KL

DK

USA-P, DANMARKIP KALAALLILLU NUNAATA ILLERSORNISSAQ PILLUGU ISUMAQATIGIISSUTAAT

Naleraq nipangiussisussaatitaanermik unioqqutitsisimasutut unnerluutigineqartoq: Suliaq politiinut nalunaarutigineqarpoq

Nunanut allanut, Inuussutissarsiornermut Aatsitassanullu Naalakkersuisup USA-mik illersornissamut isumaqatigiissutip aappassaaneerneqarnerani Naleraq sakkortuumik isornartorsiorpaa. Naalakkersuisoq naapertorlugu partiip paasissutissat isertuussat Inatsisartut ataatsimiititaliaata matoqqasumik ataatsimiinnerani saqqummiussimavai.

– Ataatsimiititaliap paasissutissanik isumaginninnermi tatiginninnerunissaanik unioqqutitsineruinnanngilaq, aammattaarli Naalakkersuisut Inatsisartullu Kalaallit Nunaata nunanut allanut politikkianut tunngatillugu suleqatigiinneranni tatigeqatigiinnerat unioqqutinneqarsimavoq, Múte B. Egede (IA) oqarpoq.
Sort-hvidt portræt af en kvinde med mørkt hår iført en mørk bluse foran en lys baggrund.
Ane-Marie Petersen Ane-Marie Petersen Tusagassiortoq
Saqqummersinneqarpoq

Allaaserisaq Pele Brobergip qisuariarnera politiinullu nalunaarut ilanngullugit nutarterneqarpoq.

Nunanut Allanut, Inuussutissarsiornermut Aatsitassanullu Naalakkersuisoq Múte B. Egede USA-mik illersornissamut isumaqatigiissutip aappassaaneerneqarneranut akissuteqaammini partiip ikinnerussuteqarluni oqaaseqaataani paasissutissanik isertuussassanik saqqummiussisimanerarlugu Naleqqamut isornartorsiuivoq.

Naalakkersuisoq naapertorlugu paasissutissat matoqqasumik ataatsimiittoqarnerani Inatsisartut Nunanut allanut Sillimaniarnermullu Ataatsimiititaliaanut saqqummiunneqarput.

Naleraq isumaqatigiinniarnernik isumaqatigiissutimillu isornartorsiuisinnaasoq Naalakkersuisoq erseqqissaavoq, aammali isornartorsiuineq unneqqarissumik pissusissamisoorlunilu saqqummiunneqartariaqartoq isumaqarpoq.

– Naleqqap ikinnerussuteqarluni oqaaseqaammini paasissutissat isertuunneqartut, Naalakkersuisut Inatsisartut Nunanut allanut Sillimaniarnermullu Ataatsimiititaliaannut matoqqasumik ataatsimiinnermi tunniussimasaat, saqqummiuppai. Tamanna ataatsimiititaliap paasissutissanik suliaqarnermini isertuussamik ingerlatsisarneranut unioqqutitsinerinnaanngilaq, aammattaarli Kalaallit Nunaata nunanut allanut politikkianut tunngatillugu Naalakkersuisut Inatsisartuillu akornanni tatigeqatigiinneq unioqqutinneqarpoq. Tamatumalu Kalaallit Nunaata nunani tamalaani tatiginartuunerata ajoquserneqarnera kingunerisinnaavaa.

Isumaqatigiissut taanna Kalaallit Nunaata oqaluttuarisaanerani nunanut allanut politikkimut tunngatillugu iliuuserisimasaasa annersarigaat naalakkersuisup oqaatigaa.

Isumaqatigiissummi siullermeertumik Kalaallit Nunaat USA-mik illersornissaq pillugu suleqatigiinnermi naligiittut akuerineqartoq aammattaaq erseqqissarpaa.

Nipangiussisussaanerup unioqqutinneqarsimasinnaanerata qanoq iliuuseqarfigineqarnissaa nalilersorneqartillugu oqallinneq minutsit 20-t unitsikkallarneqarpoq.

Politiinut nalunaarutiginninneq

Sermitsiap Pele Broberg oqaloqatigaa, taannalu Naalakkersuisup nipangiussisussaanermik unioqqutitsineraanera ataatsimiinnerup taamaatinneqarneranik pissutaanngitsoq oqarpoq. Kisiannili naalakkersuisup Múte B. Egedep Inatsisartunut tatiginninnginnerminik tamanut saqqummiussineranut Kim Kielsenip qisuariarnera pissutaanerarpaa. Pele Broberg naapertorlugu Múte B. Egedep nipangiussisussaanermik unioqqutitsisoqarneraanermini qanoq isumaqarluni erseqqissumik oqaatigisimanngilaa.

Ikinnerussuteqartut oqaaseqaataat ataatsimiititaliamit akuerineqarsimasoq Inatsisartullu Siulittaasoqarfiannut nassiunneqartoq tamatumalu kingorna saqqummiunneqarsimasoq Pele Broberg nangilluni oqarpoq. Taamaammat suna ajornartorsiutaanersoq nammineq paasisinnaannginnerarpaa.

Inatsisartut Siulittaasoqarfiata Naleraq politiinut unnerluutigisimallugu, maannalu suliaq taamatuttaarlu nipangiussisussaaneq unioqqutinneqarsimanersoq politiinit misissorneqaleruttortoq ilisimatitsivoq.

inuiaqatigiit illersornissamut isumaqatigiissut múte b. egede nipangiussisussaatitaaneq naleraq usa

Atorfiit tamaasa takukkit

PODCASTI

Powered by Labrador CMS