PINNGITSAALIISSUMMIK ARSAARINNINNERMUT SULIAQ
Ivana ajugaasoq
Ivana Nikoline Brønlundip anaanasunut qitornaannullu angerlarsimaffimmiilersinnaanermik piumasaqaateqarnera Naammagittaalliuuteqartarfiup taperserpaa. Aviaja-Luunap inunngorneraniit arsaarinnissutigineqarnissaanik Høje-Taastrupimi aalajangiineq taamaalilluni Naammafittaalliuuteqartarfimmiit allanngortinneqarpoq.
Ivana Nikoline Brønlundip panini tigoqqittussanngorpaa. Høje-Taastrups kommunemi aalajangiineq Naammagittaalliuuteqartarfimmit allanngortinneqarpoq, taamaalilluni Ivana paninilu anaanaasunut qitornaanullu angerlarsimaffimmiilissapput imminnullu ilinniartussanngorlutik.
18-inik ukiulik Ivana Nikoline Brønlundip pania Aviaja-Luuna augustip aqqarngani inunngorneranit nalunaaquttap-akunnera ataaseq qaangiuttoq Høje-Taastrup Kommunemit arsaarinnissutigineqarpoq.
Angajoqqaat piginnaaneri pillugit misissuinermut atatillugu tarnip pissusaanik misissuutit tunngavigalugit arsaarneqarnissaa aalajangerneqarpoq, tamannalu inatsimmik unioqqutitsineruvoq. Kommunimmi maajip aallaqqaataanit ilaqutariit kalaallinit kingoqqisut tarnip pissusaanik misissuutinik nalilersoqqusaajunnaarnikuuaat.
Ministerimit isorineqartoq
Høje-Taastrup Kommunep suliamik ingerlatsinera isumaginninnermut ineqarnermullu ministerimit Sophie Hæstorp-Andersenimit isornartorsiorneqarpoq, taassumalu kommuni qanoq pisoqarsimaneranik nalunaarusioqqullugu qinnuigaa.
Suliaq Naammagittaalliuuteqartarfimmi septembarip 17-ianni suliarineqarpoq, tassanilu Ivana Nikoline Brønlund eqqartuussissuserisualu Jeanette Gjørret taperserneqarput.
Sermitsiap paasissutissaatai naapertorlugit Ivana Nikoline Brønlund panialu Aviaja-Luuna piffissami tulliuttumi anaanap meeqqallu angerlarsimaffianni imminnut ilinniassapput.
Aalajangiineq tusaatissatut tiguneqartoq
Taamaasilluni Meeqqanut Inuusuttunullu Ataatsimiititami pinngitsaaliissummik arsaarinninnissamik aalajangiineq Naammagittaalliuuteqartarfiup allanngortippaa. Aalajangiineq tusaatissatut tiguneqartoq Høje-Taastrup Kommune tusagassiutitigut nalunaarummi allappoq.
- Aalajangiisoqarnissaa qilanaarisimavarput, soorunamilu Naammagittaalliuuteqartarfiup aalajangiinera tusaatissatut tigussavarput ingerlaannarlu iliuuseqassalluta.
- Naak suliaq malinnaavigineqangaatsiaraluartoq tusagassiuutitigullu annikitsualuit saqqummiunneqaraluartut suli nipangiusimasussaatitaavugut, taamaattumik suliami qanorpiaq pisoqarnersoq oqaatigisinnaanngilarput. Naalungiarsuk ilaqutaasullu tapersersornerat ingerlateqqiinnassallugu taamaallaat oqaatigisinnaavara, meeqqanut inuusuttunullu isumaginninnermut pisortaq Anya Krigh Manghezi oqarpoq.
Høje-Taastrup Kommunep suliaq tamanna tunngavigalugu innuttaasup kalaallisut tunuliaqutaqarnera pillugu apersorneqartarnissaanik suleriuseqalerneq qulakkeerpaa. Taamaalilluni meeqqanik inuusuttunillu kalaallinut attuumassuteqartunik arsaarinnissuteqarnissamik suliaqarnerni tamani VISO akulerutsinneqartalerpoq, kommuni allappoq.
