Aqutsiveqarfik 47-mi umiatsiaararsorluni qaleralinniarluni aalisarnermi pisassiissutinik niuerutigineqarsinnaasunik nammineq pigisanik, aamma PNNP-nik taaneqartartunik, pigisaqarneq aalisartunut annertuumik iluaqutaassasoq, Inatsisartunut ilaasortap Jens Napaattuup paragraf 37 atorlugu Naalakkersuisunut apeqqutaanut, Aalisarnermut Piniarnermullu Naalakkersuisoq, Kim Kielsen, Siumut, akissuteqarluni allappoq.
Akissutigineqartut pillugit Jens Napaattooq tamakkiisumik isumaqataanngilaq, akerlianilli PNNP atorlugu aalisarneq umiatsiaararsortunut periarfissiissutigineqarnissaa pitsaasuusoq, Qalerualinniat Aalisagarniallu Kattuffianni, QAK-mi siulittaasoq Henrik Sandgreen isumaqarpoq.
Aqutsiveqarfik 47-mi umiatsiaararsorluni qaleralinniarluni aalisarnermi pisassiissutinik niuerutigineqarsinnaasunik nammineq pigisanik, aamma PNNP-nik taaneqartartunik, pigisaqarneq aalisartunut annertuumik iluaqutaassasoq, Inatsisartunut ilaasortap Jens Napaattuup paragraf 37 atorlugu Naalakkersuisunut apeqqutaanut, Aalisarnermut Piniarnermullu Naalakkersuisoq, Kim Kielsen, Siumut, akissuteqarluni allappoq.
Akissutigineqartut pillugit Jens Napaattooq tamakkiisumik isumaqataanngilaq, akerlianilli PNNP atorlugu aalisarneq umiatsiaararsortunut periarfissiissutigineqarnissaa pitsaasuusoq, Qalerualinniat Aalisagarniallu Kattuffianni, QAK-mi siulittaasoq Henrik Sandgreen isumaqarpoq.
Utertoqarsinnaanngitsoq
Aalisarnermut inatsit maannakkut atuuttoq naapertorlugu umiatsiaaqqat 6 meteri tikillugu angitigisut, qaleralinniarluni aalisarnermi paggatassiissutinik taamaallaat aalisarsinnaapput. Aalisartulli ilai 6 meteriniit anginerusunik angallatitaarnermikkut PNNP atorlugu aalisalertartut ukiut kingulliit amerliartorput, taamannalu paggatassiissutinik aalisarnermut naleqqiullugu arlalitsigut pitsaaqutitaqartoq, taakku oqaatigisarpaat.
Aalisarnermullu inatsisissaq nutaaq Inatsisartut upernaakkut ataatsimiinneranni akuersissutigineqartoq ukiumi nutaami atuutilerpat, umiatsiaaqqat 6 meterit ataallugit angitigisut qaleralinniarluni aalisarnermi PNNP atussanerlugu imaluunniit paggatassiissutinik aalisassanerlutik namminneq aalajangersinnaalissavaat.
Umiatsiaararsortup PNNP atorlugu aalisarnissani toqqarsimaguniuk pisassiissutit pigisani annaasinnaanngilai, taakkuli ilai tamaasaluunniit tunissanerlugit nammineerluni aamma aalajangersinnaavaa.
Umiatsiaararsortulli PNNP-t tamakkerlugit tunisimagunigit, paggatassiilluni aalisarnermut utersinnaanngitsoq, Aalisarnermut Piniarnermut Aalisarnermullu Naalakkersuisoq Kim Kielsen, Jens Napaattuumut akissuteqarluni ilaatigut allappoq.
PNNP kiffaanngissuseqalersitsisoq
PNNP atorlugu umiatsiaararsorluni aalisarneq paggatassiilluni aalisarnermut naleqqiullugu aalisartumut annertuumik kiffaanngissuseqalersitsillunilu patajaannerulersitsissasoq, aalisartorlu PNNP-mut ikaarsaarnissamut toqqaasimasoq, piffissap qanoq ilinerani pitsaanerpaamik aalisarnissaminik pilersaarusiornissaminut kiffaanngissuseqalersartoq, taamaalillunilu ineriartortitsillunilu pilersaarusiornissamut periarfissarissaarnerulertartoq, Aalisarnermut Naalakkersuisoq oqarpoq.
