1982-imi innuttaasut 53 procentii EF-imit aniniarlutik taasipput. Taamaalilluni Kalaallit Nunaat nunani siullersaalluni kingorna Europæiske Unioninngortumit anivoq.
Tamannali eqqarsaatigeqqinnissaanut piffissanngorsimagunarpoq. Justus Hansen (D) taama isumaqarpoq. Taamaattumik EU-mut ilannguteqqinnerup ajunngitsortarisinnaasai ajoqutissartaalu pillugit nassuiaasiortoqassanersoq Inatsisartunut aalajangiiffigisassatut siunnersuuteqarpoq. Nalunaarusiaq sulinerup ingerlateqqinnissaanut atorneqarsinnaasumik kinguneqassaaq.
1982-imi innuttaasut 53 procentii EF-imit aniniarlutik taasipput. Taamaalilluni Kalaallit Nunaat nunani siullersaalluni kingorna Europæiske Unioninngortumit anivoq.
Tamannali eqqarsaatigeqqinnissaanut piffissanngorsimagunarpoq. Justus Hansen (D) taama isumaqarpoq. Taamaattumik EU-mut ilannguteqqinnerup ajunngitsortarisinnaasai ajoqutissartaalu pillugit nassuiaasiortoqassanersoq Inatsisartunut aalajangiiffigisassatut siunnersuuteqarpoq. Nalunaarusiaq sulinerup ingerlateqqinnissaanut atorneqarsinnaasumik kinguneqassaaq.
- Aalajangiinissamut sakkussaqarnerulerniassagatta imaluunniit nunarsuarmi pissutsit eqqarsaatigalugit isiginniittaatsit amerlanerusut paasisinnaanerulerniassagatsigit. Canadamut, USA-mut, Amerikap avannaanut Europamulluunniit samminerusariaqassanerluta. Taamaattumik EU-mi ilaasortanngorsinnaanerup eqqartornissaa pissusissamisoorpoq, oqarpoq.
Kalaallit EU-mut ajunngitsumik isiginnittaaseqarnerulersimasut misissuinerni nutaanerusuni paasinarsisoq, Justus Hansenip tikkuarpaa.
Namminerlu iluaqutissarpassui takusinnaavai.
- EU-mut tapersersuivunga. Nalunngilarami ineriartornermut tapiissutaasartut qanoq amerlatigisinnaanersut. Amerlangaarput, tamannalu maani pisariaqartipparput. Danmarkimiit ataatsimoortumik tapiissutit kisiisa isumalluutigalugit kivissinnaanngilarput. Naammanngillat.
Kalaallit Nunaat 2021-miit 2027-mut EU-mit 1,7 milliardit koruuninik tapiiffigineqareerpoq. EU-kommissionimiillu aningaasat marloriaataat sinnerlugit aappaagumiit tapiinialersaartoqarpoq. Aningaasat ilinniartitaanermut, aatsitassanut nukissiuutinullu mingutsitsinngitsunut pingaarnertut atorneqassapput.
Tamatuma saniatigut Kalaallit Nunaat EU-lu aalisarneq pillugu isumaqatigiissuteqarput, 2025-miinnaq 129 millionit koruuninik naleqartunik aningaasartaqartunik.
Nunat pissaanilissuit akornanni inuiaat ikittunnguit
Justus Hansen 2016-imi assingusumik Inatsisartuni siunnersuuteqarpoq, maannali siunnersuuteqaqqinniarluni aalajangerpoq.
Ingammik nunarsuarmi matumani pissutsit ilungersunartut eqqarsaatigalugit.
– Aamma Ukrainemi ukiuni pingasuni sorsuttoqarnera eqqarsaatigalugu, EU-p ataaniilernissaq isumaqarsinnaavoq.
Aammattaaq USA-p Kalaallit Nunaat soqutiginninnerujussua, Justus Hansenillu oqarnera naapertorlugu matutsinnut kasuttornerat.
- Maanna nunarsuarmi politikkikkut pissutsit ilungersunartut eqqarsaatigalugit, EU-mut ilaasortaalerneq tatisisoqarallaarunnaarneranik kinguneqarsinnaavoq.
Kalaallit Nunaat Naalagaaffeqatigiinneq aqqutigalugu EU-mut attuumassuteqareeraluartoq siunissamili Kalaallit Nunaata namminiilivinnissaa eqqarsaatigalugu maannakkut ilaasortanngornissamut alloriarnerit siulliit iliuuserinissaat isumassarsiatsialaasoq Justus Hansen isumaqarpoq.
Taasititsisinnaaneq siunissami aatsaat pissasoq
EU-mulli ilannguteqqinnissap iluaqutissartai ajoqutissartaalu pillugit nalunaarusiortoqareerneranit ilannguteqqinnissamut alloriarnissaq ungasittoq, Justus Hansen isumaqarpoq.
- Nalunaarusiaq pissarsiarineqareerpat quppernerillu qulit atuareerutsigit taasititsinissaq kissaatiginngilara. Piffissami sivisuumi tamanna pissaaq, paasititsiniaanikkut, innuttaasunik ataatsimiititsinernik allanillu, innuttaasut aalajangiinermut peqataatinneqarnerunerisigut. Soorunami aamma EU ilisimasaminik avitseqateqarlunilu tikeraarnerussasoq naatsorsuutigaara.
Siunnersuutini piviusunngortinnissaa neriuutigalugulu naatsorsuutigaa, nalunaarusiarlu naammassippat politikerit innuttaasullu siumut isigilernissaq angorusuppaa.
- Periarfissaqarluarpugut, tamannalu EU-p nalunngilaa. Nalunaarusiarli EU pillugu paasissutissanik annertunerusunik imalik iluaqutigalugu periarfissatta atornissaat pitsaanerussaaq, Justus Hansen oqarpoq.
Siunnersuut Inatsisartut sisamanngornermi oktobarip aappaanni siullermeerlutik oqaluuserissavaat.
