INEQARNERMUT NAALAKKERSUISOQ
Naalakkersuisut siulittaasuat Poulsenimut tamakkiisumik tatiginnippoq
Inatsisartuni illuatungiliuttut partiit arlallit piffissami kingullermi Ineqarnermut Naalakkersuisoq, Hans Peter Poulsen (S) uppisinniaqattaaraluarpaat, taamaattorli taassuma ineqarneq pillugu aaqqissuusseqqinnissamik utaqqisaanikooqisumik imminut suliakkiunneqarnikuusut nangittumik suliarivai. Taassuma sulisitsisua, Naalakkersuisut siulittaasuat, Múte Bourup Egede (IA) Poulsenimut suliaanullu tamakkiisumik tatiginnippoq suliaanillu tapersersorlugu.
Asseq inissiarsuit ilaanni iluarsartuussinermeersoq.
Assiliisoq (toqqorsivimmit): Leiff Josefsen
Sapaatip akunnerani matumani Inatsisartuni ataatsimiinnerit sakkortuuliorfiusumik unillatsiartinneqaqattaarput. Illuatungiliuttut partiivi arlallit pingasoriarlutik ineqarnermut Naalakkersuisoq, Hans Peter Poulsen, atuuffianit uppisinniaqattaaraluarpaat.
Naalakkersuisoq sakkortuumik isornartorsiorneqaqattaarpoq, tatiginninnginnermik nittarsaassiffigineqarpoq aammalu pasillerneqarluni piaaraluni Inatsisartunut paasissutissanik ineqarnermut tunngatillugu inatsisissatut siunnersuutinut atatillugu isertuussisimaneragaalluni Inatsisartut ukiaanerani ataatsimiinneranni matumani, aammalu qinigaaffimmi matumani naggataarutaasumik ukiaanerani ataatsimiiffiusumi.
Múte kissaammerujussuarpoq
Kingullermik tatiginninnginnermik ullormut oqaluuserisassamik Naleraq saqqummiussaqarpoq sisamanngornermi immikkoortoq 45-p oqaluuserineqarnerani, Inatsisartuni amerlanerussuteqartut aammaarlutik pinngitsoortitsiniarlutik saqqummiussaqareersullu, Naalakkersuisut siulittaasuat kissaammersimaqaluni oqaaseqarpoq.
- Maluginiarpara tatiginninnginnermik taasisitsisut taamaassorinninneq aallaavigalugu ingerlatsisut. Ersarissassavara, Naalakkersuisut siulittaasuattut aammalu Naalakkersuisuni sulisitsisutut, ineqarnermut naalakkersuisoq tamakkiisumik tatigigakku, aamma nalunnginnakku toqqammavissani eqqortumik aammalu malitassani malillugit sulinini ingerlakkaa.
Naalakkersuisut siulittaasuata aamma maluginiarsimanerarpaa, ineqarnermut aaqqissuusseqqinnermik aallaavilimmik inatsisissatut siunnersuutit saqqummiunneqaraangata, Inatsisartut ilaasortaat tamarmik periarfissaqartuaannartut naammaginngisatik pillugit ineqarnermut naalakkersuisumut nassuiaaqqusillutik noqqaassuteqarsinnaajuaannartut Naalakkersuisoq naggataarutaasumik oqaaseqareeraangat, taamaattorli pingaartumik uppisitsiniaasut ataasiarlutilluunniit periarfissaqaraluarlutik nassuiaasoqarnissaanik piumasaqarnikuunngitsut.
Illuutileqatigiiffiit inissiaataannut atortorissaarutit annertuumik pisariaqartinneqarput Kalaallit Nunaanni
Naalakkersuisut ukiut ingerlaneranni allanngorartaraluarlutik politikkikkut anguniagaavoq kikkut tamarmik namminneq inissaminnik pilersorsinnaasut namminneq imminnut pilersussasut, namminneerlutillu pigisaminnik initaarsinnaanissamut periarfissaqanngitsut attartornissaannut pisortat neqerooruteqartassasut.
Kalaallit Nunaanni illoqutigiit 22.000-it miissaanniitut akornanni, 10.000-it sinnerlugit pisortat inissiaatileqatigiiffiini, namminersorlutik oqartussaappata imaluunniit kommuniuppata, taakku inissiaataanni attartortuupput.
Pisortat inissiaataasa amerlassusaat 2023-ernisaq, kisitsisit nuna tamakkerlugu pilersaarusiornermi nalunaarusiamit aamma inissiaatileqatigiiffik Iseritsip ukiumoortumik nalunaarusiaanneersuupput.
- Inissiat 5.519 namminersorlutik oqartussat attartortittagaraat
- Inissiat 679 Avannata Kommuniata attartortittagarai
- Inissiat 682 Kommune Kujalliup attartortittagarai
- Inissiat 471 Kommune Qeqertaliup attartortittagarai
- Inissiat 917 Qeqqata Kommuniata attartortittagarai
- Inissiat 2.455 Kommuneqarfik Sermersuup attartortittagarai
Ineqarneq pillugu aaqqissuusseqqinnissamik partiit isumaqatigiissuteqartut (IA & S) isumaqatigiissutigaat ineqarnermut suliassaqarfik oqimaaqatigiittumik ingerlanneqassasoq. Tamanna pingaartumik isumaqarpoq inuit namminneq inissaminnik pilersorsinnaasut namminneq inissaminnik piginnittuunissaannut kaammattorneqarlutillu tapersersorneqassasut, namminnerlu angerlarsimaffimminnik piginnileriaannaanngitsut nangittumik inissianik pilersorneqassasut.
Ineqarnermut Naalakkersuisoq ineqarnermut tunngatillugu suli siullermiigassamik saqqummiussassaqarpoq, taannalu boligstøtte aqqutigalugu illuutinut tunngavoq, ataasinngorpallu saqqummiussassaaassalluni.
