KL

DK

Kangerlussuarmi inuulluaqqusineq: Oqaluttuarisaanermi pisoq tassunga killeqarpoq

Air Greenlandip Kangerlussuarmi timmisartoqarfiata pisortatigoortumik naggataamik ammanera marlunngornermi nalliussivaa.

Malik Hegelund Olsen, Air Greenlandimi siulersuisuni siulittaasoq, marlunngornermi Kangerlussuarmi aqqusaartunut, innuttaasunut sulisunullu oqalugiarpoq.
Thomas Munk Veirum
Tusagassiortoq
Saqqummersinneqarpoq

Air Greenlandip marlunngornermi Kangerlussuarmi mittarfiup illuutaani aqqusaartut, Kangerlussuarmi innuttaasut suleqatillu kaffillerfigalugillu kaagillerfigai.

Tamatumunnga pissutaavoq sisamanngornermit timmisartuussinerit Nuummi aallartinneqarnissaat sioqqullugu Air Greenlandip timmisartoqarfia pisortatigoortumik naggammik ammammat.

Air Greenlandimi siulersuisuni siulittaasoq Malik Hegelund Olsen najuuttut ima oqaluffigai:

- Ullumikkut katersuuppugut qujaniarlutalu inuulluaqqusiniarluta, tassami Kangerlussuaq ukiuni 64-ini Air Greenlandip oqaluttuarisaanerani qitiusimavoq. Nuummi mittarfissuup nutaap ammarneratigut suliffigisattalu nuunneratigut piffissap naanera malunnartinniarparput.

- Timmisartup Dash-8-p kingulliup maanngaaniit tingineratigut check-in-imi usilersuisunilu sulisorpassuavut ilaassapput. Nuup mittarfiani nutaanik avatangiiseqarlutik suliinnarnissartik toqqarsimavaat. Ulloq tussunngunarpoq, ingammik taakkununnga, maanngaaniit ikinngutitik eqqaamasatillu inuulluaqqullugit aallartunut, Malik Hegelund Olsenip oqalugiarnini taama aallartippaa.

Pingaarluinnartoq

Kangerlussuaq Kalaallit Nunaata oqaluttuarisaanerata pingaarluinnartut ilaattut taavaa, sorsunnersuarmimi kingullermi sorsunnermilu nillertumi sakkutooqarfioqqaarnerminit mittarfik nunap iluani avataanullu angalanermi qitiulersimavoq:

- Manna mittarfik Kalaallit Nunaata sinneranut attaveqaannanngilaq aammali nunarsuarmut; nunatsinni tamarmit inunnut aamma naapittarfiuvoq. Aallarnissarput utaqqillugu maani nuannersumik peqatigiittarpugut, Malik Hegelund Olsen oqarpoq.

- Taamatut oqaaseqarlunga Kangerlussuarmi sulisunut qamannga pisumik qujarusuppunga tamassilu, maaniiginnassagussi allamulluunniit nuussagussi ingerlalluarnissassinnik kissaappassi, siulersuisuni siulittaasoq Malik Hegelund Olsen oqarpoq.

Naak Nuuk angallannikkut qitiulertussaagaluartoq sapaatip-akunneranut pingasoriarluni Kangerlussualiartarnissaq ilisimatitsissutigaa:

- Aasamut Albatros suleqatigalugu Kangerlussuarmiit Københavnimut aqqut toqqaannartoq ammassavarput – sumiiffiup massuma pingaaruteqartuarneranut takussutissatut.

- Kangerlussuup siunissaa isumalluarnarpoq. Takornarianut pinngortitamillu nuannarisaqartunut ornigassaavoq pilerinartoq. Suleqatigisavut sumiiffimmilu maani nukiit suleqatigiinnerisigut qulakkeerneqassaaq, Kangerlussuup Kalaallit Nunaanni misigisassanut immikkuullarissunut ilaaniitiinnarnissaa, siulersuisuni siulittaasoq oqarpoq.

Suleqatinut qamannga pisumik qujasoq

Malik Hegelund Olsenip aamma periarfissaq atorpaa mittarfimmi sulisut qutsavigalugit:

- Kingullertut minnerunngitsumilli Kangerlussuarmi sulisut immikkut taaniarpakka. Tunniusimanissigut sulilluarnissigullu manna mittarfik immikkuullarissuutipparsi.

- Maannalu maanga killippugut, taamaattumik Kangerlussuup tamatsinnut pingaaruteqarsimanera qujamasuutigisigu. Ulapaarfiup nalaani eqqissisimanartunullu, sumiiffimmi immikkuullarissumiittarnitsinnut nuannersumut. Aamma Nuummi pissanganartunik siunissaqarnerput qilanaarisinnaavarput, Kangerlussuup pilersitai ineriartorteqqillugit.

- Taamatut oqaaseqarlunga Kangerlussuarmi sulisunut qamannga pisumik qujarusuppunga tamassilu, maaniiginnassagussi allamulluunniit nuussagussi ingerlalluarnissassinnik kissaappassi.

nuuk lufthavn kangerlussuaq inuiaqatigiit air greenland samfund malik hegelund olsen

ATORFIIT Se alle jobs

Powered by Labrador CMS