Naartuersittartut amerlisut: Ukiuni qulini aatsaat taama amerlatigisut

2023-imi arnanit 988-init 46-it marloriarlutik naartuersipput.

Paasissutissat ilaat Nakorsaaneqarfiup nalunaarutaani atuarneqarsinnaasumi taama allassimavoq.

Nalunaarusiamimi allaqqavoq arnat naartusinnaasut 1.000-iuppata naartuersittut 2.572-iusut. Taamaalilluni arnat 1.000-iuppata ernisut 1.731-iullutik, arnat amerlassusaannut sanilliullugit ukiumut uumallutik inunngortuniit naartuersittut amerlanerujussuupput.

Arnat inuusuttuaqqat naartuersittut amerlanerusut

Nakorsaaneqarfik aamma allappoq naartuersittut amerlanersaat 20-it 24-illu akornanni ukioqartut, 15-illi 19-illu akornanni ukiulinni amerlangaatsiarlutik. 

15-it inorlugit ukiulinni sisamat naartuersipput.

Nakorsaaserlutik naartuersittut

Nakorsaatit atorlugit nartuersittut 870-iupput, 158-it suliaritillutik arfinillillu nakorsaatit atorlugit naatuiineq iluatsinngimmat kiliortittariaqarsimallutik.

Tasiilami suliaritillutik naartuersittut amerlassutsimikkut nuna tamakkerlugu suliaritillutik naartuersittut pingajoqarterutigaat.

- Tasiilami suliaritillutik naartuersittut amerlassutsimikkut nuna tamakkerlugu suliaritillutik naartuersittut pingajoqarterutigaat, tamannalu nuna tamakkerlugu naartueeriaatsit assigiinngitsunut agguataarnerini, suliaritillutik naartuersittut nuna tamakkerlugu akulikippallaatut misingersorneqarnerisigut kukkunertut isikkoqalersitsisinnaavoq, Nakorsaaneqarfik allappoq.

Inuttut atukkat aallaavigalugit naartuersinnerit

2023-imi arnat 28-it kingusissukkut naartuersinnissamik qinnuteqarput, taakkunannga 27-it akuerineqarput ataaserlu itigartitaalluni. 

Naartuersittarneq pillugu isumalioqatigiinnit akuerisanit 27-init 22-ini inuttut atukkat tunngaviupput. Kingusissukkut naartuersinnissamut akersinissamut patsisaasut pingarnerpaat tassaapput anaanatut kisimiittuuneq, inuttut inerisimannginneq, ilaqutariittut inuuneq aamma imaluunniit ineqarneq, tarnikkut ajornartorsiutit, nakuuserneq, aanngajaarniutinik atuineq.

- Sisamat naartup innorluuteqarnera innorluuteqarsinnaanerataluunniit ilimanaateqarluinnarnera pissutigalugu kingusissukkut naartuersinnissamut akuerineqarput. Kingusissukkut naartuersittumi ataatsimi arnap nammineq napparsimanera akuersinermi tunngaviuvoq.

Ukiuni qulini aatsaat taama amerlatigisut

Ukiuni qulini kingullerni arnat naartulersinnaasut amerlassusaat eqqarsaatigalugu naartuersittut amerlanerpaaffiat 2023-mi pivoq, ukiullu qulit kingulliit sanilliullugit amerliartupiloorfiusimalluni.

Naartuersinnerit nalunaarsorneqarluarnerunerat nalunaarutigineqartarnerallu sukumiinerulersimanerat, naartuersinnerit amerliartornerannut pissutaasinnaasoq Nakorsaaneqarfik ilisimatitsivoq.