KNI A/S-imi Ikummatissaqarnermi Ingerlatsivimmi pisortassaq toqqarneqarpoq
René E. Fleischer KNI A/S-imi Ikummatissaqarnermi Ingerlatsivimmi pisortassatut toqqarneqarpoq, taama KNI A/S tusagassiuutitigut nalunaarummi allappoq.
Offentliggjort
Annonse
Ikummatissaqarnermi Ingerlatsivimmi Pisortassaq Sisimiuni nassaarineqarpoq.
René E. Fleischer Sisimiuneersoq maanna Ikummatissaqanermi Ingerlatsivimmi pisortanngortussanngorpoq.
- Nuannaarutigaarput KNI-miit nalunaarutigisinnaagatsigu René E. Fleischer Ikummatissaqarnermi Ingerlatsivimmi Pisortatut 1. januar 2025 aallarnerfigalugu atorfinimmat. René E. Fleischer teknikkikkut aqutsinermik misilittagaqarluartuuvoq, nunatsinnilu atorfinni pingaarutilinni ilaatigut atorfeqartarsimalluni misilittagaqarlunilu.
- Taamatullu Ikummatissaqarnermi Ingerlatsivik René E. Fleischer-ip pisortatut atorfininneratigut ingerlatsinermi pilersuinermi ineriartortitsinermillu qulakkeerinninnissamik suliaqarluarsinnaasumik suleqateqalissaagut, minnerunngitsumillu Ikummatissaqarnermi Ingerlatsiviup ineriartorteqqinnissaanut pisortamik atorfinitsitsineq pingaaruteqarpoq, KNI A/S tusagassiuutitigut nalunaarummi allappoq.
René E. Fleischer Ikummatissaqarnermut Ingerlatsivimmi pisortassatut toqqarneqarnissami tungaanut KNI A/S-ip siulersuisuinut ilaasortaasimavoq, tamannalu tunngavigalugu KNI-p ingerlataanut annertuumik ilisimasaqarpoq.
KNI A/S-imi pisortaanerup Jeppe Jensenip pisortanngortussaq nuannaarutigaa:
- René E. Fleischer-ip atorfininneratigut Ikummatissaqarnermi Ingerlatsiviup nukittorsarnissaanut nutaaliorfiusumillu ineriartorteqqinnissaanut, pisortamik misilittagaqarluartumik nukittuumillu suleqatitaalerpugut. Renép ineriartortitsinermik, patajaattumik suleriuseqarnermik kiisalu suleqatigiinnissamik pingaartitaqarnera pisortatut toqqagaaneranut tunngavileeqataapput. Taamatummi suleriuseqarluta KNI-mut kiisalu Ikummatissaqarnermi Ingerlatsivimmi periusissiatsinni anguniakkagut piviusunngortissavagut.
