Nakorsaanerup akiuussutissamik nutaamik neqeroortoqarnissaa ilimagaa
Utoqqaat katsorsarneqarsinnaanngitsunillu nappaateqartut ukiaru coronamut nualluummullu akiuussutissamik kapitinnissamut neqeroorfigineqarnissaat ilimanarpoq.
Leiff Josefsen
Utoqqaat 65-ileereersimasut katsorsarneqarsinnaanngitsunillu nappaateqartut ukioq manna coronamut nualluumullu akiuussutissamik kapitinnissamut neqeroorfigineqaqqinnissaat, nakorsaanerup Henrik L. Hansenip naatsorsuutigaa. Tamanna Naalakkersuisunit suli aalajangerneqanngilaq, akiuussutissamilli kapisisoqaqqittalernissaanik nakorsaaneq innersuussivoq.
Innersuut Naalakkersuisut malinniassappassuk, utoqqaat katsorsarneqarsinnaanngitsunillu nappaateqartut amerlanerusut peqqinnissaqarfiup neqeroorutaanik akuersiumanissaat Henrik L. Hansenip neriuutigaa.
- Inuppassuit akiuussutissaqarpiarunnaarsimammata perulunnartumik nappaateqalernissamut illersorneqassagaanni akiuussutissamik kapiteqqinneq pingaaruteqarluinnarpoq, nakorsaaneq Sermitsiaq.AG-mut oqarpoq.
Affaannaat neqeroorummut akuersipput
65-ileereersimasut affaasa missaannaat 2023/24-mi akiuussutissalertinnissamik neqeroorut akuerigaat, taanna ilisimatitsivoq.
- Ukioru napparsimasorpassuaqarnissaa pinngitsoortinniarlugu amerlanerusut akiuussutissalerneqartariaqarput, Henrik L. Hansen oqarpoq. Nunap inuisa 20 procentii siorna akiuussutissalertinnissamik neqeroorfigineqarsimasut, taanna ilisimatitsivoq.
Coronavirusi nutaaq tuniluutianerusoq piulerpoq, tamatumalu Danmarkimi aasaanerani tunillatsissimasut amerliartortippai. Nunatsinni Nakorsaanerup naliliinera naapertorlugu Kalaallit Nunaanni aamma tunillatsissimasut amerliartorput.
- Tunillaassuuttoqarnerali nunami innuttaasut ernumagisariaqanngilaat, nakorsaaneq Sermitsiaq.AG-mut siusinnerusukkut oqarpoq.
