DANMARKIMI PINNGITSAALIISSUMMIK ARSAARINNITTARNEQ
Kalaallit Nunaat pillugu ataatsimiititaliap ataatsimiinnerani akerliussutsimik takutitsineq
Danmarkimi kommunit qallunaanut misissuutinik angajoqqaanut kalaallinut atuisarnerat pingasunngornermi akerliussutsimik takutitsissutigineqaqqippoq. Akerliussutsimik takutitsisut Keira Alexandra Kronvold ilagaat, taanna panimminik inoorlaamik pinngitsaaliissummik arsaarneqaqqammerpoq. Folketingimi Kalaallit Nunaat pillugu ataatsimiititaliap meeqqanik angerlarsimaffiup avataanut inissiisarneq pillugu ataatsimiinnerata nalaani akerliussutsimik takutitsineq pivoq
Kalaallip Keira Alexandra Kronvoldip Thistedip napparsimmaviani panissaarneranit kingornalu kommunimit pinngitsaaliissummik arsaarneqarneranit ullut 13-it aatsaat qaangiupput. Taanna angajoqqaat kalaallit allat pinngitsaalisaallutik arsaagaanikut peqatigalugit Christiansborgip pingasunngornermi saavaniippoq. Arsaagaasimaneri qallunaanut misissuutigineqartartunik, angajoqqaatut piginnaasanik misissuinermut ilaasunik, ilaatigut tunngaveqartunik pissuteqarput.
Inuit pisinnaatitaaffiinik unioqqutitsineq
Akerliussutsimik takutitsinerup nalaani Folketingimi Kalaallit Nunaat pillugu ataatsimiititaliaq ataatsimiippoq, tassanilu kommunit qallunaanut misissuutigineqartartunik atuinerat oqaluuserineqarpoq. Peqatigiiffiit MAPI, SILA 360 kiisalu Peqatigiiffik Kalaallit Meerartaat oqalugiarput. Taakkua saniatigut Syddanskip Ilisimatusarfiani Pisuni ilungersunartuni tarnip qisuariaataanik ilisimasaqarfimmi professori Ask Elklit oqalugiaqqusaasunut ilaavoq.
Misissuutit oqaatsinut kulturimullu naleqqussarneqareernissaasa tungaanut qallunaanut misissuutit angajoqqaanut kalaallinut atorneqartarnerat unitsinneqassasoq politikkerinut oqariartuutigalugu Sermitsiamut kingorna oqaatigaa.
– Qallunaanut misissuutinik atuisarneq angajoqqaanut kalaallinut pisinnaatitaaffiinik unioqqutitsineruvoq, Ask Elklit oqarpoq.
Misissuutit erngertumik ataatsimiissutaasut
Danmarkimi isumaginninnermut ineqarnermullu ministeri Sophie Hæstorp Andersen (S) aamma Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede (IA) tallimanngornermi ataatsimeeqatigiipput.
Kalaallit ilaqutariit angajoqqaatut piginnaaneri kommunimit misissuiffigineqaraangata qallunaanut misissuutit atorneqartarunnaassasut qallunaat ministeriata neriorsuutigigaa Aqqaluaq B. Egede ataatsimiinnerup kinguninngua oqarpoq.
– Taamaappat kommunit akisussaafferujussuaq tigussavaat, tassami inuit pisinnaatitaaffiinik aamma unioqqutitsineruvoq. Tamannalu kommunit ikittuinnaat akuerisinnaavaat, Syddanskip Ilisimatusarfiani pisuni ilungersunartuni tarnip qisuariaataanik ilisimasaqarfimmi professori Ask Elklit Kalaallit Nunaat pillugu ataatsimiititaliami pingasunngornermi oqalugiartoq oqarpoq.
Trine Juncher Jørgensen
Sophie Hæstorp Andersenilli ataatsimiinneq tunngavigalugu ullut sisamat qaangiummata oqaaseqaataa taama erseqqitsiginngilaq, taannami "kommunit ilaqutariinnik kalaallisut tunuliaqutaqartunik suliaqarnerminni misissuutit isornartorsiorneqangaatsiartut atorneqartarnerisa unitsinneqarnissaat kaammattuutigerusullugu" oqarpoq.
Kommunit ajornartorsiulissasut
Ministeri ima nangilluni oqarpoq "Danmarkimi borgmesterinut tamanut maanna allagaqarlunga kommunit suliani ataasiakkaani ilaqutariit ataatsimut, matumani kalaallisut oqaaseqarnerat kultureqarnerallu eqqarsaatigalugit angajoqqaatut pisinnaasat qanoq qulaajarneqarnissaat naleqqunnersoq aalajangiiffigissagaat inassutigalugu peqquniarpakka“.
Kommunilli kalaallinut ilaqutariinnut qallunaanut misissuutit atuunnarniarlugit aalajangerunik ajornartorsiulissasut professori Ask Elklit isumaqarpoq.
– Taamaappat akisussaafferujussuaq tigussavaat, tassami inuit pisinnaatitaaffiinik aamma unioqqutitsineruvoq. Tamannalu kommunit ikittuinnaat akuerisinnaavaat.
