PISORTANIK NIKISITSINEQ
KNI Polaroil-imut pisortamik nutaamik pissarsiulerpoq
KNI A/S-imi pisortaaneq, Jeppe Jensen, Sermitsiamut uppernarsaavoq ingerlatseqatigiiffimmut Polaroilimut pisortartaassamik nutaamik pissarsiulersimallutik. - Ukiut nikinnerat nallertinnagu nutaamik pisortassamik pissarsisimanissarput neriuutigaarput, taanna oqarpoq.
Githa Brask Olsen KNI-p ingerlatsiviani aningaasarsiorfiulluartumi, Polar Oil-imi, 2017-imili pisortaavoq. Maanna ingerlatseqatigiiffik namminersorlutik oqartussat pigisaat nutaamik pisortassarsiorluni aallartippoq.
Assiliisoq: Leiff Josefsen
Githa Brask Olsen, maaji 2017-miilli, pisortat ingerlatseqatigiiffiini aningaasarsiorfiulluarnerpaat ilaanni Polar Oil-imi pisortaavoq. Tamanna sioqqullugu taanna pisortamut tullersortaasimavoq maaji 2015-miit pisortanngornissami tungaanut.
Kisianni maanna Githa Brask Olsen-imut pisortatut taarsiisussamik pissarsiulerpoq, tassami KNI-p qullersaqarfiani pisortat akornanni taanna maanna peqataajunnaarpoq.
- Uppernarsassavara Githa Brask Olsen Polar Oil-imi pisortatut atorfeqarunnaarmat, aamma oqaatigissavara tamanna uivernermik aallaaveqanngimmat, allamik oqaaseqarsinnaanngilanga, tassami sulisut ataasiakkaat pillugit oqaaseqarusunngisaannarpunga, Jeppe Jensen Sermitsiamut oqarpoq.
Githa Brask Olsen nammineerluni tunuarpa imaluunniit soraarsinneqarpa?
- Oqareernittut, sulisut ataasiakkaat pillugit oqaaseqanngisaannarpunga, taamaattorli erseqqissaqqiinnassavara pisortatut tunuarnera uivernermik aallaaveqanngimmat, KNI A/S-imi pisortaq Jeppe Jensen akivoq.
Juliane Henningsen Heilmann pisortatut inissisimagallarpoq
Ingerlatseqatigiiffissuup KNI-p toqqarsimavaa sulisoqarnermut, attaveqaqatigiinnermut piujuaannartitsinermullu pisortaq, Juliane Henningsen Heilmann, Polar Oil-imi pisortaagallartussatut inissisimassasoq.
- Polar Oil-imut pisortassarsiuussinerput maanna aallartinneqarpoq, aamma anguniagarput neriuutigaarpullu ukiut nikinnerat sioqqullugu Polar Oil-imut pisortaq nutaaq pissarsiarisimassallutigu, tamatuma tungaanut Juliane Henningsen Heilmann pisortatut inissisimagallassaaq, Jeppe Jensen oqaluttuarpoq.
