Nalunaaqutaq unnugu kinguartinneqassaaq
Ukiuunerani nalunaaqutaq atuleqqittussanngormat nalunaaqutaq akunnermik ataatsimik kinguartinneqassaaq.
Aasaanerani ukiuuneranilu nalunaaquttap nikisittarnerata atorunnaarnissaanut siunnersuut Inatsisartut maannakkut oqaluuseraat.
Assi: Jesper Hansen
NUNATSINNI NALUNAAQUTTAP INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Unnuaru nalunaaquttap akunneranik ataatsimik sivisunerusumik sinissinnaalissaagut. Ukiuuneranimi nalunaaqutaq atuutilersinniarlugu akunnermik ataatsimik kinguartitsissaagut.
Sapaat oktobarip 26-t unnuap qeqqanut aallartippat nalunaaqutaq akunnermik ataatsimik kinguartillugu arfininngornermut nalunaaqutaq aqqanermut oktobarip 25-annut uteqqissaagut.
Kitaani, Tasiilami, Ittoqqortoormiini Qaanaamilu tamanna pissaaq.
Illersornissaqarfiup sumiiffiini Pituffimmi Danmarkshavnimilu aasaanerani nalunaaqutaq atorneqanngilaq, taamaattumillu sumiiffinni taakkunani nalunaaqutaq nikisinneqassanani.
Aasaanerani nalunaaqutaq marsip qaammataani weekendimi kingullermi aallartissaaq, tassalu Kalaallit Nunaanni arfininngornermi unnukkut nalunaaqutaq aqqanermut akunnermik ataatsimik siuartinneqassalluni.
Politikerit ukiakkut maanna ataatsimiinnerminni Kalaallit Nunaanni nalunaaquttap ingerlaaqatigiiffia allanngortinneqaqqissanersoq oqallisigaat, tassa UTC -3-mut uteqqissanersugut oqallisigineqarluni. Ukiut marluk matuma siorna nalunaaquttap kinguarfissaraluani nikisinngilarput, taamaalilluta Kalaallit Nunaanni nalunaaquttap ingerlaaqatigiiffia UTC-2-mut nuullutigu.
Aasaanerani ukiukkullu nalunaaqutaq atorunnaassanersoq Inatsisartut aamma aalajangertussaavat. EU-mi atorunnaarsitsisoqarpat Kalaallit Nunaanni aamma taama pisoqarumaartoq siusinnerusukkut akuersissutigineqarnikuuvoq.
