Lars Nielsen nunalerineq pillugu Siunnersuisooqatigiinni siulittaasunngorpoq
Naalakkersuisut Inatsisartunut qinersinerup kingorna Nunalerineq pillugu Siunnersuisooqatigiit nutaat pilersippaat siunnersuisooqatigiillu kattuffinnit assigiinngitsuniit nunalerinermik inuussutissarsiuutinik soqutigisartunit assigiinngitsunit ilaasortaqarput.
- Suleqatigiissitami sulinissara qilanaaraara, inuussutissarsiornermi ineriartortitsinissamut sunniuteqarluartumik peqataajumallunga, oqarpoq suleqatigiissitami siulittaasoq nutaaq, Lars Nielsen.
Assi: Naalakkersuisut
Nunalerinermut Siunnersuisooqatigiinni siulittaasup nutaap, Lars Nielsenip, siornatigut savaatiliusimavoq ukiorpassuarnilu savaateqarfik Kangerluarsorujuk ingerlassimallugulu inerisarsimavaa.
Suliaq Larsip ernerata Kunuk Nielsenip 2024-mi tiguaa, taamak Naalakkersuisut tusagassiorfinnut nalunaaruteqarlutik allapput.
Siulittaasoq nutaaq inuussutissarsiummik siuarsaaqataarusuppoq
Naalakkersuisut Lars Nielsen siulittaasutut toqqarpaat, Larsip nunalerinermit inuussutissarsiornermut suli sullisserusummat ulluinnarnilu ingerlatsinermik ilisimasaqarluarmat kalaallillu nunalerinermik suli ineriartortitsinerannut tunniussassaqarluarluni.
- Nunalerineq pillugu Siunnersuisooqatigiinni sulilernissara qilanaaraara inuussutissarsiummillu pitsaasumik ineriartortinnissaanut suleqataaniarlunga. Pitsaasumik ineriartorfiusumillu suleqatigiittoqarnissaa neriuutigaara – siunnersuisooqatigiit iluini aamma Naalakkersuisunik suleqateqarneq eqqarsaatigalugu, Lars Nielsen toqqagaanermini taamak oqaaseqarpoq.
SULEQATIGIISSITAQ NUTAAQ
- Lars Nielsen- Siulittaasoq
- Suulut Hansen - Savaatilliit Peqatigiiffiat Suleqatigiissut
- Siiku Bjerge - Savaatilliit Peqatigiiffiat Suleqatigiissut
- Stine Egede - Kommune Kujalleq
- Malik Frederiksen - Kommune Kujalleq
- Henrik Frederiksen - Savaateqarnermut Siunnersuisoqatigiit
- Ole Vestergaard - Neqi A/S
- Katrine Raundrup - Pinngortitaleriffik
- Tina Werner Bennedsgaard - Kalaallit Nunaanni Nakorsaaneq aamma Nerisassanut Nakkutilliisoqarfik
Nunalerineq pillugu periusissiaq 2021-2030
Naalakkersuisut Nunalerineq pillugu Siunnersuisooqatigiit Nunalerineq pillugu periusissiap 2021-2030-p atuutsilernissaanut aamma nunalerinermik inuussutissarsiornerup ineriartornera ataatsimut aamma isigalugu pingaaruteqartutut isigaat.
Nunalerineq pillugu Siunnersuisooqatigiit Naalakkersuisunut siunnersuisartuupput, namminneq suliniuteqarnermikkut imaluunniit Naalakkersuisunit peqquneqarnermikkut apeqqutinik inassuteqaatinilluunniit suliaqarsinnaasarlutik.
Nunalerineq pillugu Siunnersuisooqatigiinni nutaamik siulittaasumik Lars Nielsenimik toqqaanerup malitsigisaanik inuussutissarsiorfimmi tassani najukkami ilisimasaqarluartumik siulittaasoqalersitsisoqassaaq, inuussutissarsiortunik ataatsimoortitsisinnaasumik toqqaannartumillu attaveqarnissamik qulakkeerinnittoqarmat, Naalakkersuisut naggasiipput.
