NUNANIT ALLANIT
Nunarsuarmi isumannaallisaaneq pillugu Trump Nato-llu pisortaa Floridami oqaloqatigiipput
Donald Trumpip Nato nukittorsarpaa, taamak isumaqarpoq Mark Rutte, oktobarimili suleqatigiinnermut siuttuusoq.
USA-p præsidentissaa, Donald Trump (saam.), Nato-p pisortaa Mark Rutte (taler.) Floridami naapippaa. Nunarsuarmi sillimaniarneq oqaluuserisimavaat, oqaaseqartartoq oqarpoq.
Assiliisoq (toqqorsivimmit): Saul Loeb, Wojtek Radwanski/Ritzau Scanpix
Nato-p pisortaa Mark Rutte aamma USA-p præsidentissaa, Donald Trump, Floridami naapeqqammerput.
Taakkua ilaatigut eqqartorsimavaat nunarsuaq tamakkerlugu isumannaallisaaneq, Nato-p oqaaseqartartua ilisimatitsivoq.
Taama allappoq nutaarsiassaqartitsivik AFP.
Naapeqatigiinneq pivoq tallimanngornermi illoqarfimmi Palm Beachimi.
Trump aamma Rutte oqaloqatigiipput nunarsuarmi isumannaallisaanermut unammilligassat pillugit, oqaaseqartartoq Farah Dakhlallah oqarpoq.
Arfininngornermi danskit nalunaaqutaat naapertorlugu ullaap tungaani naapeqatigiinnermut tunngatillugu paasissutissat amerlanerusut suli saqqummiunneqarsimanngillat.
Hollandiami aviisi De Telegraaf allappoq tallimanngornermi, hollandiamiut timmisartuat Rutte-mik ilaasoqartoq Mar-a-Lago-mi, Donald Trump-ip pigisaani, missimasoq.
Mark Rutte oktoberimiilli illersornissamut suleqatigiiffimmi Nato-mi pisortanngorpoq. Siusinnerusukkut taanna Hollandimi ministeriuneruvoq.
USA-mi præsidentitut atuuffimmini siullermi Donald Trumpip nunat Nato-mi ilaasortat annertuumik piumaffigivai, taakkua bnp-mik 2 procentii ataallugit illersornissamut atuisnerat avoqqaaralugu.
Mark Rutte naapertorlugu Trump suleqatigiinnerup nukittorsarneranut peqataasimavoq.
Nato tassaavoq nunat 32-it, Amerika avannarlermiit Europamiillu, ilaatigut Danmarkit nunatsinnillu ilaasortaaffigineqartoq. Nunat illersornissamut isumannaallisaanermullu suleqatigiipput, ilaatigut Ukrainemi sorsunneq pillugu aamma suleqatigiillutik.
Ukrainemi ilaasortanngornissaminut kissaateqarpoq, kisianni massakkut periarfissat ersarissut takuneqarsinnaanngillat.
Trumpip qinigassanngortinnera nunat EU-mut aamma Nato-mut ilaasortat akornanni ernumassuteqartitsisimavoq. Pingaartumik USA-p Ukrainemut illersornissamut tapersersuinera qanoq sunniuteqassanersoq ernumassutigineqarluni.
Nato-p pisortaanit Mark Rutte-mit oqaatigineqarpoq, ernumassutissaqanngitsoq.
- Donald Trump ilisarisimavara. Hollandimi ministeriunertut siornatigut suligallarama ukiuni arlalinni suleqatigisimavara.
- Uanga nalunngilara, taassuma tamakkiisumik paasisimagaa, Ukrainemi sorsunneq Ukrainemut taamaallaat tunngassuteqanngitsoq. Aamma USA-p siunissami isumannaatsuunissaa pineqarmat, Nato-p pisortaa oktobarimi taama oqarpoq.
USA-mi qinersinermi novembarip tallimaani Trump qinigaaqqippoq.
Taanna januaarimi præsidentinngussaaq.
