KL

DK

Nuummi pinnguartarfiit kia akisussaaffigai?

Nuumi najukkami ataatsimiititaliap illoqarfimmi pinnguartarfiit kikkunnit aserfallatsaalillugillu iluarsartuunneqarnissaannut akisussaaffigineqarnerat pillugu misissorneqarnissaat kissaatigaa.

: Nuummi illoqarfiup qeqqani pinnguartarfimmi aserfallassimasumi toqqorsivimmit assilisaq. Maanna kommunimi inoqarfinni tamani pinnguartarfinnik piginnittut aserfallatsaalineqarnissaanullu akisussaasut qulaajaavigineqassapput.
Thomas Munk Veirum
Tusagassiortoq
Saqqummersinneqarpoq

Illoqarfiit pingaarnersaanni pinnguartarfinnut, taakkulu meeqqanut pinnguartunut ulorianannginnissaannut kikkut akisussaasuuppat?

Tamakku misissorneqarnissaat Nuummi najukkami ataatsimiititaliap kissaatigaa. Illoqarfimmik ineriartortitsinermut Sanaartornermullu Ataatsimiititaliamut allakkani najukkami ataatsimiititaliap allakkamini Blok 5-p eqqaani pinnguartarfimmi suliaq aallaavigaa.

Suliap misissoreernerani pinnguartarfiup piginnittoqannginnera akisussaasoqannginneralu paasinarsivoq:

- Pinnguartarfiup pisortatigoortumik piginnittoqannginnera maanna paasinarsivoq, tamannalu isumannaatsuunissamut aserfallatsaaliinissamullu tunngatillugu aarlerinarpoq, ataatsimiititaliami ilaasortaq Aviaq Møller Poulsen, najukkami ataatsimiititaliaq sinnerlugu allappoq.

Tamanna tunuliaqutaralugu Nuummi najukkami ataatsimiititaliap illoqarfimmi pinnguartarfiit piginnittuunermut malitsigisaanillu aserfallatsaaliinermut isumannaatsuunissamullu akisussaanermut tunngatillugu misissorneqarnissaat kissaatigaa.

Siusinnersukkut maannakkullu ulluunerani paaqqinnittarfinnut attuumasuteqarnerat pillugu pinnguartarfiit piginnittuunerannut tunngasut maanna paasiniarneqassapput.

Illoqarfimmik ineriartortitsinermut Sanaartornermullu Ataatsimiititaliap saaffiginnissut sapaatip akunnerani uani suliaraa, najukkamilu ataatsimiititaliap qinnutigisaa akueralugu, taamaattoq misissuinerup kommunimi inoqarfiit tamakkerlugit atuutsinnissaa piumasaqaatigalugu.

sikkerhed samfund nuuk lokaludvalg legepladser inuiaqatigiit ejerforhold vedligeholdelse

ATORFIIT Se alle jobs

Powered by Labrador CMS