Ministeriunerup utoqqatsernissi sioqqullugu arnat spiralilersuinermit eqqugaanikut naapippai – oqaluttuaat killitsissutigigai

Arnat spiralilerneqarnikut tallimat Naalakkersuisut siulittasuata Jens-Frederik Nielsenip ministeriunerullu Mette Frederiksenip pingasunngornermi naapippaat.

Arnat tassaapput Naja Lyberth, Arnaq Johansen, Hedvig Frederiksen, Marie Louise Nielsen aamma Debora Kleist, taakkulu Nuummi Hans Egedep illuani naapinneqarput. 

Ritzau Scanpix naapinnermi assilisaaraluni malinnaavoq. Ministeriunerup Naalakkersuisullu siulittaasuata tusagasiortut kinguninngua naapippaat.

Arnat naapinnerat killitsissutigigaa

Arnanut eqqugaasunut Danmarki utoqqatsersinnaanera nuannaarutigalugu Mette Frederiksen ilaatigut oqarpoq:

- Taamaaliornerput nuannaarutigaara. Kalaallit Nunaata Danmarkillu akornanni oqaluttuarisaanermini pisoqangaatsiartarnikuuvoq, pisimasut ilaat tujorminartuupput. Maannali suleqatigiilluassagutta pisimasut taakku kingumut qiviarneqarsinnaasariaqarput.

Arnat eqqugaasut naapertuilluanngitsumik pineqarsimanerat ajuusaarutigigaarlugu ministeriunerup aamma oqaatigaa. Arnallu tallimat pingasunngornerup ullaavani naapinnerat killitsissutigaa.

- Eqqarsaatersuutigigaatsiarsimavara (utoqqatserneq, aaqq.). Pisimasoq sakkortuvoq, Jens-Frederik Nielsenilu peqatigalugu arnat ilaat eqqugaasut issiaqatiginissaat ullumi periarfissarisimavara. Killitsinnarpoq.

- Ingammik niviarsiaqqat ilaat aqqaneq-marluinnarnik ukioqarlutik taama pineqarsimanerat. Nalusimavaat susoqarnersoq, ilaasalu kingunerlutsingaatsiarsimallugu.

Naalakkersuisut taarsiissuteqarnissaq pillugu oqaloqatigineqassasut

Saammaateqatigiinnissamik siunertalimmik aningaasaateqarfimmik pilersitsinissaq ministeriunerup sapaatip-akunnerani matumani nalunaarutigaa. Aningaasaateqarfik arnat taarsiivigineqarnissaannik siutamut ilaavoq. Aningaasat qanoq amerlatigissanerat kimullu tunniunneqassanersut suli paasissutissiissutigineqanngilaq:

- Tamanna Naalakkersuisullu ulluni makkunani oqaloqatigiissutigaarput. Nalunngilara ilaannut utoqqatsernissaq pingaaruteqartoq, allanullu taarsiivigitinnissaq pingaaruteqarluni.

- Taamaattumik saammaateqatigiinnissamik aningaasaateqarfimmik pilersitsiniarluta nalunaarutigaarput, taannalu aamma taarsiissuteqarnermik imaqarsinnaavoq. Qanoq pisoqarnissaa Naalakkersuisullu isumaqatigissutigissavarput.

Apeqqut: Saammaateqatigiinnissamut ataatsimiititaliaq sumut killippa, suli pilersinnialersaarneqarpa?

- Taamaaliortoqarnialersaannginnerarlugu oqanngilanga. Oqaluttuarisaanitsinni pisimasut kingumut qiviarnissaat kissaatigalugulu piumassuseqarfigaara.

- Pisimasut kingumut qiviarsinnaanissaannut qununnginnissaq, aamma pisimasut ajortut pillugit, ataqatigiillualernitsinnik qajannaannerulernitsinnillu kinguneqarsinnaasoq isumaqarpunga. Taavalu naligiinnerusumik attaveqaateqarnissamik Naalakkersuisunit danskillu naalakkersuisuinit kissaatigineqaqisup angunissaanut iluaqutaasinnaalluni, Mette Frederiksen oqarpoq.

Ministeriuneq arnanut spiralilerneqarsimasunut Katuami pisortatigoortumik utoqqatserniarluni pingasunngornermi maaniippoq.