KL

DK

Múte B. Egede tusagassiortunik katersortitsinermi: Trumpip allaffeqarfiata attavigilernissaa sulissutigineqartoq

Naalakkersuisut siulittaasuat “ulluni makkunani pisut aallaavigalugit” tusagassiortunik katersortitsivoq pillugit.

Naalakkersuisut tusagassiortunik marlunngornermi ullup-qeqqata kingorna katersortitsipput.
Thomas Munk Veirum
Tusagassiortoq
Jensine Berthelsen
TUSAGASSIORTOQ
Saqqummersinneqarpoq

OBS: Allaaserisami siullermi allaqqagaluarpoq Naalakkersuisut Trumpip allaffeqarfianik ataatsimeeqateqarnissamik sulissuteqartut. Tamannali maanna naqqinneqarpoq oqaloqateqarnissamik sulissuteqartoqarnera erseqqissarlugu. Sermitsiap kukkuneq ajuusaarutigaa.

Naalakkersuisut siulittaasuat tusagassiortunik aggersaammat tusagassiortunut katersuutsitsisarfia ulikkaavippoq.

Kalaallit Nunaat ulluni makkunani soqutigineqartorujussuuvoq, tamannalu Donald Trumpip marlunngornermi oqaatigisaasa kingulliit annikinnerulersinngilaat.

Mute B. Egedep Kalaallit Nunaata siunissaa Kalaallit Nunaannit aalajangerneqartussaasoq siullertut erseqqissarpaa.

Partiit tamarmik ullaaq manna pisut pillugit paasissutissinniarlugit qaaqquneqarsimasut, suleqatigisallu ataavartumik oqaloqatigineqartut oqaatigaa.

Danmark, USA-mi nunallu allat pineqartut Mùte B. Egedep oqaatigaa.

Trumpimik oqaloqateqarnissaq sulissutigigaa

Kalaallit Nunaat nunani killermiunut suleqataasoq naqissuserpaa, pissutsilli ilungersunartuusut aamma oqaatigalugu.

Trumpip allaffeqarfia attaviginiarsaralugu oqarpoq neriuutigalugulu ulluni tulliuttuni tamanna pissasoq.

Naalagaaffinngornissamut Naalakkersuisoq, Vivian Motzfeldt (S), aamma najuuppoq, Kalaallit Nunaata ulluni tulliuttuni USA ataatsimeeqatiginiaraa neriuutigalugu oqaatigaa.

Trumpip ataasinngornermi oqaaserisai pillugit Múte B. Egede Kalaallit Nunaanni innuttaasut aalajangiisussaasut oqarpoq.

Egede: Eqqissisimajunnaartoqarnera paasinarpoq

USA-p nalunaarutai pillugit ernumassuteqartut qanoq oqarfigissanerlugit Múte B. Egede aperineqarpoq:

- Soorunami pisut kingulliit isumakulunnarput, Naalakkersuisut siulittaasuat oqarpoq, nangipporlu:

- Eqqissisimajunnaartoqarneralu paasinarpoq, uivertoqannginnissaali pingaaruteqarpoq.

Namminiilivinnissamik oqalunneq unikaallatsinneqartariaqartoq Jess G. Berthelsen ullumi oqarpoq, aamma Kalaallit Nunaat USA-p tatisinerani Danmark EU-lu peqatigalugit iliuuseqartariaqartoq.

Kalaallit Nunaata namminiilivinnissaq suli sulissutigigaa, allornernillu ataasiakkaarisoqartoq Múte B. Egede tamanna pillugu oqarpoq.

Vivian Motzfeldt ilassuteqarluni Naalakkersuisut ataatsimoorlutik pissutsit qaangerniarsarigaat, Kalaallit Nunaatalu inatsisit malikkai nunanilu tamalaani malittarisassat tunngavigalugit suleqateqartoq oqaatigalugu.

Mùte B. Egede naggataatigut ataatsimoornissaq pisariaqartoq kaammattuutigaa, aamma USA-mik isumaqatigiinniartoqarsinnaaneranut atatillugu Kalaallit Nunaata periarfissai isumalluarfigigai.

- Siunissaq periarfissiivoq, Múte B. Egede oqarpoq.

grønland donald trump amerikanske præsident inuiaqatigiit pressemøde naalakkersuisut samfund

ATORFIIT Se alle jobs

Powered by Labrador CMS