AKIT QAFFAKKIARTORNERAT
Naalakkersuisoq: Aaqqissuusseqqinnerit Kalaallit Nunaanni inuunermik oqinnerulersitsissapput
Atugarissaarnermik aaqqissuussinerup pitsanngorsarnissaanut inuussutissarsiortunullu atugassarititaasut pitsaanerulersinnissaannut, taamaalillunilu inuiaqatigiit aningaasarsiornerat annertusineqarsinnaanissaanut aaqqissuusseqqinneq ataqatigiissoq akit qaffakkiartornerannut akissutaavoq, Aningaasaqarnermut Naalakkersuisoq Múte B. Egede (IA) oqarpoq.
Múte B.Egede
Assi: Oscar Scott Carl
Nioqqutissat ulluinnarni pisiarineqartartut, ikummatissat ineqarnermullu akiliutit qaffakkiartornerat pissutigalugit inuit maanna aningaasaateqarpiarunnaarput, inuppassuillu politikkerinut saaffiginnillutik pissutsit pitsaanerulersinniarlugit iliuuseqartoqarnissaa piumasaraat.
Isornartorsiuineq Aningaasaqarnermut Naalakkersuisup Múte B. Egedep (IA) qanoq isumaqarfigineraa Sermitsiamit aperaarput:
- Inuppassuit akit qaffakkiartornerannik maluginnittut paasilluarsinnaavakka. Nioqqutissat ulluinnarni pisiarineqartartut akitsungaatsiarnerat arajutsisassaanngilaq, oqarpoq nangillunilu:
- Naalakkersuisut nunami maani inuunerup oqinnerlulersinnissaa siullertut anguniagaraat, taamaammallu inuiaqatigiinni aaqqissuussaaneq ineriartortissimasarput tamaat misissortariaqarparput.
Aaqqissuusseqqinnerit ineriartornerlu
Naalakkersuisut aaqqissuusseqqinnerit ataqatigiissullu, naggataatigut nunami maani inuunermi atugassarititaasunik pitsaanerulersitsisinnaasut pilersikkusukkaat Mùte B. Egede nassuiaavoq:
- Aaqqissuusseqqinnerit akileraartarnermut, soraarnerussutisiaqalernermut, isumaginninnermut ineqarnermullu tunngasuni pissapput. Aaqqissuusseqqinnerit sivisuumik atuussinnaassallutillu inuit ataasiakkaat inuunerannut oqilisaataasinnaassapput, Aningaasaqarnermut Naalakkersuisoq oqarpoq, taassumalu aamma inuussutissarsiorneq ineriartornerlu ukkatariniarpai:
- Atugarissaarnissamut pingaarnertut ukkatarineqartussat saniatigut aningaasarsiornerput annertusarneqassaaq. Tamannalu anguniarlugu Inuussutissarsiornermut Naalakkersuisoq aalajangersimasunik suliniuteqarpoq.
- Aalisarnerup saniatigut allanik inuussutissarsiuteqarusuppugut, takornariaqarnerlu periarfissaqarluarlunilu ineriartorfiusinnaasoq takusinnaavarput. Tamatuma saniatigut aatsitassarsiorpugut, tassani naalakkersuisut qinersinerup kinguninngua piiaanissamut akuersissuteqarlutillu suliniutillu arlallit suliaraat, neriuppugullu suliniutit taakkua aningaasarsiornitsinnut annertusaaqataassasut, Múte B. Egede oqarpoq.
Akit qaffakkiartornerat iliuuseqarnermut sunniuteqartoq
Mùte B. Egede qinersineq sioqqullugu Naalakkersuisut siulittaasuattut ilaatigut akileraarutitigut aaqqissuusseqqinnermik suliniutinillu allanik arlalinnik naammassinnippoq, sulili suliassaqarnerarlugu ima oqarpoq:
- Suliniuteqartoqaraluartoq akit qaffakkiartornerisa suliniutit suliarineqartut ilarpassui akornusertaraat oqarsinnaavunga, taamaammat ataqatigiissumik aaqqissuusseqqinnissaq Naalakkersuisunut pingaaruteqarpoq.
Múte B. Egede naapertorlugu Naalakkersuisut ataqatigiinnerusumik siunnersuuteqareerunik isumaqatiginninniartoqarnissaanut aggersaassapput, tamatumalu saniatigut aningaasaqarnermut inatsisissaq pillugu isumaqatiginninniarnerit aamma aallartinneqassapput.
Broberg isornartorsiuisoq
Pele Broberg, illuatungiliuttut partiiannit Naleqqameersoq, Kalaallit Nunaanni inuunerup akikinnerulernissaanut iluaqutaasinnaasunik arlalinnik siunnersuuteqarpoq.
Ilaatigut assartuinermi kisermaassilluni oqartussaanerup atorunnaarsinneqarnissaa (RAL) aamma niuernermi periutsit Danmarkimeersunik tunngaveqartartut atorunnaarsinneqarnissaat pineqarput. Suliniutinut mingutsitsinnginnerusunut aningaasaliinerit pinnagit assartuinermut akit appartinneqarnissaat ukkatarineqartariaqartoq taannattaaq isumaqarpoq.
Naalakkersuisut siunnersuutinut tamanut ammasut Múte B. Egede akivoq:
- Suliniutit pisariaqartut isumaqatigiissutiginissaat pingaaruteqarnerpaassaaq. Tamatta nunatsinnut kiffartorniarluta maaniippugut, aamma Naalakkersuisut inuunermik pitsaanerulersitsinissamik ajornannginnerulersitsinissaanillu anguniagaat piviusunngortinneqarsinnaaqqullugit piffissaq ungasinnerusoq eqqarsaatigalugu isumaqatigiinniartariaqarpugut.
- Tamakkiisumik isigissagaanni aaqqissuussinerit pisariunerusut ullumikkut atuuttut pisariillisarneqarlutillu, paasiuminarnerulerlutillu allaffissorfiuallaarunnaarsinneqassapput. Atugarissaarnissamut aaqqissuussinerit pitsaanerulersinniarlugit siunissamullu piareersarluarsinnaaniarlugit tamanna pingaaruteqarluinnarpoq.
