Missingersuut: Innuttaasut agguaqatigiissillugu utoqqaliartorput – Nunatsinni inunngortut ikiliartorput
Naatsorsueqqissaartarfiup naliliinera naapertorlugu innuttaasut Kalaallit Nunaanni inunngorsimasut najugaqartullu 2050-ip tungaanut tallimararterummik ikileriarnissaat ilimagineqarpoq.
Ukiuni 20-ni tulliuttuni inunngortut 800-nit 600-t ataallugit ikileriarnissaat missingerneqarsimavoq, tamannalu inuiaqatigiit ikiliartornissaannut pissutaaqataavoq.
Assi: Leiff Josefsen
Innuttaasut amerlassusissaat pillugu naatsorsuinerit nutaat innuttaasut Kalaallit Nunaanni inunngorsimasut najugaqartullu ikiliartupiloorsimanerat takutippaat.
Naatsorsueqqissaartarfiup naatsorsuusiaa naapertorlugu innuttaasut Kalaallit Nunaanni inunngorsimasut ukioq manna 49.957-init 2049-mi 39.648-nut ikilisimassapput. Tassa tallimararterummik ikilisimassapput.
Innuttaasut amerlassusissaannik naatsorsuinermi Kalaallit Nunaanni inunngorsimasut taamaallaat tunngavigineqarsimasut Naatsorsueqqissaartarfik allappoq. Kalaallit Nunaata avataani inunngorsimasut 2024-misulli suiaassusaat ukioqqortussusaallu allanngorsimassanngitsut, tassa 6.742-t missaanniissasut, naatsorsuutigineqarpoq. Kisitsisit takussutissiami ataani takuneqarsinnaapput.
1960-ikkunni inunngorsimasorpassuit ukiuni tulliuttuni ukioqqortussuserisassaat malillugit toqusartut amerlanerulissaneranik ineriartorneq Naatsorsueqqissaartarfimmit nassuiaaserneqarpoq.
Innuttaasulli agguaqatigiissillugu ukioqqortussusaat 2024-mi 35,5-iusoq 2050-imi 39,5-imut qaffassasoq naatsorsuutigineqarpoq.
Ukiut qulit matuma siorna meeqqat ukiumut inunngortut 800-t missaaniittut maanna meeqqiornerup annikinnera tunngavigalugu ukiut qulit qaangiuppata 600-t missaaniilersimanissaat aamma naatsorsuutigineqarpoq.
