INEQARNERMUT AAQQISSUUSSEQQINNEQ
Ineqarnermut naalakkersuisumut tatiginninnginnermik nittarsaassinerit imaaginnavipput
Illuatungiliuttut Atassut aamma Naleraq ulluni makkunani § 52-mik siunnersuuteqaqattaarput, ineqarneq pillugu aaqqissuusseqqinneq unitsinniarsaralugu. Ullumikkut aamma allaanerunngilaq, Nalerarmi tatiginninnginnermik nittarsaassivoq Inatsisartullu ataatsimiinnerat unitsikkallarneqarpp aaqqissuusseqqinnerup unitsinniarneqarnerani. Ullumikkut aamma taamaappoq, Naleraq sioorasaarutimik ullumi tunniussivoq.
Ineqarnermut attaveqaasersuutinullu Naalakkersuisoq, Hans Peter Poulsen (S) ullut marluk ingerlanerini pingajussaa tatiginninnginnermik nittarsaassiffigineqarpoq, taakkulu tamarmik ineqarneq pillugu aaqqissuusseqqinnermut tunngassuteqarput.
Assiliisoq: Leiff Josefsen
Nunatsinni innuttaasut arajutsisimasinnaajunnaareersimassavaat, Inatsisartuni illuatungiliuttut, pingaartumik Atassut aamma Naleraq, naalakkersuisooqatigiit partiivisa ineqarneq pillugu aaqqissuusseqqinnissamut pilersaarutaat peqataaffigiumanngikkaat.
Taakku partiit marluk ineqarnermut attaveqaasersuinermullu Naalakkersuisumut, Hans Peter Poulsen (S)-imut tatiginninnginnermik nittarsaassisaqattaarput. Ullumikkut aamma taamaappoq.
Naammagittaalliuutit aamma paasissutissanik isertuussinerit
Partii Naleraq tatiginninnginnermik nittarsaasseqqammerpoq, tamatumuuna tunngavilersuutigineqarluni naalakkersuisoq pisussaaffimminik sumiginnaasimasutut aammalu paasissutissanik suliamut pingaarutilinnik piaaraluni nipangiussisimasutut akisussaatinneqartariaqartoq.
Tassa ineqarnermut tunngatillugu tatiginninnginnermik nittarsaassineq ippassartut ullumikkut aamma pivoq , Naalakkersuisullu akisussaanerat pillugu inatsisinik unioqqutitsisimaneragaalluni:
- Ineqarnermut
Attaveqaasersuutinullu Naalakkersuisoq Inatsisartunit suliakkerneqarpoq
aningaasalersueriaatsit taakkulu eqqortumik atuutsinneqarnissaanik
suliaqaqqullugu, ilaatigut piginneqatigiilluni inissianut tunngasunut.
- Naalakkersuisup nammineq peqquneqarsimanini
innersuuppaa, siunnersuutiminili eqqortumik atuutsinneqarnissaanik
innersuussaqarani. Taamaammat Ineqarnermut Attaqevaasersuutinullu
Naalakkersuisoq pisussaaffini malinnagu imaluunniit Inatsisartut
isummerfissaanut pingaarutilimmik nipangiussisimarpasippoq.
- Qulaani pineqartoq tunuliaqutaralugit
siunnersuuteqartariaqarpugut ullormut oqaluuserisassani ikaarsaariarnermut
tulliuttumut Inuutissarsiornermut, Ineqarnermut
Attaveqaasersuutinullu Naalakkersuisoq peqquteqartumik
tatiginnikkunnaarnermik takutitsissalluta isumaqarpugut.
Inatsisartut suli suliarinninngitsut KNR aqqutigalugu ussassaarineq
Tatiginninnginnermik nittarsaassinerpassuit maannakkut pisut aamma pissuteqarput, ineqarnermut naalakkersuisup toqqarsimammagu, Inatsisartut siunnersuutinik suliarinninnissaat sioqqullugu pingaartumik KNR aqqutigalugu annertuumik ussassaarutinik/paasisitsiniutinik ingerlataqassalluni, taakkulu ineqarnermut aaqqissuusseqqinnermut tunngassuteqarlutik.
Illuatungiliuttut tamanna akuersaarsinnaanngilluinnarnerarpaat, ileqqorissaarnerunnginnerarpaat, illersorneqarsinnaanngitsumik iliuuseqarnerarpaat aammalu Inatsisartunut ataqqinninnginnerarpaat, Inatsisartut suliamik suliluunniit oqaluuserinnilinngitsut qulaatiinnarlugit iliuuseqarneragaalluni.
Tamannalu tapertaalluinnarpasippoq Naalakkersuisumut tatiginninnginnermik nittarsaasseqattaarnerit maannakkut saqqummiunneqaqattaarnerannut.
