Naalakkersuisut suliniutinik piviusunngortitsinissaanni periarfissaq kingulleq

Naalakkersuisut siulittaasuata Múte Bourup Egedep Inatsisartut ukiaanerani ataatsimiinneranni, tallimanngornermi ulloq 20. septembarimi aallartittumi, ammaalluni oqalugiaataa ataasinngornikkut oqallisigineqarpoq. Naalakkersuisooqatigiit Siumut Inuit Ataqatigiillu politikikkut suliniutinik, naalakkersuisooqatigiinnerminni aalajangiussaminnik, suli suleqatigiilluartut oqallinnermi ersarilluarpoq.

Oqaaseqartut oqaaseqaatiminni isumaginninnermut immikkoortumi ilungersuutit inuuniarnermilu atugarisat qanoq aaqqiivigineqarnissaat sammivaat, assersuutigalugu meeqqanik pinngitsaaliilluni arsaarinnittarnerit, angajoqqaat akisussaaffimminnik pikkorliortarnerat, imigassamik ikiaroorniutinillu atornerluinerit kiisalu meeqqat kinguaassiutimikkut atornerlunneqartarnerat, nunatta karsiata milliardit affaat tikillugit aningaasartuutigisartagaa.

-Angajoqqaat meeqqaminnut akisussaapput, akisussaaffimminnillu naammassinninniarnerminnik ajornartorsiuteqartillutik, pisortanit ikiorneqarnissamik pisinnaatitaaffeqarput. 

-Pisinnaatitaaffik taanna atoraangamikku, taava aamma pisussaaffimminnik naammassinnissapput. Akisussaaffimmik tigusinissamik pisussaaffeqarpugut, ingiinnarlutalu ikiorneqarnissarput utaqqisinnaanngilarput, Inuit Ataqatigiit oqaaseqartartuat Mariane Paviasen Jensen oqarpoq.

Taassuma aamma peqqinnissaqarfik, kommunit innuttaminnik sullissineraat, inissiat, ilinniartitaaneq meeqqallu atuarfiat, isertitaqarfigisinnaasagut, soorlu imermik nunarsuup sinnerata pisariaqartitaanik avammut niueruteqarneq, inuiaqatigiinni naligiinnginneq sammivai, taamattaaq pisortat suliffeqarfiutaanni pisortaanerit akissarsiaasa, sulisartut akissarsiaannut sanilliullugit qaffasinnerujussuat tikkuarpaa, inuussutissallu akiisa qaffakkaluttuinnarnerat aamma ilanngullugu.

Oqaaseqaammi naggataani Inuit Ataqatigiit aappassaa partiini annersaanerat, Naalakkersuisuusarsimasullu ajornartorsiutit iliuuseqarfigisimanngisaannik aaqqiinissamik akisussaaffimmik tigusisimanerat taavaa.

-Ilungersunartut amerlapput, suleqatigiinnerli aqqutigalugu angusaqarpugut, innuttaasummi inuuniarnermikkut atugaat pitsanngorsartariaqarpavut.

Taamatullu isornartorsiuineq oqaaseqartup Doris Jakobsen Jensenip, Siumumeersup  siusinnerusukkut naalakkersuisuni siuttuusimasuneersumut qatangiinnarpoq.

- Maanna suleqatigiilluta akisussaaffimmik kivitseqataavugut, Doris Jakobsen Jensen oqarpoq, taassumalu oqaaseqaammini qinersinissaq sioqqullugu naalakkersuisut suliniutaasa piviusunngortinnissaat sammivaa.

-Ukiaanerani ataatsimiinneq una immikkuullarissuuvoq, kingusinnerpaamimmi aappaagu apriilip qaammataani qinersisoqartussaavoq, qinersinissarlu sioqqullugu suliassat tigusimasavut naammassiniartussaavagut.

- Suliniutit piviusunngortinnissaannut periarfissaq manna kingulliuvoq, Doris Jakobsen Jensen oqaaseqaammini taama aallarniivoq.

Amerlanerit ilinniagaqarnissamut periarfissaqassapput

Meeqqat atuarfianni naammassisut affaannaat taamaallaat ilinniagaqalersartut nalunaarusiami kingullermi saqqummiunneqarpoq.

- Ikippallaat ingerlaqqiffiusumik ilinniagaqartarput, Doris Jakobsen Jensen oqarpoq.

Nunatta Karsiata naatsorsuutaani ilinniarfinni pingaarutilinni ilinniartut ikippallaartut tiguneqartarnerat, ilinniarfiillu ilaat ikippallaanik ilinniartoqarnerat takutippaa.

- Perorsaasunik amigaateqarpugut, ilinniarfiilli ulikkaarneqarneq ajorput, ilinniarfiillu ilaat ilinniartunik ikittuinnarnik tigusisarput.

Meeqqat atuarfianneersut tamakkerlugit ilinniartinnissaat inuiaqatigiinnut 1 millard kronuuninik akeqassasoq tikkuarpaa, ataasiinnarmillu oqaaseqartut (kalaallisut, aaqqiss.) ingerlaqqiffiusumik ilinniagaqarnissamut periarfissinneqartariaqartut ilanngullugu oqaatigaa.

- Ilisimatusarfimmi ilinniartut oqaatsit ilitsoqqussatik atorlugit soraarummeersinnaanermut ilinniartuminnik periarfissiisinnaappata, taava ilinniarfiit allat assingusumik periarfissiisariaqarput. Taamaalilluni meeqqat amerlanerusut ilinniagaqalernissamut periarfissaqalissapput, Doris Jakobsen Jensen oqarpoq, ilinniartullu ilinniarnermik nalaani imigassartoriaatsiminnik ajornartorsiuteqartut ikiorserneqarsinnaanerat ilanngullugu ujartorpaa.

