Nuummi anorersuarnissaa aarlerisaarutigineqarpoq
DMI Nuummi Paamiunilu anoraasuarsuannguuttartussamik anorersuarnissaanik aarlerisaarivoq.
Nuummi sisamanngornerup unnukkuani anorersuarnissaa aarlerisaarutigineqarpoq.
Assiliisoq: Leiff Josefsen
Malugiuk: Air Greenlandimit oqaaseqaat ilanngullugu nutarterneqarpoq
DMI-p silassamik ilimasaarutaa naapertorlugu unnugu illoqarfiit pingaarnersaanni anorersualissaaq.
DMI Nuummi Paamiunilu anorersuarnissaanik, anoraasuarsuartut sakkortutigisinnaasunik, aarlerisaarivoq.
Sisamanngornermi unnukkut nalunaaqutaq arfinermut anori sakkortusiartulissaaq tallimanngorullu unnuaani pingasut tungaanut atuutissasoq mianersoqqussutigineqarpoq.
Anorersuaq kujasimmit 25-27 m/s-imik sakkortutigissasoq DMI-p ilimasaarutigaa, anorersuarsuartut 33-35 m/s-imik sakkortutigisumik anoraasuartassalluni. Anorersuarnerani 0-i sinnilaarlugu ississaaq.
Ajoqusertoqarsinnaanera pinaveersaartinniarlugu atortut teqqaasinnaasut isumannaaqqullugit Kommuneqarfik Sermersuup innuttaasunut kaammattuutigaa.
Aamma sanaartorfinni atortunut tunngatillugu, kommuni nittartakkamini allappoq.
Ajornartoornermi kommunip upalungaarsimasui 113-imut sianerfigineqarsinnaapput.
Timmisartuussinissat sunnerneqarput
Air Greenlandimi anorersuarnissaanik ilimasaarummut piareersarneq sapaatip-akunnerata aallartinneraniilli aallartinneqartoq timmisartortitseqatigiiffik Sermitsiamut ilisimatitsivoq.
Angalasussat ilaannut pilersaarutaasumiit siusinnerusukkut angallassinissaq neqeroorutigineqarsimasoq aalajangiunneqarpoq.
- Angalasut arlallit akueraat, ullumikkullu timmisartuussinissamut nuunneqarlutik. Allallu anorersuareerpat aallartussanngortinneqarlutik. Ilaasut eqqugaasut angalanissaasa allanngortinneqarnissaannut tunngasut kingulliit naammasseqqammerput, ilaasullu taakku angalanissamut pilersaarutaasa allanngortinneqarsimanerannik maanna ilisimatinneqareerlutik, Air Greenland ilisimatitsivoq.
