Kunngikkormiut Kalaallit Nunaannut tikeraarnertik kujataani naggaserpaat
Arfininngorpat Kunngikkormiut Narsaq Qassiarsullu tikeraassavaat. Naak sialleraluartoq, innuttaasut amerlasuut Kunngikkormiunik tikilluaqqusiniarlutik takkupput.
Kunngi Frederiup aamma Dronning Maryp tallimanngormat kujataani nunaqarfik Igaliku tikeraarpaat.
Assiliisoq: Ida Marie Odgaard/Ritzau Scanpix
Kunngikkormiut Kujataanut tallimanngormat tikipput, tikeraarnerallu ullumikkut naammassissaaq.
Sapaatip-akunnerata ataatsip matuma siorna kunngi Frederik dronning Marylu Avannaanut tikipput Qaanaamullu tikeraarlutik, sapaatip-akunneratalu matuma ingerlanerani kunngikkormiut meeraallu nukarliit marluk, prins Vincent prinsesse Josephinelu, ilaatigut Sisimiunut Nuummullu tikeraarput.
Borgmesterip Stine Egedep kunngikkormiut tallimanngormat Igalikumi tikilluaqquai.
Assiliisoq: Ida Marie Odgaard/Ritzau Scanpix
Tallimanngornermi ualikkut kunngikkormiut Nuummit Kujataanut timmisartorput, tassanilu Igalikumiipput.
Nunaqarfiup akunnittarfiani Kommune Kujallermi borgmesterip Stine Egedep kunngikkormiut tikilluaqquai, umiatsialivimmit Igalikumut pisoreernerisa kingorna.
Arfininngornermi ullaap tungaani kunngikkormiut Narsamut tikipput. Naak sialleraluartoq, inuppassuit kunngikkormiut tikilluaqquniarlugit takkussimasut, Sermitsiap tusagassiortua angalaqataasoq oqaluttuarpoq.
Sialleraluartoq kunngikkormiut tikeraarnerat ornigarneqarluarpoq.
Dronning Maryp Igalikumi tikeraarnermini kunngi Frederiup qulingiluaata assinga pisoqaq mobilimini takutippaa. Kunngi Frederiup qulingata Igalikumi tikeraarnermini assiliartaq ullumikkutut isikkoqalersinniarlugu assingusumik inissilluni assilisippoq.
Assiliisoq: Ida Marie Odgaard/Ritzau Scanpix
Narsap Timersortarfianut pulaarneq Inuilimilu ullup-qeqqanut ilassinninnissaq Narsami arfininngornermi pisussanut ilaapput. Kunngikkormiut tikeraarnertik nunaqarfimmi Qassiarsummi tikeraarnermik naggasissavaat.
