Politikerit aamma imaattarput: Mikrofoonit qaminneqaraangata

Arnaq Nielsen nunatsinni tusagassiortuni ilisimaneqarluarnerpaanut ilaavoq. Atuartartut tv-miittarneranit ilisarisimavaat.

Maannalu Sermitsiami oqallitsitsisartunngorpoq, tassanilu ilaatigut podcastinik suliaqartassaaq.

Politikki sulisartutut inuunerani annertuumik sammisaraa. Ukiut 15-inngulersut matuma siorna KNR-imi tusagassiortutut siullermeerluni qineqqusaarneq sammivaa.

Atorfeqarnermini qinikkat nalunngillualernikuuai – qineqqusaarnerillu sukaruttorfiini – pissusaat innuttaasut tamatigut takusanngisaat takusarpai.

- Oqallinnerni inuillu qarasaasiakkut naapittarfiini oqallinnerit sakkortusinnaasaqaat. Mikrofonilli qamikkaangata illaqatigiissinnaasarput. Inuinnartut imminnut pissusilersoqatigiittarnerat alutorisarpara, Arnaq Nielsen nassuiaavoq imalu nangilluni:

- Innuttaasut aamma pissussat taakku misiginerullugit nuannaarutigisinnaagaat isumaqarpunga.

Fixerinik ujarlertut

Arnaq Nielsen ulluni makkunani Sermitsiami podcastissaminik nutaanik piareersarpoq. Nunatsinni tusagassiornermi tamanna nutaaliorneruvoq. Qanoq iluseqarumaarnera oqaatigissallugu suli siusippallaarpoq, aallakaatitseqqaarnissarli sioqqullugu qilanaarutissaqartoq oqaatigisinnaakutsoorparput.

Arnaq Nielsen tusagassiortutut politikikkut atuumassuteqanngitsuuvoq, taamaammallu apersuinermi maani aamma partiit ataasiakkaat iliuusaat qineqqusaarutinilu mamakujuttuusiaat, politikimi innuttaasut taasilernerini saqqummiunneqartartut pillugit aperissanngilarput. Qinersinissamili amerlasuunik allanik soqutiginartunik sammisassaqarpoq. Assersuutigisinnaagunarparpullu apeqqutit pingaarnersarisinnaasaat: Innuttaasut qanoq ililluni akuutinneqassappat, taamaalillunilu qinersinerni pingaarutilinni arlalinni qinersiartortartut aarlerinartumik ikittut amerlillutigit?

- Matumani politikerit suliaminnik isumaqatigiissinnaanerminnik takutitsisinnaanerat iluaqutaassasoq isumaqarpunga. Politikerneq tamatigut illuatungeriilluni akerleriiginnaleraanni inuit politikimik qatsussisarput, Arnaq Nielsen oqarpoq.

- Nunanit allanit qinersinissap soqutigineqarnerujussua qanoq sunniuteqassava?

- Avataanit tikerartoqangaatsiarnera amerlasuunut annertuumik sunniivoq. Trump Jr.-ip tikeraarnerata kinguninngua tusagassiortorpassuit Nuummukaapput. Tusagassiortut maaniittut tamarmik attaveqarfigineqarput. Siusinnerusukkut misiginikuunngisaannakkatsinnik misigisaqarpugut – tassa tusagassiortut nunani allaneersut fixerinik ujartuilernerat, Arnaq Nielsen oqarpoq.

Tusagassiornerup silarsuuaani fixerit tassaapput inuit tusagassiortunik angalasunik nutserisussatut, angallanneqarnermik aaqqissuisutut, apersugassanik ujaasisussatut, paasiniaasartutut apersorneqartussanillu isumaqatigiissussiortussatut akilerlugit ikiuuttussat.

- Tamanna nalinginnaasumik piffinni sorsuffiusuni atorneqartarpoq. Tassanngaannarli tamanna aamma maani pileriasaarpoq. Tamanna uatsinnut nutaarluinnaavoq, Arnaq oqarpoq.

Ulluinnarni politikkerneq

- Nunanit allanit tusagassiortut pissutaallutik qineqqusaarneq manna assersuutigalugu inuuniarnermi atukkanit aalisarnermillu sammisaqarfiunani namminiilivinnissamik sammisaqarfiunerussasoq isumaqarpit?

- Minik Rosingip apersorneqarnerluni akinermini, tusagassiorfiit nunanit allaneersut politikki ulluinnarni sammineqartartoq nunatta innuttaanut pingaaruteqartoq puigortaraat maluginiarpara. Inuit namminiilivinnissaq pillugu apeqqutinik akinissamut piareersimanersut qularnaarneqanngilaq. Assersuutigalugu tusagassiortut tuluttut apersuinerminni oqaatsit aporfiusinnaanerat taasinnaavara, Arnaq Nielsen akivoq.

- Tusagassiorfimmi tusagassiortumit tuluttut oqaasilimmik pulaarneqarpugut, taassumalu namminiilivinnissaq pillugu inuit apersorneqarumannginnerat tupigusuutigaa. Tamannalu immaqa oqaasersianik atuilluni apersorneqarnermi oqaatsit isumaasa ilaasa katanneqartarnerannik patsiseqarsinnaavoq. - Aap, qineqqusaarnermilu maani sammineqartut allaanerussanersut pissanganarpoq, Arnaq Nielsen piviusulersaarutip “Orsugiak - Grønlands hvide guld” takuteqqaarnissaa sioqqullugu apersorneqarnermini akivoq.

Namminersorlutik oqartussat tusagassiortunut inaanni piffissap ilaani tusagassiortut 50-it najuunnerat taassuma oqaatigaa.

- Tusagassiortutut maanngaanneersutut aperinissamut periarfissarsinissaq taava ajornarnerusarpa?

- Naagga, politikerit tusagassiortut maanngaanneersut siulliutillugit aperitittaraat maluginiarpara. Allaanngilaq qinikkat tamarmik taammaattussatut tamanna isigaat, Arnaq Nielsen, tusagassiortoqatimi akornanni paasisimasaqarnermigut suliamillu ingerlatsilluarnermigut nersorneqartoq akivoq.

Uissuumminartoq

Tusagassiortut nunatsinniittut politikerinit tatineqariartornermik misigisaqartarnerat saqqummiunneqarnikuuvoq. Tusagassiorfiup Sermitsiap pisortaanera Masaana Egede Danmarkimi aviisimi siorna allaaserisami, sulisut ataasiakkaat isorinnittunik allaaserisaqarnerminni politikerinik sianerfigineqarlutik oqaasipiluffigineqarnerat oqaatigaa.

Arnaq Nielsen aamma Tusagassiuinermi suliaqartut peqatigiiffianni siulittaasuusup, taamatut pissusilersorneq ilungersunartutut isigaa.

- Aap, tusagassiortut taamatut misigisaqartarput. Tusagassioriaaseq atorlugu apeqqutinik isorinnittunik aperisoqartarpoq. Tusagassiortut akerliusutut – illuatungiliuttut – saqqummiunneqartarput, taanna oqarpoq.

Arnaq Nielsen naapertorlugu taamatut pissuseqarneq tusagassiorfinnik sanngiillisitsisinnaavoq.

- Iliuutsit taamaattut uissuumminarput. Inuiaqatigiit tusagassiortut sulianik nuanniitsunik saqqummiillutik isorinnittunik aperisinnaasut pisariaqartippaat, taanna oqarpoq.