Kalaallit Nunaata, Danmarkip aamma Tysklandip akornanni isumannaallisaanikkut suleqatigiinnermik ukkassineq
Ataasinngornermi illersornissamut ministeri Troels Lund Poulsen aamma Tysklandi sinnerlugu illersornissamut ministerip tullia Dr. Nils Schmid minnerunngitsumillu Naalakkersuisoq Vivian Motzfeldt ataatsimeeqatigiissapput.
Sakkutuut umiarsui marluk angissutsimikkut atuuffimminnillu assigiinngitsunik suliaqartut. Tyskit sakkutuuisa umiarsuat pilersuisoq "Berlin" pingaartumik pilersuinermut soorlu orsussamik, sakkunik, nerisassiornermut atortunik imermillu imigassamik sakkutuut umiarsuinut allanut pilersuinermut atorneqartarpoq, kisianni aamma periarfissaqarpoq napparsimmavittut angalaartutut atuunnissamut timmisartuutinut qulimiguulinnnut marlunnut inissiiffissaqarluni. Umiarsuaq mikineq tassaavoq danskit sakkutuut umiarsuaat HDMS Triton, taannalu pingaartumik alapernaarsuinermut Kalaallit Nunaanni Savalimmiunilu naalagaaffiup killeqarfii illersorniarlugit, aalisarnermut nakkutilliinermut, imaatigut annaassiniarnermut, aammalu oqartussanik innuttaasunillu ikiuinermut atorneqartarpoq.
Foto: Morten Okkels
Nunatsinni innuttaasunut ulluinnarsiutaanngilaq taamak angitigisunik illersornissaqarfiit umiarsuaannik takunnittarneq, soorlu Tyskit sakkutuuisa umiarsuaat Berlin, nunatsinnimi ulluinnarni sungiusimasagut tasssaapput danskit sakkutuuisa imarsiortut umiarsuaat nakkutilliissutit ullut tamaasa takusinnaasartakkagut. Taakku naalagaaffiup killeqarfiinik nakkutilliisarput, aalisarnermut nakkutilliisarput, imaatigut annaassiniarnermik suliaqartarput, aamma pisortat oqartussaasut ikiortarlugit.
Tyskit sakkutuuisa imarsiortut umiarsuaata Berlinip Nuummut tikeraarneranut atatillugu, innuttaasut periarfissinneqarput umiarsuaq sapaatiummat takornariassallugu.
Foto: Morten Okkels
Taamaakkaluartoq sakkutuut imarsiortut danskiinnaanngitsut najuussinnaasarnerat ilikkartariaqarparput, Nato-mi nunat ikinngutigiittut maanna pimoorussamik aallartipput Kalaallit Nunaannik aamma Issittup sinnerani sillimaniarnikkut illersornissakkullu suleqatigiinnerat annertusinikuummat.
Danskit aamma Tyskit illersornissamut ministerii tikeraartut
Ataasinngornermi illersornissamut ministeri Troels Lund Poulsen aamma Tysklandip illersornissamut ministeriata tullersortaa Dr. Nils Schmid aammalu nunanut allanut tunngasunut Naalakkersuisoq, Vivian Motzfeldt ataatsimeeqatigiissapput. Ministerit pingasut ilaatigut oqaluuserissavaat nunat taakku pingasut akornanni isumannaallisaanermut politikkikkut ineriartorneq ilutigalugu suleqatigiinnerup nukittorsarneqarnissaa.
- Issittumi isumannaallisaaneq danskit naalakkersuisuinut pingaaruteqarpoq. Danmark aamma Kalaallit Nunaat suleqatigisat peqatigalugit ingerlaavartumik nukittorsaapput issittup illersorneqarnissaa pillugu. Tyskit Kalaallit Nunaanni tikeraarnerat uppernarsaatissaavoq Europami suleqatigiinneq Issittumi aamma Atlantikup avannaani ataatsimoornerup annertusarneqarneranut, aamma qilanaarpunga illersornissaq pillugu Kalaallit Nunaata, Danmarkip aamma Tysklandip akornanni nukittorsarneqarnissaannut periarfissallu annertusarneqarnissaannut, illersornissamut ministeri Troels Lund Poulsen oqarpoq.
