Nunat Avannarliit Siunnersuisoqatigiiffiani allannguisoqartoq: Kalaallit Nunaat aqutsisuni aalajangersimasumik ilaasortaalerpoq
Nunat Avannarliit Siunnersuisoqatigiivisa suleriaasaat allanngortinneqarluni Kalaallit Nunaat, Savalimmiut Ålandilu Nunat Avannarliit siulittaasoqarfiani aalajangersimasumik ilaasortanngorput.
Kalaallit Nunaata Nunat Avannarliit Siunnersuisoqatigiivinut ilaasortai: Mariane Paviasen Jensen aamma Justus Hansen
Assi: Inatsisartut
- Kalaallit Nunaannut nunallu avannarliit suleqatigiinnerannut ulloq oqaluttuarisaanermi eqqaamaneqartussanngorpoq.
Politikeri Inatsisartunut Nunallu Avannarliit Siunnersuisoqatigiivinut ilaasortaq Justus Hansen (D) taama oqarpoq.
Nunat Avannarliit Siunnersuisoqatigiivini ukiumoortumik ataatsimiinnermi Sverigemi sapaatip-akunnerani matumani pisumi suleriaatsip allanngortinneqarnissaata akuerineqarnera nuannaarutigalugu, tusagassiuutitigut nalunaarutigalugu allappoq.
Allannguineq Nunat avannarliit siunnersuisooqatigiivisa siulittaasoqarfianiittut ukiumoortumik ataatsimiinneranni Kalaallit Nunaat, Savalimmiut Ålandilu aalajangersimasumik peqataasalernissaat qulakkeerneqarpoq.
- Nunat taakku pingasut siunissami Danmark, Norge, Sverige, Finland Islandilu assigalugit nunani avannarlerni suleqatigiinnermut sunniuteqartartunut aalajangiinerni qitiusuni peqataasarnissaat aalajangerneqarpoq, Nunat Avannarliit Siunnersuisoqatigiivi tusagassiuutitigut nalunaarummi allapput.
Ukiorpassuarni ataavartumik sulineq
Justus Hansen (D) aamma Mariane Paviasen (IA) Sverigemi ataatsimiinnermut peqataapput, aallartitallu siulittaasuat Justus Hansen allannguineq Kalaallit Nunaata nunat avannarliit suleqatigiinneranni ilaasortatut namminerisaminik naligiissumillu inissisimanissaa akueritinniarlugu ukiorpassuarni ataavartumik suliniarnerup inernerigaa oqaropq. Siulittaasoqarfimmi oqaaseqarsinnaatitaalerneq Kalaallit Nunaannit isummat pingaarnersiuinerillu nunani avannarlerni nunat allat assigalugit toqqaannartumik saqqummiunneqarsinnaalerlutik.
- Tamanna Kalaallit Nunaata Nunat Avannarliit Siunnersuisoqatigiiffianni tamakkiisumik ilaasortanngornissaanik Kalaallit Nunaata anguniagaanut alloriarnertut pingaartutut isigaarput. Nunat Avannarliit suleqatigiinneranni Kalaallit Nunaata nunanut naligisatut akuerineqarnissaa qularnaarniarlugu nunani avannarlerni naalakkersuisunik oqaloqateqartarnivut ingerlateqqissavagut, Justus Hansen oqarpoq.
Kalaallit Nunaata Nunat Avannarliit Siunnersuisoqatigiivinut peqataasarnera oqallisigineqangaatsiarnikuuvoq. Naalakkersuisut nunani avannarlerni ministerit siunnersuisooqatigiiffianni peqataarusunnginnertik pissutigalugu Sverigemilu ataatsimiinnermi naammassineqaqqammersumi ilaanngillat.
Kalaallit Nunaata ministerit siunnersuisooqatigiivini inissisimaffia suli aalajangerneqanngitsoq
Kalaallit Nunaata ministerit siunnersuisooqatigiivini nipaat allanngortinneqassappat Helsingforsimi isumaqatigiissut, nunani avannarlerni suleqatigiinnermut tunngaviusumik inatsitut taaneqartartoq, allanngortinneqartariaqarpoq.
Suleqatigiissitat allannguisoqarsinnaaneranik maanna nalilersuipput, Mariane Paviasenillu tamanna Kalaallit Nunaata suleqatigiinnermut nukimmik atuiuarnissaminut aalajangiisuusutut oqaatigaa:
- Suleqatigiissitami sulineq qaammatini qulini ingerlasimavoq, naalakkersuisullu ukioq ataaseq sinnerlugu isumaqatigiissutip nutarterneqarnissaa suliarisimallugu. Nutarterinerup aatsaat 2027-mi naammassineqarnissaa naatsorsuutigineqarpoq. Utaqqisinnaanerput killeqarpoq suliallu ingerlanera sivitsortuussappat Kalaallit Nunaanni nukivut suliassaqarfinnut allanut atussanerlugit isumaliutigisariaqarparput, Mariane Paviasen oqarpoq.
