Nunap assingi tusindillit akeqanngitsumik saqqummersinneqartut
Nunap assingi digitaliusut 2224-t Kalaallit Nunaanni pinngortitami angalaarnissaq ajornannginnerulersillugulu isumannaannerulersissavaa. Taakkulu akeqanngitsumik pissarsiarineqarsinnaalerput, Silap pissusianik Nakkutilliisoqarfik paasissutissiivoq.
Nunap assingi nutaat atorlugit nunatsinni pinngortitamiinneq ajornannginnerulersillugulu isumannaannerulernissaa siunertaavoq.
Assi: Leiff Josefsen
Pinngortitami pisuttuartartunut allanullu nunamiittartunut nutaarsiassatsialaqarpoq.
Nunap assingi digitaliusut nutaat Dataforsyningimi akeqanngitsumik pissarsiarineqarsinnaalersut, Danmarkimi Silap pissusianik Nakkutilliisoqarfik tusagassiuutinut nalunaarummi ilisimatitsivoq. Nunap assingi nutaat Kalaallit Nunaanni sumiiffinni sikoqanngitsuneersut piffissami 2018-imiit 2022-mut suliarineqareersut piareerput.
Nunap assingisa digitaliusut amerlasuut suliarineqarnerat Silap Pissusianik Nakkutilliisoqarfiup akisussaaffigisai pinngortitamukarnermi nassarneqarsinnaapput, oqarasuaatikkut imaluunniit quppersakkatut.
- Nunap assingi nutaat Kalaallit Nunaata pinngortitaaniittartunut iluaqutaassapput, taamaattumillu akeqanngitsumik tunniussinnaagatsigit nuannaarutigaarput, Rikke Hougaard Zeberg, Danmarkimi Silap pissusianik Nakkutilliisoqarfimmi pisortaq oqarpoq.
Pisuttunnermi app-imi aaneqarsinnaasoq
Nunap assingi katillugit 2224-t suliarineqarsimapput, taakkulu pdf-itut aaneqarsinnaallutik. Sumiiffiit aallaavigalugit nunap assingi oqarasuaammut angallattakkami app-imi nuisinneqarsinnaapput, taamaalilluni sumiinneq takuneqarsinnaalluni, Silap pissusianik Nakkutilliisoqarfik ilisimatitsivoq.
Nunap assingi pillugit paasissutissat kalaallisut, qallunaatut tuluttullu atorneqarsinnaapput. Taakkulu anillatsinneqarsinnaallutik.
Nunap assinga 1:50.000-imik annertussuseqarpoq, nunallu assinga nutaaq Klimadatastyrelsen, Asiaq, Namminersorlutik Oqartussat, Illersornissamut ministereqarfik, Atortussanik pisiortornermullu aqutsisoqarfik aamma A.P. Møller nulialu Chastine Mc-Kinney Møllerip aningaasaateqarfia suleqatigalugit suliarineqarpoq.
