Niaqorlunneq qingakkullu aanneq atuartut akornanni atugaasoq

- ASK-ip kommunimit matuneqarnera pissusissamisoorpoq. Atuartummi ilinniartitsisullu eqqarsaatigalugit taamaaliortariaqarsimavoq. ASK-imi oquttoq paasineqareersorlu taamaaliunngikkuni akisussaassuseqanngitsuliornerussammat.

Filmiliortartoq pisortarlu Pipaluk Kreutzmann Jørgensen taama oqarpoq.

Taanna Nuummi atuarfitoqqap aappaani Atuarfik Samuel Kleinschmidtimi, ulluinnarni ASK-imik taaneqartartumi, 4.klassertumik erneqarpoq. Atuarfilli taanna Kommuneqarfik Sermersuumit sapaatip akunnerata siuliani tassa matuneqarallarpoq.

Nuummi atuarfitoqaq alla Atuarfik Ukaliusaq, ulluinnarni USK-imik taaneqartartoq, sapaatit akunnialuit matuma siorna aamma matuneqalertorpoq.

Atuarfitoqqat marluk taakku Nuummi illoqarfiup qiterpasissuani inissisimasuusut oqoqarnerat matuneqarnerannut pissutaavoq.

Qasoqqaneq, niaqorlunneq qingakkullu aanneq

Nuummi atuarfitoqqani marlunni taakkunani atuartut angajoqqaavisa tamanna pakatsissutigaat, ingammik meeqqat atuarfiini pissutsit ajorluinnarnerat illup iluani silaannaap pitsaannginnera angajoqqaat atuarfimmilu siulersuisut qangali maluginiarsimammassuk – kommunilu qangali iliuuseqarsimasinnaagaluarpoq.

Qasoqqaneq, niaqorlunneq qingakkullu aanneq ernermi atuarfiani matuneqaqqammertumi tassa ASK-imi atuaqataata ilarpassuisa ajornartorsiutigigaat, Pipaluk Kreutzmann Jørgensen oqaluttuarpoq.

- Atuarfiup oqunnera tamatumunnga pissutaasorissangativikkaluarlutigu uppernarsarsinnaasimanngilarput, taanna oqarpoq.

Niaqorlunneq, qingakkut aanneq, qasoqqaneq, isikkut qingakkullu ungillerineq anernilunnerlu oqoqarneranut ersiutaakkajupput.

Atuarfiup silaannalunnerujussua ajornartorsiutaasoq, taassuma miserratiginngilaa.

- Kommuni Namminersorlutik Oqartussallu Atuarfik Inussuk pillugu ataatsimoorussamik nalunaaruteqartariaqavipput. Meeqqavut ASK-imi oquttumiipput, iluamik atuartinneqanngillat atuarfiillu marluk akornanni ukiup aappaa avillugu ingerlanerani nooqattaartinneqarlutik. TASSA.

Pipaluk Kreutzmann Jørgensen Facebookimi quppernermini ukiaq manna septembarip 26-ani ilaatigut taama allappoq, atuarfiullu aserfallassimaqisup assiinik ikkussilluni.

Ernera atuaqataalu atuarfitoqqani killiligaanngitsumik matuneqarallartuni klassini allani atuartut atuartitsiviugallartussamut kommunip aaqqissuussineratigut nuunneqarallarput, atuarfissarsuup ammarnissaata tungaanut tassaniissallutik.

Nussorneqarnerat atuartitsinermut kalluaasoq

Pipaluk Kreutzmann Jørgensenip ernera kommunip sunngiffimmi sammisassaqartitsiviani Nuummi illoqarfiup qiterpasissuani Imaneq 20-miittumi maanna atuarpoq. Ernera atuaqataalu atuartunngoramilli atuartitsiviit assigiinngitsut akornanni nussortinneqaqattaarsimasut, Pipaluk Kreutzmann Jørgensen oqarpoq.

- ASK-imi atuartitsivimmi anginngitsumi oqoqanngitsumilu 1. klasserlutillu 2. klasserput. Taava USK-imut kingorna nuutsitaapput, tassanilu ukioq ataaseq atuarlutik. Tamatuma kingorna aggustimi 4. Klassinngortussanngormata ASK-imut nuutsitaaqqipput.

- Ernera atuaqataalu 2. klassernerminni USK-imut nuutsitaapput, 3. klassilu tamaat tassani aamma naammassillugu. 4. klassertussanngormata ASK-imut nuutsitaaqqipput. Taava ASK-i matuneqarmat, atuartitsiviugallartussanut aamma nuutsitaapput.

- 4. klassertut atuartitsissutinik eqqortunik sivisuumik atuagaqartitaanatillu atortussaqartinneqanngillat. Tamanna atuartinneqarnerannut kalluaarujussuartoq isumaqarpunga, taanna oqarpoq.

Kommunimut allagaqartarsimagaluartut

ASK-imi USK-imilu atuartut angajoqqaavi atuarfinnilu taakkunani siulersuisut atuartut ilinniartitsisullu nappakulasarnerat paasititsiissutigalugu kommunimut ukiut ingerlaneranni arlaleriarlutik allagaqartarsimagaluarput.

- Angajoqqaajusugut isumaqarpuguttaaq meeqqavut illuni pisoqaavallaalersimagunavittuni najussallugillu peqqinnanngivissorinartuni isersimasartut. Assersuutigalugu oqummik allanillu meeqqatta peqqissusaannut kingunerlutsitsisinnaasunik ernumassuteqarpoq. Assersuutigalugu oqummik allanillu meeqqatta peqqissusaannut kingunerlutsitsisinnaasunik peqartoq ernummataavoq. Ajornartorsiut tamanna annertoorujussuuvoq, soqutiginngitsuusaaginnarneqarsinnaanngilarlu.

ASK-imi USK-imilu atuartunut angajoqqaarpaat atuarfinnilu taakkunani siulersuisut Meeqqanut Atuarfeqarnermullu Ataatsimiititamut, Meeqqanut Atuarfeqarnermullu Ingerlatsivimmut kommunalbestyrelsenimullu 2024-p naanerani allakkaminni ilaatigut taama allapput.

Ilinniartitsisut nersualaarai

Atuarfik Inussuup Nuummi illoqarfiup qeqqaniittup qaqugu ammarnissaata sivisuumik ilisimaneqannginnera Pipaluk Kreutzmann Jørgensenimut erloqinarnerpaavoq. Atuarfittaassarsuaq taanna atuartunut ilinniartitsisunullu 970-nut inissaqartitsivoq.

Atuarfittaassarsuaq taanna aappaagu aggustimi ammariarpat atuartunik tassani tikilluaqqusisoqarsinnaanngussasoq, Kommuneqarfik Sermersooq nittartakkamigut oktoberip 16-iani nalunaarpoq.

Ammareersimasussaagaluarneranulli ukiuni arlalinni kinguaattoorfiungaatsiareersorlu tamanna tassa pisussanngortoq, kommunip nalunaarummini eqqaanngilaa.

Pipaluk Kreutzmann Jørgensenip ASK-imi ilinniartitsisut nersualaarpai:

- Ilinniartitsisut nersualaarusuppakka, taakkumi tunniusimalluinnarlutillu pitsaanerpaamik angusaqarniarlutillu ilungersormata. Sulinermi atugaat taamaatsillugit, soorunami ajalusoortoqassaqqaarpoq, Pipaluk Kreutzmann Jørgensen nassuiaavoq.