Ministit taakku pingasut umiarsuarmut alapernaarsuummut Tritonimut pulaassapput. Tamatuma kingorna Naalakkersuisoq Vivian Motzfeldt FGS Berlinimik tyskit sakkutuuisa umiarsuaannut pilersuisuusumut, maanna Nuummiittumut, pulaassaaq.
Tyskit umiarsuaata Nuummi tikeraarnera, qaammatini arfinilinni angalaarneranut, ilaatigullu Canadap issittortaani sungiusarnermi peqataassaaq. Tassani aamma danskit sakkutuuisa umiarsuaat Lauge Koch, Knud Rasmussen-klassenimeersoq, peqataassaaq.
Vivian: Issittumi sillimaniarneq isumannaallisaanerlu pillugit suleqatigiinnerup nukittorsarneqarnissaa pisariaqarpoq
- Isumannaallisaanikkut politikkikkut inissisimaneq piumasaqaateqarpoq, Issittumi isumannaallisaanermut suleqatigiinnerup nukittorsarnissaa. Kalaallit Nunaanni pinngortitap immikkuullarissuuneranik pissutilimmik piumasaqaateqarput, misilittakkanik paarlaasseqatigiittarnissatsinnut suleqatigullu peqatigalugit sungiusarnerit ingerlanneqartarnissaannik, Tyskland ilanngullugu.
- Kalaallit Nunaata immikkuullarissumik inissisimanera pillugu danskit tyskillu naalakkersuisutut suleqatikka peqatigalugit oqaluuserissallugu qilanaarpunga, nunanut allanut tunngasunut ilisimatusarnermullu Naalakkersuisoq, Vivian Motzfeldt oqarpoq.
- Juunimi ministeri Pistorius suleqatini Troels Lund Poulsen Københavnimi tikeraarpaa, avannaarsuani eqqissisimanissamut isumannaallisaanissamullu ataatsimoorussamik iliuuseqarnissamut oqaloqatigalugu. Ullumi umiarsuit marluk, TRITON aamma BERLIN, Nuummi umiarsualivimmi ataatsimoorput.
- Tamanna ersersitsivoq, ataatsimoorluta oqaluinnarata iliuuseqarnissarli pingaartikkipput. Tysklandip sakkutuuisa imarsiortut tikeraarneranni, ullumikkut Kalaallit Nunaanni naalakkersuisut sinniisaannik oqaloqateqarsinnaagama immikkut nuannaarutigaara, qanoq ililluta suli annertunerusumik suleqatigiinnerput isumannaallisaanermut apeqqutinut aamma Atlantikup avannaani, dr. Nils Schmid, Tysklandiup viceforsvarsministeria oqarpoq.
Qanimut suleqatigiissuteqarnissamut isumaqatigiissut
Tysklandip kingullertigut Atlantikup avannaata imartaani najuunnini annertusarlugulu nukittorsarpaa, ilaatigut suleqatigiissuteqarnikkut Canadap, Tysklandip, Norgip Danmarkillu akornanni, siunertaralugu Atlantikup avannaani imartaani isumannaallisaaneq nukittorsassallugu (Maritime Security Partnership).
Suleqatigiissut periarfissiivoq, ilaatigut sakkutuunngorniarnermi ilinniarnerit ilaasa ataatsimoorussinnaanissaannut, sungiusaqatigiittarnissamut Atlantikup avannaa ukkataralugu.
Suleqatigiinneq aamma misilittakkanik paarlaasseqatigiinnermut tapertaavoq, atortussarsiniaqatigiittarnissamut periarfissiivoq, sakkutooqarnikkut periarfissanik nutaanik Atlantikup avannaani imartaani atuutsitsisunut tunngatillugu, ukiuni aggersuni Issittumi periarfissanik nutaanik atuutsitsilernissamut atatillugu, Illersornissamut ministeriaqarfiup tusagassiorfinnut nalunaarutaani ministerit pingasut naapinnissaat sioqqullugu oqaatigineqarpoq.