Nunatsinni sulisartut akissarsiaasa pitsanngorsarnissaat

Naleqqap oqaaseqartuata Jens Napaattuup oqaaseqaammini sulisussaaleqinerup qanoq iliorluni aaqqinneqarsinnaanera sammivaa, tassalu nunanit allanit sulisartunik akikitsunik tikisitsiinnarnani kalaallit sulisartut akissarsiaasa qaffannerisigut.

- Aningaasarsiornerput pitsanngorsartariaqarparput. Akissarsiat appasippallaarput. Ataasiakkaanuinnaanngitsoq, piffinnili tamani pitsannguisinnaanermik periarfissanik takunniffigisinnaasatsinni. 

- Isumaginninnermi suliaqartut, suliffissuarni sulisut, eqqaavilerisut aningaasarsiaqarlutillumi sulisartut amerlasuut allat aningaasarsiaat mikivallaarput. 

- Tamanna akuersaarneqarsinnaanngilaq.

-  Nunanit piitsunit sulisussarsiortarnerput kia akuerisinnaavaa? Akueriinnanngilarput. Pilerilersitsiniarluta sulisartut nunatsinneersut aningaasarsiaat allatut ajornartumik aaqqittariaqarpagut, taamaaliorlutalu aningaasarsiaat aningaasartuutaannut naapertuuttunngortissavagut. Suliffeqarfiittaaq pilerinartuusariaqarput, taamaalilluni sulisartut nerisassanut, ineqarnermut kiisalu meeqqaminnik pilersuinissamut ileqqaagaqarlutillu akissaqalersinnaaqqullugit, Jens Napaattooq oqarpoq.

Angusat ajortorpassuit

Demokraatit siulittaasuata Jens Frederik Nielsenip sooq naalakkersuisut siulittaasuata Múte Bourup Egedep sapinngisamik kingusinnerpaamik qinersisitserusunnera paasilluarsinnaavaa.

- Qinersinissaq sioqqullugu pitsaasunik angusaqarnissamik neriuuteqartut eqqarsarpunga. Tamannalumi pisariaqartivippaat, Jens Frederik Nielsen oqarpoq.

Taassuma isumaa naapertorlugu Naalakkersuisut angusaqarnerlupput, soorlu peqqinnissamik isumaqatigiissut, tassanilu peqqinnissaqarfimmi sulisut akuttunngitsumik innuttaasut pakatsissutaat naalaartariaqartarpaat, taakkuli naalakkersuisunut inatsisartunullu saqqummiunneqartariaqaraluarput.

Jens Frederik Nielsenip ilanngullugu akileraartarnermik aaqqissusseqqinneq tamakkiisumik aningaasalersorneqanngitsoq, aningaasanilli atugassaagaluanik aallerfiuinnartoq pitsaannginnerarpaa.

- Akiligassat meeqqat inaanniittunut akiligassanngortinneqaratarsinnaavoq. Taamatut periuseqarneq soorunami eqqarsarnartuuvoq, tamannali IA-p Siumullu qinersinissaq sioqqutitsiarlugu tunioraarusunnerannik patsiseqarpoq.

Taassuma isumaa naapertorlugu aalisarnermut inatsimmi angusarissaartoqanngilaq, tamatumani aalisakkanik suliffeqarfissuit sanngiillisinneqarput, aalisartunullu siunissaq isumannarsivoq, soorluttaaq aalisakkerivinni suliffiit ikilineqartut, taamatullu Siumup naalakkersuisullu suliap ingerlanerani immikkut ilisimasalinnik, aalisartunik kattuffinnillu naalaarsimannginnerat oqaatigaa.

- Kingulissatta IA Siumullu alisarnermut inatsimmik nutaamik ajoqusiisussanik kinguneqartussaaneranik aarlerisaaruterpassuit tusaanagit akuersisutut eqqaamajumaarpaat, Jens Frederik Nielsen oqarpoq.

Akileraarut apparli

Atassutip siulittaasua Aqqaluk Clasen Jeremiassen kiffaanngissuseq akisusaaffillu ataqatigiittut isumaqarpoq, taannalu allaffissuillu akissoqisut aqqutigalugit eqiterillunilu qulaaniit aqutsineq isoraa.

- Nunarput kommunistinngoriartorpoq.

- Akileraartarnermik aaqqissuussisoqartillugu, tamanna akileraarutip kikkunnut tamanut misinnartumik apparneqarneranik kinguneqartariaqaraluarpoq. Aningaasalli sumi nassaarissavagut? Qitiusumi allaffissornerujussuarmit taamaallaat nanisinnaavagut, Aqqalu Clasen Jeremiassen oqarpoq.

Akileraarut apparneqarpat sulisussaaleqineq qaangerneqassasoq taanna isumaqarpoq.

- Ilinniarsimaneq sulinerlu pilerinarnerulissapput, sulisartullu nunanit allaneersut ikilissapput, uagummi nammineerluta ilinniartitaaneq aqqutigalugu suliffinnik inuttaliisinnaalissaagut. Qanoq ililluni nunami suliffissaaleqisoqarlunilu sulisussaaleqisoqarsinnaava? Tamanna taamaallaat nunami politikikkut nakkutigineqartumi socialistillu ingerlatseriaasiannik iluatsinngitsumik ingerlatseriarnermi taamaallaat pisinnaavoq. Politiki piumasaqarfiunngitsoq akisussaassuseqarnissamillu piumaffiginngitsoq.