Politiit suleriusiat pillugu misissuinermi apersorneqartut affaangajaat naammagisimaanittut
Angutit pinerluffigineqarsimasut arnanut sanilliullugit politiit sulinerat naammagisimaanerusaraat misissuinerup nutaap takutippaa.
Pinerluffigineqarsimasut Danmarkimi, Kalaallit Nunaanni Savalimmiunilu politiinik naammagisimaarinninnerat misissorneqarpoq. Kalaallit Nunaanni innuttaasut 47 procentiisa politiit iliuuserisimasaat naammagisimaarpaat, Danmarkimi 55 procentit Savalimmiunilu 75 procentit.
Assi: Emil Stach
Pinerlineqarsimasut 47 procentiisa Kalaallit Nunaanni Politiit sulinerat naammagisimaaraat Inatsisinik atortitsinermut ministereqarfiup ilisimatusarfiata misissuinerani nutaami paasinarsivoq.
Akerlianik inuit quliugaangata sisamat politiit iliuuserisimasaat naammaginngilluinnarpaat.
Innuttaasut angerlarsimaffimminni nakuuserfigineqarsimasut politiit iliuuserisimasaannik, innuttaasuniit pigisaminnik tillinniarfigineqarsimasunit imaluunniit angerlarsimaffimminnut tillinniarfigitissimasunit naammagisimaarinninnerusinnaasut kisitsisit takutippaat.
Aamma angutit arnanit politiinik naammagisimaarinninnerupput.
Innuttaasut sulianut imminnut tunngasunik politiinit paasissutissanik pissariarisimasaminnik naammaginninngissinnaanerat ilimanarneruvoq, taamaalillutillu politiit sulinerat ataatsimut isigalugu naammagisimaarneq ajorlugu.
Kalaallit Nunaanni inuit 209-t apersorneqarput, taakkualu affaat nakuuserfigineqarsimapput, 60-it tillinniarfigineqarsimapput 41-llu kinguaassiuutitigut pinerlineqarsimallutik.
Danmarkimut sanilliussineq
Pinerlineqarsimasut Danmarkimi, Kalaallit Nunaanni Savalimmiunilu politiit sulinerat pillugu naammagisimaarinninnerat misissorneqarpoq.
Danmarkimi innuttaasut 55 procentiisa politiit iliuusaat naammagisimaarpaat, Savalimmiunilu innuttaasut 75 procentii aamma taamaallutik.
Kalaallit Nunaanni pinerluffigineqarsimasut politiit iliuuserisimasaannik naammagisimaarinninnerat siullermeerluni misissuiffigineqarpoq, Danmarkimili 2019-imi aamma misissuisoqarpoq.
Misissuinerit Danmarkimi Kalaallit Nunaannilu inernerat sanilliunneqarsinnaanissaat misilinneqarpoq, tamannali ajornakusoorpoq.
Nunani taakkunani marlunni innuttaasut qanoq pineqartarsimanerat ilaatigut assigiinngilluinnarnerat peqqutaavoq. Kalaallit Nunaanni innuttaasut tallimaagaangata sisamat sinnerlugit inummut navianartorsiortitsisumik pinerluffigineqarsimapput, soorlu nakuuserfigineqarsimallutik kinguaassiuutitigullu atornerlunneqartarsimallutik, Danmarkimilu innuttaasut tallimaagaangata sisamat sinnerlugit pigisanut tunngatillugu pinerluffigineqarsimallutik.
Kalaallit Nunaanni innuttaasut akissuteqartut ikippallaarnerat sanilliussinissamut aamma nalorninartorsiortitsipput.
Kinguaassiuutitigut pinerluffigineqarneq
Innuttaasut kinguaassiuutitigut pinerluffigineqarsimasut politiit suliarinninnerannik naammagisimaarinnittut Kalaallit Nunaanni Danmarkimilu assigiingajalluinnartut misissuinermi takuneqarsinnaavoq, naak kisitsisit sanilliunneqarsinnaasut amerlagisassaanngikkaluartut.
Taamaakkaluartoq sanilliussineq mianersuuttariaqarpoq, Kalaallit Nunaannimi suliat amerlanerit kinguaassiutitigut pinerlunnerit Danmarkimut sanilliullugit peqqarniinnerupput.
Kalaallit Nunaanni innuttaasut affaasa missaat kinguaassiuutitigut pinerluffigineqartut pinngitsaalineqarsimapput, Danmarkimilu kisitsit pingajorarterutaalluni.
Aammattaaq akeursissuteqarnissamik piumasaqarnermut inatsit nutaaq Danmarkimi 2021-mi januaarimili atuutilerpoq, aatsaalli Kalaallit Nunaanni ukiut marluk matuma siorna, juulimi 2023-mi, atuutilerluni.
