MOTOORI
Nuummi biilit tattorliuuttarnerat biililinnut ilungersunartoq
Kommuneqarfik Sermersuup angallannermut pilersaarutaa 2021-mi saqqummiunneqarmalli Nuummi biilit amerliartuinnavissimapput.
Pingaartumik illoqarfiup qeqqanut aqqutaanerpaasartumi aamma sullorsuup eqqaani angallattoqaleruttornerani aqqusinerni siuleriiaartorpassuusarput. - Ajornartorsiut ilungersunartoq, pilersaarusiornermut pisortaq oqarpoq
Illoqarfiup qeqqata tungaanut Nuussuarmilu sullorsuup nalaani biilinit aqqutigineqarnerpaasartut suli ilungersunarput
Leiff Josefsen
Qinngutsinniit
Nuummut ullut tamaasa biilertartut amerlanerit ullaakkut ualikkullu
aqqusinikkut angallattoqaleruttornera malugisarpaat. Aamma Nuussuarmi
sullorsuaq ima angallaffiutigilerpoq Sullorsuup eqqaani Nuussuarmilu aqquserngit ilarparujussui
siuleriiaarfiulersarlutik tassa biilertorpassuit sullorsuaq avaqqunniarlugu
aalajangertarmata.
Aqqusinerni biilit amerlanerusut
Kommuneqarfik
Sermersuumit 2019-imi aqqusinerni angallattut kisinneqarmata, angallattut
amerleriarujussuarnerat maluginiarneqarpoq, ingammik illoqarfiup qeqqanut
aqqutaanerpaasartuni ukunanilu Sipisaq Kangilleq, Eqalugalinnguit, Peter Thårup
Høeghip Aqqutaa aamma Borgmesterip Anniitap Aqqutaani.
Sullorsuaq
2019-imi 3200-riarluni aqqutigineqarsimasoq kommunip aamma nalunaarsorpaa.
2013-imut sanilliullugu 600-nik amerleriarsimallutik.
Taakku saniatigut kommunip nalunaarsugai
naapertorlugit sullorsuakkut ulloq unnuarlu ingerlaartartut amerleriarsimaqaat.
Biilit sullorsuakkoortartut 2019-imi ullup unnuallu ingerlanerani 3200-uupput –
2013-imut sanilliullugit 600-nik amerleriaateqarlutik.
Taamanimiilli pissutsit ajorsiartuinnavissimapput,
tassa Nuummi biilit ukiut tamaasa amerliartornerisa peqatigisaannik.
2022-2023-iinnarmi aqqusernit 309-nik biileqarnerulersimapput, taamaalilluni
biilit nalunaarsorneqarsimasut massakkut 6.107-iupput. Tamatumunnga
sanilliullugit Nuummi biilit 2019-imi 4.923-upput, kisitsisit
Naatsorsueqqissaartarfimmeersut tamanna paasinarsisippaat.
Ajornartorsiut ilungersunartoq
Kommunalbestyrelsip
kingullermik marsip aqqaneq-aappaani ataatsimiinnerani Kommuneqarfik
Sermersuumi angallannermut politikki nutaaq saqqummiunneqarpoq, tassani
angallannerup ajornanngitsuunissaa, isumannaatsuuneq illoqarfiullu ilua sammineqarput.
Tassunga atatillugu angallannermik nalunaarsuinerit nutaat 2023-meersut
saqqummiunneqarput, taakkunannga takuneqarsinnaavoq Sipisaq Kangilleq -
Eqalugalinnguit - Peter Thårup Høeghip Aqqutaa Borgmesterillu Anniitap
Aqqusernga suli angallaviunerpaasut. Taakku ullormut 10.000-eriarlutik
aqqusaarneqartarput. Ikuallaaviup eqqaani ikaartarfiup atulernera sullorsuup Eqalugalinnguillu
akornanni angallannermut malunnaatilimmik allannguinngilaq. Sullorsuup
ataasiinnarmik ingerlaarfeqarnera tassuunaartoqartarneranut suli
killiliisuuvoq.
Procentinik arfineq-pingasunik annertuseriartoq
Inerniliunneqarpoq angallanneq ataatsimut isigalugu 2021-mut
sanilliullugu 8 procentimik amerleriarsimasoq, angallannerullu annertunerpaamik
amerleriarnera Qinngorpumut Qinngorpumillu pivoq. Ukiut marluk ingerlanerini
procentit qulit missiliorlugit amerleriarsimammat
– Ajornartorsiut aaqqikkuminaappoq. Aqquserngit ulikkaarnerat aaqqissinnaagunanngilarput, assersuutigalugu
aqqusinermi angallaffiunerpaasartumi aqquserngit ilallugit
aqquserniorsinnaannginnatta. Taamaattumik angallannermut tunngatillugu
oqimaaqatigiissaarisariaqarpugut. Assersuutigalugu pisuinnaat sikkilillu
angallannissaat ajornannginnerulersinniarsaraarput, aqqusernillu
ingerlaarfiunerpaasuni ikaartarfiit angallannermik unikaallatsitsinnginnissaat
anguniarlugu, Kommuneqarfik Sermersuup pilersaarusiornermut pisortaa Runa Sværd
oqarpoq.
Eqalugalinnguit unittoorfiusoq
Uuttortaanerit takutippaat Eqalugalinnguit angallannermi unittoorfiusoq,
taamaattumik kommunip Eqalugalinnguit nermallagiaa allanngorlugu biilit
angallaffianni qullermik ingerlanissamut najoqqutassiaqaleriarlugu talerpimmut
sangusarfilernissaa kommunip sulissutigaa.
– Tigussaasumik assersuusiornitsigut angallannermut pitsaasumik
sunniuteqassasoq takusinnaavarput, ullumikkut aqquserngit ikaartarfii
aqqusinikkut angallannermik unitsitsisarput, tamannalu
pinngitsoortinneqarsinnaavoq talerpimmut sanguffissamik biilillu angallannerannut
qullermik najoqqutassamik pilersitsigutta. Angallannerullu ilaanut
unammilligassamik aamma pilersitsisinnaavoq, Runa Sværd oqarpoq.
Sullorsuup allisinnissaa
Nuussuarmi sullorsuaq marlunnik ingerlaarfeqalissasoq, pisuinnaat sikkilertullu aqqutaannik aamma peqalissasoq kommunip suli kissaatigaa.Pilersaarut 2029-mut kinguartinneqarpoq, kisiannili misissueqqaartoqarnissaanut aningaasaliisoqarpoq, Runa Sværd oqarpoq.
– Misissuinissamut aningaasanik immikkoortitsisoqarpoq, tamanna missingersuummi takuneqarsinnaavoq.Qaqqap qanoq inneranik paasissutissanik amerlanernik taamaalilluta peqalissaagut. Aammattaaq Nuussuarmi sullorsuup angallaffiuneranut isumannaannermik aaqqiisoqarnissaanik kinguneqassalluni.