AASAANERANI SULINNGIFFEQARNEQ

Passi aamma inunngornermut kuisinnermullu allagartat ajunnginnersut misissuiffissanngorpoq 

Kalaallit Nunaanni Politiit sullissiviani ulapaartoqarpoq passinik isumaginnilluni. Aasaaneranimi sulinngiffeqarneq aallartilerpoq, arlalinnullu tamanna isumaqarpoq nunarput qimallugu sulinngiffeqariartornissaq qallisoq. 

2023-mi Kalaallit Nunaanni Politiit passinik 5.516-nik nunatsinni innuttaasunut tunniussisimapput.

Passip atuuffia

  • 18-nik ukioqalereersimaguit passit ukiuni qulini atuuppoq.
  • 2-init 18-nut ukiullit akornanniippat passit ukiuni tallimani atuuppoq.
  • Meeqqamut marlunnik ukiulimmut passi tunniunneqarsimappat ukiuni marlunni atuuppoq.

Danmarkip Nunattalu akornanni angalassagaanni passeqarnissaq piumasaqaataanngilaq, nunanut allanukassamaanngikkaanni biilernermut allagartaq atuuttoq imaluunniit sumi najugaqarnermut uppernarsaat naammapput. Kisianni nunanut allanut, naalagaaffiup avataanut angalassagaanni, soorlu Island aqqusaarlugu nunanut allanukassagaanni, passimik atuuttumik peqarnissaq pisariaqarpoq.

Kalaallit Nunaata Politiivini allattoqarfimmi, passitaarnissamut qinnuteqaatinik arlalinnik maanna suliaqartoqaleruttorpoq. Aasaaneranimi innuttaasorpassuit nunanut allanut angalakkajupput. Tamatumunnga tunngatillugu politeeqarfimmit innuttaasunut kaammattuisoqarpoq:

- Passeqarnerup saniatigut, kaammattuutigaarput inunngornermut kuisinnermullu allagartamik nassartoqartassasoq. Taamaaliornikkut sillimalluartoqarsinnaavoq, angalanermi passeq annaaneqassagaluarpat sullinneqarasuarsinnaanissamut, Louise Høegh, Kalaallit Nunaanni Politiit sullissiviani kontorfuldmægtigiusoq.

Inunngornermut kuisinnermilu uppernarsaateqanngikkuit, pissarsiarisinnaavat oqaluffik aqqutigalugu.

Passilli atuuffeqarnera killeqarpoq. Louise Høegh kaammattuivoq inuit passillit passertik pisoqalisoorsimannginnersoq eqqumaffigissagaat, taannalu nutarterneqartariaqarpat najukkami politeeqarfimmut saaffiginninnikkut nutaamik piniartoqarsinnaavoq. Tamanna aamma atuuppoq inunnut siullermeerlutik passitaarniartunut.

- Sukkasuumik sullissisaraluarluta, naatsorsuutigineqassaaq passip  tikinnissaanut sapaatit akunnerinik pingasunik sivisussuseqarsinnaasarpoq. Taamaattumik kinaassutsimut uppernarsaatit ajunnginnersut eqqumaffiginninnissaq pitsaasuussaaq. Passi nutarterneqartariaqarpat imaluunniit siullermeertumik passitaarniaraanni, pitsaasuusoq piaartumik isumaginissaa sapinngisamillu angalanissamut pilersaarutit aallartinneranni.

Passit uppernarsaatitillu allat paarilluassavatit

Passinik nutaanik imaluunniit nutarterinernik tunniussisarnerit saniatigut, Kalaallit Nunaanni Politiit misigisarpaat innuttaasut pasiminnik arlaannik pissutilimmik annaasaqarnerminni kinaassutsiminnik uppernarsaateqarnissaminnut pisariaqartitsisut:

- Passip annaasoornerani inunngornermut kuisinnermullu allagartap uppernarsaatissamaatitut piginissaa tamaattoqarnerani pisariaqalertarpoq. Nunani allaniinnermi nalinginnaavoq passip nassarneqartuartarnera, tassanilu passip annaasinnaanera annertunerusarpoq. Taamaattumik pitsaasuussaaq inunngornermut kuisinnermullu uppernarsaatip feriarnermi najugaqarfigisami toqqortarineqassappat, taamaalilluni ajornannginnerusumik sukkanerusumillu kinaassutsimut uppernarsaataagallartumik allagartamik pissarsisoqarsinnaammat.

Powered by Labrador CMS