Nutarterneqarpoq
Pisatamik pasinartumik nassaartoqareernerata kingorna: Nuummi mittarfik ammarneqaqqippoq
Kalaallit Nunaanni Politiit Nuummi mittarfimmut aqqutit pingasunngornermi ualikkut assiaqusersorlugit matuaat. Inuit mittarfimmi illuutinit timmisartunillu qimagutitinneqarput, pasinartumik nassaartoqarnerata kingorna. Ualilluinnaraa mittarfik ammaqqinneqarpoq.
Servicebygning og terminal i Nuuk Lufthavn er evakueret.
Foto: Privatfoto
OBS: Greenland Airportsimit paasissutissanik allaaserisaq nal. 16.05 ilaneqarpoq.
Nuummi mittarfimmiittut aneqquneqarsimapput qimagussuutsinneqarlutillu. Sermitsiap paasissutissaatai naapertorlugit timmisartorsuarmi Tuukkami ilaasut, mittarfimmi sullissivik angalasullu isersimasarfii nal. 14.00 missaani inuerutsinneqarsimapput.
Angalasut tikittullu isersimaffigisinnaasaaniittut mittarfik qimallugu aallariartortut biilinut unittarfiannukaanneqarsimapput.
Greenland Airportsimi attaveqatigiinnermi pisortaq Mikkel Bjarnø Lund oqaluttuarpoq mittarfiup securityani pisatamik pasinartumik nassaartoqarsimasoq. Sunarpiaq nassaarineqarsimanersoq oqaatigisinnaanngikkallarpaa.
- Periusissiat eqqortut malillugit iliorpugut inuillu qimagussuutsillugit. Suliaq politiinut maanna tunniunneqarpoq, oqarpoq.
Mittarfik ammaqqittoq
Mikkel Bjarnø Lund Sermitsiamut nal. sisamanngorluinnartoq ilisimatitsivoq pisataq suussusersineqarsimasoq, aarlerinartoqanngitsorlu.
- Mittarfik ammarneqarsimalerpoq. Misissuinerit takutippaat aarlerinartorsiortoqanngitsoq.
Timmisartuussineq maanna aallarteqqinneqalerpoq. Kinguaattoortoqalaarnissaa ilimageqquneqarpoq, angalasussammi sumiiffimmit qimagussuutsitinneqarsimasut timmisartoqarfiliarnissaat utaqqineqaqqaartariaqarmat.
- Nuannaarutigaarput sulisut pisumi periusissianik malinnilluinnarlutik iliuuseqarmata, Mikkel Bjarnø Lund oqarpoq.
Assersorsimasut ataqqisigit
Kalaallit Nunaanni Politiit aamma mittarfiup tungaanut ualeq manna aqqusinernik assersuipput.
Politiit Facebookimi allapput mittarfimmit qimagussuutsitsisoqartoq pasinartumik nassaartoqarsimanera pissutigalugu, maannalu sumiiffimmi misissuinerit ingerlanneqaleruttortut.
- Innuttaasunut kaammattuutigissavarput qanilleqqunagit aammalu politiit assersuinerannut ataqqinneqqullugit, politiit allapput.
Mittarfimmi illuutit tamarmik timmisartorlu Tuukkaq inuerutsinneqarsimapput.
Brandbiler står klar ved Nuuk Lufthavn. Hele området er evakueret.
Oscar Scott Carl
Flightradar malinnaavigigaanni aamma takuneqarsinnaavoq timmisartoq tulleq, Ilulissaniit Nuummukartoq, Nuummut migani allamut sanguunnartoq.
Pisut pillugit Sermitsiap politiit oqaaseqartinniarlugit sulissutigaa.