– Taamaalilluni pisassiissutit tamakkerlugit pisarinissaat sioqqullugu aalisartunut allanut unammissanngilaq, kisianni aalisarneq pitsaanerpaanngoraangat aalisarsinnaasassaaq, ukiullu tamaasa pisassiissutit ilaannik nalunngeriikkaminik aalajangersimasunik peqartassalluni.
– Pisassiissutigineqartut tamakkerlugit pisarisinnaanngikkunigit, ukiup tullianut taakku 25 procentii tikillugit nuussinnaavai imaluunniit ukiumut pisassiissutinit pigisaminit 10 procentit tikillugit tunisinnaallugit, taamaalillunilu pisassaminit nalilimmik suli pissarsisinnaassalluni, Kim Kielsen allappoq.
Aalisarnermut Naalakkersuisoq naapertorlugu aalisartoq angallammik aalisarnermiluunniit atortunik nutaanik pisaarniaruni PNNP-it qularnaveeqqutitut atorsinnaavai aammali PNNP-t ilai kingornutsissinnaavai imaluunniit aalisarnermit tunuarnissani kissaatigiguniuk kinguaaminut ingerlateqqissinnaallugit. Taassuma saniatigut aalisartoq PNNP-nik pigisaqartoq soraarninngornissamik kissaateqaleruni PNNP-it tunisinnaavai, taamaalillunilu aalisarnermut akuujunnaarnermini aningaasanik pissarsissutigisinnaallugit.
Aningaasaqarneq pitsaanerusoq
Aalisarnermut inatsisissaq nutaaq atuutilerpat umiatsiaaqqat 6 meterit ataallugit angitigisut PNNP atorlugu aalisarsinnaatitaalernissaat pitsaasuusoq, Qaleralualinniat Aalisagarniallu Kattuffianni, QAK-mi siulittaasup, Henrik Sandgreenip siornatigut oqaatigisarpaa.
– Umiatsiaararsortut paggatassiissutinik aalisartut aniningaaserivinnut aningaasanik attartorniarunik patajaatsumik aningaasatigut ingerlatsinermut takussutissanik peqarnissaat piumasarineqartarpoq, amerlasuutigullu umiatsiaararsortut taamak ittumik takussutissaateqarneq ajorput.
– Kisiannili pisassiissutinik niuerutigineqarsinnaasunik nammineq pigisanik peqalerunik taakku qularnaveeqqutitut atorsinnaalissavaat, tamannalu umiatsiaararsortut inerisaanissaannut annertuumik iluaqutaassaaq, QAK-p siulittaasua oqarpoq.
PNNP-p umiatsiaararsortunut atuutsinneqalerneratigut umiatsiaararsortut aningaasanik akisussaassuseqartumik aqutsinissaannut pisussaaffiliissasoq, Henrik Sandgreen isumaqarpoq.
Kusassaaneq
PNNP-p umiatsiaararsortunut atuutilersinneqarneratigut paggatassiilluni aalisarnerup qimakkiartuaartinneqarnissaa ernumanartuusoq, Inatsisartunut ilaasortaq Jens Napaattooq, Naleraq, isumaqarpoq.
– Umiatsiaararsortup pisassiissutinik niuerutigineqarsinnaasunik nammineq pigisanik peqalissanerluni nammineerluni aalajangersinnaagaa oqaatigineqarpoq, tamannali paggatassiilluni aalisarnerup qimakkiartuaarneqarnissaanut piareersarnertut taaneqarsinnaavoq, taanna oqarpoq.
Umiatsiaararsortut pisassiissutinik niuerutigineqarsinnaasunik nammineq pigisanik peqalerpata tamanna atugarissaarnerulernissamut aqqutaassasoq Naalakkersuisut oqariartuutigaat, tamannali tigussaasumik uppernarsaatissaqanngitsoq, taamaattumillu Aalisarnermut Piniarnermullu Naalakkersuisup akissutaa pissutsinik kusassaanertut isigineqartariaqartoq, Jens Napaattooq isumaqarpoq.
