aalajangiinerat akerlilerpaa.

Air Greenlandip nassuiaataa, tassa nalunaaquttap allanngortinneqarnerata billetsit akisunerulissutigissagaat, Naleqqap akueriumanngilaa:

"Naleqqap maluginiarpaa, inatsisissatut siunnersuummi, amerlanerussuteqartut itigartitiniarnerminnik ilaatigut tunngavilersuutigigaat, Air Greenlandip oqariartuutigigaa nal UTC-3-mut utertinneqassappat aningaasanik annaasaqartussaallutik, uffa Air Greenlandip uppernarsarsimanngikkaaa UTC-2-mut ikaarsaarnermi isertitaqarnerulersimallutik. Timmisartornermik angallassinikkut billetit takuunnaraanni, nalunaaqutap allanngornerani akikillinngillat. Taamaakkaluartoq suliffeqarfiup UTC-3-imut uternerup kingunerisaanik isertitassanik annaasaqarsinnaaneranik oqariartuuteqarnera ataatsimiititaliami amerlanerussuteqartuniit itigartitinissaminnik annertuumik tunngavilersuutigineqarpoq," Naleraq allappoq, nangillunilu:

"Atlantikoq qulaallugugooq timmisartuussinermi sulisut pilersaarusiornerlu Danmarkimi najugaqarusummata - allaannginnami nunatsinni innuttaasut tamarmik, Air Greenlandip aaqqissuussineranut naleqqussassagut, uffa suliffeqarfik kalaallit aallaavigalugit aaqqissuussaanini naleqqussartussaagaa."