Naalakkersuisut: Ilisimatusarfimmi pissutsit imaannaanngillat
Ilisimatusarfimmi ilisimatusartut pisortallu taarseraannerat ilungersunartuusoq, Naalakkersuisut Jens-Frederik Nielsenimut akissumminni allapput.
Marsip qaammataani Sermitsiap pappiaqqanik takunnikkumaneq aqqutigalugu, Ilisimatusarfimmi sulisut amerlassusaat ilisimaneqanngitsut Ilinniartitaanermut Naalakkersuisoqarfimmut aarleqquteqarnermik allakkanik nassiussisimanerat atuarneqarsinnaavoq.
- Siulersuisut Ilisimatusarfimmi inissisimanerminnik ingerlatsinerisa pisortat qulliusut akornanni tarnikkut peqqissusermut sakkortuumik kinguneqarsinnaanera aarleqqutigisorujussuuarput, taama ilaatigut sulisut allagaanni allaqqasoqarpoq.
Naalakkersuisup Aqqaluaq B. Egedep (IA) Inatsisartunut ilaasortamut Jens-Frederik Nielsenimut allakkatigut akissuteqarnermini Ilisimatusarfimmi pissutsit ilungersunartutut taavai, ilisimatusartummi pisortallu arlallit Ilisimatusarfik qimassimavaat, aatsaallu sulisut allagaannik tigusereernermi naalakkersuisoqarfik “pisut annertussusaannut ilisimasaqarnerulersimavoq”.
APV-p ilungersunartut annertunerat takutippaa
- Ilisimatusartut pisortallu akornanni taarseraanneq ilungersunarpoq. Ilaat soraarniuteqarsimasut ilaallu napparsimallutik sulinngiffeqartut Naalakkersuisut ilisimatinneqarput, naalakkersuisoq allappoq, imalu nangilluni:
- Sulisut soraarsimasut amerlassusaat sulisullu napparsimallutik sulinngiffeqartut amerlassusaat aatsaat aarleqquteqarluni allakkap sulisut ilaannit marsimi Ilinniartitaanermut, Kulturimut, Timersornermut Ilageeqarnermullu Naalakkersuisoqarfimmut nassuinneqarnerisa kingorna paasinarsivoq.
Kingornalu suliffeqarfimmik naliliinerup sulinermi avatangiisini annertuumik ilungersunartoqarnera takutikkaa, Naalakkersuisoqarfik paasitinneqarpoq.
Siulersuisut nutaat
Sulinermi avatangiisit qularnaarniarlugit Naalakkersuisut siulersuisunik pisortanillu isumasioqateqarnissamik pilersaaruteqartut, naalakkersuisoq passissutissiivoq. Tamatuma saniatigut siulersuisut nutaat ivertinneqassapput:
- Siulersuisut nutaat maajip naanerani atuutilissapput, taamanikkussamummi siulersuisut atuuffiat qaangiutissaaq.
- Siulersuisut nutaat maanna siulersuisut APV-mut malitseqartitsinermik aallartitaanik nangitsinissaat kiisalu suliffimmi avatangiisinik pitsanngorsaanissaat naatsorsuutigineqartoq, Aqqaluaq B. Egedep akissutaani allassimavoq.
Rektoriugallartup Annemette Nyborg Lauritsenip aarleqquteqarluni allakkamut atatillugu suliffimmi avatangiisinik pitsanngorsaaniarluni suliamik ingerlatsisoqarnera ilanngullugu paasissutissiissutigaa.
