ILULISSANI ILLU IKUALLATTOQ
Pinerluttoqarsimasinnaaneranik takussutissaqanngitsoq
Ilulissani illu tallimanngormat ullaaralaakkut ikuallappoq. Ikuallattoqarneranut kissarsuutip uuliartortup ajoquteqarnera pissutaasoq politiit paasissutissiissutigaat.
Leiff Josefsen
Ilulissani innuttaasut tallimanngornerup ullaavanut piareersaleruttorneranni illumik ikuallattoqarpoq.
Politiit Ilulissani ikuallattoqarneranik tallimanngornermi ullaakkut nalunaaqutaq 06.25 nalunaarfigineqarput.
Kalaallit Nunaanni Politiini pigaartut pisortaata Anette Ostenfeldtip oqaluttuaraa najugaqartut tamarmik illup silataaniissimasut saniliminukarsimallutillu. Putsumik najuussuisimanersut paasiniarlugu napparsimaviliaanneqarput.
Kissarsuut uuliartortoq ikuallattoornermut peqqutaasoq
Kalaallit Nunaanni Politiit ilisimatitsissutigaat ikuallattoqarneranut ikuallaasoqarsimanngitsoq, kissarsuulli uuliartortoq ikuallannermut peqqutaasoq. Pinerluttoqarsimasinnaaneranik takussutissaqanngilaq.
Illumi najugaqartut siunnersorneqarput inissikkallarnissaminnut sillimmasiisarfimmut saaffiginnissasut.
