SNESCOOTERULYKKER
Naalakkersuisut inatsisip sukaterneqarnissaanik isumaliuteqarput
Pinngortitami angallanneq eqqarsaatigalugu inatsisit sukannernerussappat, pikkorissaanerit pitsaanerulissappat imaluunniit paasissutissiisoqarnerussava? Naalakkersuisut peqatigiiffiit suleqatigalugit tamanna misissorpaat.
Hans Peter Poulsen
Leiff Josefsen
Ajutoornerit, ajornerpaamilluunniit
pisoqartillugu ajunaartoqartarnera, Kalaallit Nunaanni pinngortitami
naakkittaatsumi nalinginnaasorujussuuvoq. Ineqarnermut
attaveqaasersuutinullu naalakkersuisup Hans Peter Poulsenip (S)
tamanna ataasinngornermi apriilip 22-ani tusagassiortunik
katersortitsinermi oqaatigaa:
- Pinngortitami angalaneq
isumannaatsuunerulersinniarlugu iliuuseqartoqartariaqarpoq,
inuusuttut pinngortitami ajunaarnerni toqusartut ikilisinniarlugit,
taanna oqarpoq.
Taamaattumik Naalakkersuisut
peqatigiiffiit kattuffiillu pineqartunut attuumassuteqartut
oqaloqatigilersimavaat, siunissami pinngortitami angalaneq
isumannaatsuunerulersinniarlugu qanoq iliortoqarsinnaanersoq
misissorniarlugu.
Pilersaarummik
aalajangiisoqanngitsoq
Kingullermik angutit inuusuttut marluk
Nuup eqqaani qamuteralannik angalanerminni apummik sisoortoqarnerani
ajunaarput. Pisoq taanna attaveqaasersuutinut naalakkersuisup
eqqaavaa:
- Misissussavarput inatsisitigut
amigaateqarnersoq imaluunniit inatsisit sukaterneqartariaqarnersut,
aamma pinngortitami qamuteralannik ingerlatsinermut tunngatillugu
pikkorissarnernik paasissutissiinernillu pitsaanerusunik
pisariaqartitsisoqarnersoq.
- Pinngortitami qamuteralannik
angalanermut tunngatillugu allannguisoqartariaqarpoq, Hans Peter
Poulsen erseqqissaavoq.
Naalakkersuisut peqatigiiffinnik
kattuffinnillu soqutigisalinnik oqaloqateqalersimasut,
naalakkersuisoq ilisimatitsivoq.
- Pinngortitami angalaneq
isumannaatsuunerulersinniarlugu peqatigiiffiit pineqartut
oqaloqatiginerisigut qanittukkut nalunaarummik nutaamik
saqqummiussissaagut, taanna oqarpoq.
