KNR-ip siulersuisuini siulittaasoq nutaaq
Rosannguaq Rossen siulittaasunngorpoq. Naalakkersuisut taama nalunaaruteqarput.
- Naalakkersuisut nuannaarutigalugu nalunaarutigissavaat KNR-ip siulersuisuini siulittaasumik nutaamik toqqaasoqarmat. Siulittaasoq nutaaq tassaavoq Rosannguaq Rossen, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik allappoq.
Siulersuisut KNR-ip siulersuisorai qullerpaat, KNR-illu ingerlatsinera pillugu aalajangersakkat malinneqarnissaannut akisussaanerpaajullutik.
Naleqquttumik nassaarniarneq ajornaatsuinnaasimanngitsoq
KNR-imi siulersuisuni siulittaasuusimasoq, Mette Steenholdt qaammatini 13-ini siulittaasooreerluni februaarimi tunuarpoq. Kingorna siulittaasussamik naleqquttumik nassaarniarneq ajornarsimasoq Naalakkersuisoq allappoq.
- KNR-ip siulersuisuini siulittaasumik naleqquttumik nassaarniarneq ajornaatsuinnaasimanngilaq, qilanaarivarpullu KNR-ip siulersuisui siulittaasunngortorlu nutaaq peqatigalugu suleqatigineri ingerlateqqinnissaa, Aqqaluaq B. Egede oqarpoq.
Maanna siulersuisuusut piffissami 31. december 2026-imi naanissaata tungaanut atuuffeqarput.
