Atlantiku qulaallugu Ilulissanut timmisartuussineq siulleq: Mikael qiiaammeqqalluni tussunngullunilu mippoq

- Timmisartuussineq immikkut ittuugaluartoq Atlantikoq qulaallugu angallassineq sulinertut allatulli ippoq. Ilulissat qanilligatsigu qanoq annertutigisoq aatsaat paasilerpara.

Timmisartortartoq Mikael Jakobsen, Air Greenlandip Københavnimiit Ilulissanut sapaatip-akunnerani kingullermi toqqaannartumik timmisartuussinerani siullermi aquttoq, taama oqarpoq.

Mikael Jakobsen Air Greenlandimi timmisartumi A330-800neo Tuukkami timmisartortartuni Iluliarmiutuaavoq. Taamaammallu Ilulissanut timmisartuussinissami aquttuunissani qinnutigisimavaa.

Timmisartuussineq immikkut ittoq

Tuukkaq pilersaarutit malillugit Københavnimiit nalunaaqutaq qulinut aallarpoq. Silagippoq, Norgelu qulaatsillugu aalasoqalaarnera eqqaassanngikkaanni Atlantikoq qulaallugu timmisartuussineq pilersaarutit malillugit ingerlavoq.

- Timmisartuussineq soorunami immikkut ittuuvoq, aallartinnatami mittarfimmi oqalugiartoqarlunilu nalliuttorsiortoqarpoq, ilaasullu tamarmik - angalasut inuttallu - pissangallutik qilanaarmata timmisartuussineq oqaluttuarisaanermut ilanngullunilu Ilulissanut Kalaallillu Nunaannullu nutaarluinnarmik aallartiffiuvoq, Mikael Jakobsen oqaluttuarpoq.

- Ilulissat qanilliartortillugu illoqarfik pukkittumi qulaallugu inuppassuit nalliuttorsiornissamut takkuttut ilassivagut. Tassanili timmisartuussineq taanna qanoq pingaaruteqartigisoq malugineqarsinnaalereerpoq - qiiaammerpungalu.

- Aatsaalli minniarluta apparsartilluta qanoq annertutigisoq paasilerpara. Inuit aqquserngit sinaanni, qaqqajunnani immailu umiatsianiipput. Inupparujussuit tikilluaqquniarluta katersuussimapput.

- Assakaasut mittarfimmut tummata timmisartup iluaniit pingasoriarluni hurraartortoqarpoq. Kalaallit erfalasorpassui anorimi erfalasut takullugit silamilu inuit aalaterisoq takullugit killitsissutigeqaara.

- Tussunngulerpunga qiiaammeqattaaginnalerlungalu. Timmisartuussinermi tassani aquttarfimmiinneq inuunerma sinnerani eqqaamajuassavara.

Nukappiaraalluni takorluugaq

Mikael Jakobsen Ilulissani peroriartorami naak meeraallunili timmisartortarneq nuannarilluinnaraluarlugu timmisartumik Airbusimik illoqarfiup kangerluani minnissaq suli eqqarsaatiginngisaannarpaa.

Mikael Jakobsen 1983-imi inunngorpoq, Ilulissani mittarfitoqqap ammarneraniit ukioq ataaseq sioqqullugu. Timmisartornerli sungiutipallappaa. Aanaa Qeqertarsuarmi najugaqarpoq, ilaqutariillu taamaammat tikeraarlutik S-61-imik timmisartukulapput.

- Ataataga timmisartortartuuvoq. Tamanna meeraaninni ilaqutariinnilu inuunitsinni sunniuteqangaarpoq, neritillutami timmisartut suluusallit qulimiguulillu eqqartorneqartarput, Mikael Jakobsen oqaluttuarpoq.

Aatsaalli aqqaneq-marlunnik ukioqarluni timmisartortartunngornissani takorluulerpaa.

- Ataatama Dash-7-imik timmisartuussinerani aquttarfimmi issiaviit pingajuanni issianissamut akuerineqarpunga. Tassani aallartippoq. Tiguartilluinnarpunga - timmisartortartuussallungalu ulloq taanna paasivara.

Mikael Jakobsen timmisartortartutut ilinniarniarluni aalajangerpoq. Aallaqqaammut nukappiaqqat inaanni qarasaasiami timmisartumik aqussinnaanermut sungiusaammik pinnguartarluni. Taava tuluttut pikkorinnerulerniarluni Afrikap kujataani paarlaaqateqarluni atuariarluni Danmarkimi ilinniarnertuunngorpoq.

Mikael Jakobsen 2005-imiit 2007-imut Oxfordimi timmisartortartutut ilinniarpoq, taamanikkullu aaqqissuussaaneq naapertorlugu ilinniartitaanerit akisuut Namminersornerullutik Oqartussanit akilerneqartarput.

Ilinniakkaminik naammassinngitsiarluni Air Greenlandimi atorfininnissaminik neqeroorfigineqarpoq - taamaalillunilu nunatta timmisartortitseqatigiiffiani timmisartortartutut aallartippoq.

- Dash-7-imik kingornalu Dash-8-mik timmisartortartutut aallartippunga, naggataatigullu timmisartup naalagaatut atorfeqalerlunga. Ingerlariaqqillungali timmisartorsuarni aquttunngorusuppunga.

Mikael Jakobsen Air Greenlandimi sulinngiffeqarluni danskit timmisartortitseqatigiiffianni Cimbrer Airimi sulilerpoq, tassanilu ukiup aappaa avillugu timmisartumik mikisumik CRJ 900-mik, Skandinaviami aqqutini sivikitsuni atorneqartartumik, timmisartorpoq.

A330-mut akuerineqartoq

Tamatuma kingorna Dash-8-mi naalakkatut Kalaallit Nunaannut uterpoq, siornali ukiakkut Airbus A330-mut ilinniartinneqarnini aallartippaa. Timmisartumut akuersissummik marsimi tunineqarpoq – Mikael Jakobsenilu Københavnip Ilulissallu akornanni toqqaannartumik timmisartorsinnaalernissamik takorluuisinnaalerpoq.

Takorluukkani sisamanngornermi piviusunngortippaa, timmisartuussinermili ataasiinnarmi.

Air Greenlandimmi Københavnip Ilulissallu akornanni timmisartuussinera ukiumi aggersumi Jettimemit Boeing 737-800-mik timmisartuussiffigineqassaaq. Air Greenlandip timmisartumik nutaamik A320neo Unaamik, maanna Oslomi piareersarneqaleruttortumik apriilimilu atulertussami, apriilimi timmisartuussisalissaaq.

Taava Mikael Jakobsen Ilulissanut timmisartuussisaleqqissaaq.

- Taamanikkussamut Ilulissanut timmisartuussisalerniassagama maannakkut A320-mik timmisartuussisalernissannut ilinniartinneqarpunga, Mikael Jakobsen oqarpoq.